الماتىدا گرۋزيالىق بەلگىلى كەسكىندەمەشىنىڭ  جەتەكشىلىگىمەن زاعيپ سۋرەتشىلەردىڭ كورمەسى ءوتتى.

گرۋزيندىك كوركەم سۋرەت شەبەرى گەورگيي گۋراسپاشۆيلي الماتىداعى زاعيپتار قوعامىندا بولىپ، ونداعى تالانتتاردىڭ شىعارماشىلىق كورمەسىن ۇيىمداستىردى.

«مەن كوركەم سۋرەت اكادەمياسىندا 15 جىل بەينەلەۋ ونەرىنەن ساباق بەردىم. سوندا مەنىڭ ءبىر ستۋدەنتىمنىڭ كوزى كورمەي قالدى. ءبىز ونىڭ بۇل ونەرىن ءارى قاراي جالعاستىرۋ ءۇشىن جول ىزدەدىك. مۇندا وزىممەن بىرگە كوزى كورمەيتىن سۋرەتشىلەرگە ارنالعان باعدارلامامدى الا كەلگەن ەدىم»،-دەيدى گەورگيي گۋراسپاشۆيلي.

ستۋدەنتىنىڭ باسىنا تۇسكەن قيىن جاعدايدان كەيىن ول  ۇزاق ىزدەنەدى. زاعيپتار الەمىن زەرتتەپ، مۇمكىندىگى شەكتەۋلى جانداردىڭ سۋرەت سالۋىنا جاعداي جاساۋدى ۇيعارادى.

«ءبىز بىر-بىرىمىزگە ءاردايىم كومەكتەسەمىز، ۇيرەتەمىز. سۋرەتشىلەردە وسىنداي جازىلماعان زاڭ بار. ءار شەبەردىڭ ءوز قولتاڭباسى بار. سول ارقىلى تۇيسىگىندەگىنى كەنەپكە تۇسىرەدى. وسىنى زەرتتەي كەلە گرۋزيادا زاعيپ سۋرەتشىلەر وداعىن قۇردىق. ەرەكشە جاندارعا ارناپ وقىتۋ ادىستەمەسىن جاسادىق. ولار ارنايى كەنەپتى قۇرالدىڭ كومەگىمەن تىرنايدى. سونىڭ ىزىمەن بوياۋ جۇرگىزەمىز. ناتيجەسىندە سۋرەت پايدا بولادى»،-دەدى گرۋزيندىك سۋرەتشى.

الايدا سۋرەتشى قازاقستاندا زاعيپ سۋرەتشىلەر وداعىن قۇرۋ ءۇشىن شەنەۋنىكتەرمەن كەزدەسە الماعانىنا قىنجىلادى.

«الماتىدا سۋرەت سالۋعا قۇشتار جانداردى كەزدەستىردىم. ولار مەنىڭ قالۋىمدى ءوتىندى. ءبىراق قارجىلاي مۇمكىندىگىم جوق»،-دەيدى ول. سۋرەتشى كوزى كورمەيتىن تالانتتاردى ىزدەپ، الەمدى ارالاعان.