شىمبۇلاق تاۋ-شاڭعى كۋرورتىنا باسەكەلەستەر كەرەك. بۇگىن الماتىدا باستالعان  ءىىى حالىقارالىق تاۋ سپورتى فەستيۆالىندە اتالعان كۋرورت باسشىسىنىڭ ءوزى وسىنداي ۇسىنىس تاستادى.

3 كۇنگە سوزىلاتىن شارا قازاقستاندىق جانە شەتەلدىك تۋريستەردىڭ، سپورت جانكۇيەرلەرى مەن بەلسەندى دەمالىستىستى سۇيەتىن جانداردىڭ باسىن قوسپاق. فەستيۆالدىڭ العاشقى كۇنىندە الماتى قالاسىنىڭ ءيميدجىن وتاندىق جانە حالىقارالىق سپورت ءتۋريزمى ءۇشىن تارتىمدى ورتالىق رەتىندە قالىپتاستىرۋ جايى ءسوز بولدى. شەتەلدەن كەلگەن ساراپشىلار مەن تانىمال ساياحاتشىلار ءوز تاجىريبەلەرىمەن ءبولىسىپ، مەگاپوليستى تۋريستەردىڭ سۇيىكتى جەرىنە اينالدىرۋدىڭ ءتۇرلى جولدارىن ايتتى. 

حالىقارالىق تاۋ سپورتى فەستيۆالىنىڭ العاشقى كۇنى پىكىر الماسۋمەن، تاجىريبە بولىسۋمەن باستالدى. شەتەلدىك ساراپشىلار مەگاپوليستىڭ تۋريستەر ءۇشىن قىزىقتى مەكەن بولاتىنىنا سەنىمدى. جايلى كليمات، سۇلۋ تابيعات، بيىك تاۋلار مەن قوناقجاي حالىق – ءبىزدىڭ ارتىقشىلىعىمىز. تەك ينفراقۇرىلىمدى دامىتىپ، ارتۇرلىلەندىرۋ كەرەك. شىمبۇلاققا كەلسەك، ول ءوز شىڭىنا جەتتى. ونى ارمەن قاراي دامىتۋدىڭ ەش ءمانى جوق،-دەيدى ماماندار. قايتا بىزگە ارىپتەس-باسەكەلەستەر كەرەك دەپ پىكىر ءبىلدىردى تاۋ شاڭعى كۋرورتىنىڭ باسشىسى.

«ءبىز الماتى وبلىسى ماڭايىندا شىمبۇلاق سەكىلدى تاۋ شاڭعى كۋرورتتارىن، تاۋ ءتۋريزمىن، تاۋ سپورتىن دامىتۋدى قوس قولداپ قولدايمىز. نەگە دەسەڭىز، دەمالىس كۇندەرى شىمبۇلاققا ادام تىم كوپ كەلەدى. سەنبى-جەكسەنبى كۇندەرى 10 مىڭنان اسا ادام كەلگەندە، قىزمەت كورسەتۋ تۇرلەرىنە دە زيان كەلەدى ءارى بۇل ءقاۋىپتى. بۇدان بولەك، شەتەلدىك تۋريستەردى تارتۋ ءۇشىن ءبىر عانا ەمەس، بىرنەشە ورىننىڭ بولعانى جاقسى»، –  دەدى «شىمبۇلاق» تشك ديرەكتورى ەرجان ەركىنبايەۆ.

الەمنىڭ 140 ەلىندە بولعان شۆەد ساياحاتشىسى يوحان نيلسون تاۋ ءتۋريزمىن ناسيحاتتاۋعا اتاقتى ادامداردى تارتۋ تاجىريبەسىمەن ءبولىستى. جيھانكەز الماتى ءتۋريزمىن دامىتۋ ءۇشىن جاقسى پيار مەن ءتيىمدى تۋريستىك پاكەتتەردىڭ قاجەتتىگىن ايتتى.  

«قازاقستانعا العاش رەت كەلىپ تۇرسام دا اسەم تابيعاتى مەنى باۋراپ الدى. سىزدەردە ءتۋريزمدى دامىتۋ ءۇشىن ءتيىمدى جاعدايلار جەتكىلىكتى: ءبىر عانا ۆيزاسىز رەجيمدى الايىق. الەمنىڭ كوپتەگەن ەلىنەن بىرنەشە ساعات ىشىندە-اق الماتىعا ۇشىپ كەلۋگە بولادى. ەندىگىسى – جاقسى جارناما جاساۋ. ماسەلەن حالىقارالىق دەڭگەيدەگى تەلەارنالىق شوۋلار ارقىلى PR جاساۋعا بولادى»، –  دەدى تانىمال ساياحاتشى (شۆەسيا) يوحان نيلسون.

جيىن بارىسىندا وسى سالانىڭ جەتەكشى ساراپشىلارى تاۋ ءتۋريزمىنىڭ الەمدىك نارىعىن جانە ونىڭ الماتىداعى الار ورنىن، سونداي-اق، تۋريزم يندۋسترياسىنىڭ قالا ەكونوميكاسىن كوتەرۋدەگى ءرولىن تالقىلادى. ءوز تاجىريبەسىمەن بولىسكەن فرانسياداعى  تاۋ شاڭعى كۋرورتىنىڭ باسشىسى قازاقستان تۋرالى ناسيحات جۇرگىزۋگە ەلشىلەردىڭ ءرولى زور ەكەنىن اتاپ ءوتتى.

«كوبىسى قازاقستان تۋرالى بىلمەگەن سوڭ، كەلۋگە قورقادى. ايتپەسە، تابىستى تۋريستىك ەل بولۋ ءۇشىن سىزدەردە كەرەك نارسەنىنىڭ ءبارى بار. قالانىڭ قانداي ادەمى ەكەنىن ءوز كوزىممەن كوردىم. مەنى ءتانتى ەتكەن دۇنيەنىڭ ءبىرى – كيىز ءۇي. مەنىڭ ويىمشا، ءار ەلدەگى ەلشىلەر بەلسەندى جۇمىس ىستەۋى ءتيىس. الەمگە اشىلۋ كەرەك»، – دەدى تاۋ-شاڭعى شيپاجايىنىڭ باس ديرەكتورى (فرانسيا) لۋكاس مارشاند.

ەرتەڭ فەستيۆال اياسىندا تابيعي رەلەفتە سپورتتىق جارتاسقا ورمەلەۋ بويىنشا حالىقارالىق جارىس وتەدى. ودان بولەك، ءبىر ەمەس، بىرنەشە اسۋدى باعىندىرعان ءداستۇرلى الپينيادا قاتىسۋشىلارى «مولودەجنىي» شىڭىنا كوتەرىلمەك.

فەستيۆال قوناقتارى سونىمەن قاتار، ماۋنتين-بايك بويىنشا سايىس جانە ءتۇرلى تاۋ سپورتى ءىس-شارالارىن تاماشالايدى. فەستيۆال كەزىندە ارقانجولدا جول اقىسى بارىپ قايتۋ ءۇشىن نەبارى 500 تەڭگەنى قۇرايدى.