الماتىداعى تۇرعىن ۇيلەردىڭ بارلىعى جىل اياعىنا دەيىن جىلۋ ەسەپتەگىش قۇرالدارىمەن قامتىلادى. 

قازىرگى تاڭدا مۇنداي جابدىق كوپقاباتتى ۇيلەردىڭ 63 پايىزىندا بار. قالاداعى 7713 ءۇيدىڭ 5300-ىنە ۇنەمدەۋ قۇرالى قويىلعان. جىل سوڭىنا دەيىن تاعى 2500 ۇيگە ەكونوم قۇرالى ورناتىلادى. مۇنداي جۇمىس رەسپۋبليكا بويىنشا جۇرگىزىلەدى.  

«قازاقستان بويىنشا جىلۋ ەسەپتەگىش قۇرالىمەن جابدىقتاۋ 45 پايىزدى قۇراپ وتىر. قالعان 55 پايىزدى ءبىز 4 كەزەڭگە ءبولىپ وتىرمىز. ياعني، 4 جىل ارالىعىندا كوممۋنالدىق سالا تولىعىمەن سيفرلانادى. وسى ارقىلى ەنەرگەتيكالىق كارتا جاساپ، ءار ءۇيدىڭ قانشا جىلۋ پايدالاناتىنىن ەسەپتەۋگە بولادى. جىلۋ ەسەپتەگىش قۇرالدارىن ورناتۋ ارقىلى،  جىلۋعا بۇعان دەيىن جۇمسالىپ كەلگەن قاراجاتتى بارىنشا ۇنەمدەۋگە مۇمكىندىك بەرگەن»، – دەدى «تكش قازورتالىق» اق باسقارما ءتوراعاسىنىڭ ورىنباسارى مەيىرجان مايكەنوۆ.

تۇرعىن ءۇي كوممۋنالدىق شارۋاشىلىق سالاسىن سيفرلاندىرۋدىڭ مۇمكىندىگىنە  بايلانىستى فورۋم ءوتتى. وعان 80-گە جۋىق شاعىن جانە ورتا بيزنەس وكىلدەرى قىزىعا قاتىستى. سونداي-اق، قالانىڭ كوممۋنالدىق كومپانيا وكىلدەرى جانە الماتى قالاسى اكىمىنىڭ ورىنباسارى الماس مادييەۆ ات سالىستى.

«تۇپكى ماقساتى جالپى تۇتىنۋشىلاردىڭ جالپى وسى سالادا جۇمىس ىستەپ جاتقان كومپانيالاردىڭ قىزمەتتەرىن ارتتىرۋ. تۇتىنۋشىلارعا ماكسيمالدى تۇردە قىزمەت كورسەتۋ، ساپاسىن كوتەرۋ»، – دەدى «الماتى» الەۋمەتتىك-كاسىپكەرلىك كورپوراسياسى» ۇك» اق ينۆەستورلارعا قىزمەت كورسەتۋ ورتالىعىنىڭ ديرەكتورى بەرىكبول ماندىبايەۆ.