ۇرلىق جاساعاندارعا جازانى قاتايتىپ، ازاماتتارعا تراۆماتيكالىق قارۋ ۇستاۋ قۇقىعىن قايتارۋ قاجەت جانە پوليسەيلەردىڭ جالاقىسى كوتەرىلسىن. الماتى قالالىق قوعامدىق كەڭەس مۇشەلەرى وسىنداي ۇسىنىس كوتەردى.

قۇقىق قورعاۋ ورگاندارىنىڭ جۇمىسىن قايتا قاراۋعا دەنيس تەننىڭ اۆتوكولىك ۇرىلارىنىڭ قولىنان قازا تابۋى تۇرتكى بولدى. ءتارتىپ ساقشىلارىنىڭ سوزىنشە، جىل باسىنان بەرى الىپ شاھاردا 20 مىڭ ۇرلىق دەرەگى تىركەلگەن. انىعى، بۇگىنگى تاڭدا ونىڭ تەك تورتتەن ءبىرى عانا اشىلعان.  

«پوليسيا قىزمەتكەرلەرىنە بارلىعىن ارتىپ قويعىمىز كەلىپ وتىرعان جوق. ولار ۇلكەن جۇمىس اتقارادى. جۇمىستارى وڭاي ەمەس. قىزمەتى بارىسىندا ءوز ءومىرىن سارپ ەتىپ جاتادى. دەگەنمەن، قالادا تىركەلگەن قايعىلى وقيعا بۇل جۇمىستا ءالى دە كەمشىن تۇستار بار ەكەندىگىن كورسەتىپ وتىر»، – دەدى الماتى قالاسى قوعامدىق كەڭەسىنىڭ ءتوراعاسى راحمان الشانوۆ.

قوعامدىق كەڭەس وتىرىسى مانەرلەپ سىرعاناۋدىڭ حاس شەبەرى دەنيس تەنننىڭ ولىمىنەن كەيىن وتكىزىلىپ وتىر. داڭقتى سپورتشى 19 شىلدەدە قازا تاپقان ەدى. سوچي وليمپياداسىنىڭ جۇلدەگەرىن الماتىداعى قۇرمانعازى جانە بايسەيىتوۆ كوشەلەرىنىڭ قيىلىسىندا ەكى كۇدىكتى پىشاقتاپ كەتتى. ءۇش ليتردەي قان جوعالتقان سپورتشى ورتالىق اۋرۋحانانىڭ جان ساقتاۋ بولىمىندە قايتىس بولدى.

ءقازىر قىلمىسقا قاتىسى بار ەكى ازامات ۇستالىپ، تەرگەۋ جۇرگىزىلۋدە. قازاقستان بايراعىن سان مارتە كوكتە جەلبىرەتكەن تانىمال سپورتشىمەن قوشتاسۋ ءراسىمى 21  شىلدەدە بالۋان شولاق اتىنداعى سپورت كەشەنىندە ءوتتى. اقتىق ساپارعا شىعارىپ سالۋ راسىمىنە كەلگەن قاراقۇرىم حالىق كوپ بولدى. شامامەن، قارالى جيىنعا 15 مىڭنان استام ادام جينالدى.