الماتىدا زەينەتكەرلەر دە ەڭبەك ەتۋى مۇمكىن.

بۇگىن مەدەۋ اۋدانى اكىمدىگى العاش رەت ەگدە جاستاعى قارتتارعا جۇمىس جارمەڭكەسىن وتكىزدى. ويتكەنى، بويىندا قۋاتى بار زەينەتتەگىلەر ۇيدە وتىرعاننان گورى، قىزمەت ەتكەندى قالايتىن كورىنەدى. بۇل جولى اجەلەر مەن اتالارعا 35 كومپانيانىڭ وكىلى جۇمىس ۇسىندى. اسىرەسە، نارىقتا مەديسينالىق قىزمەتكەرلەر، تاربيەشىلەر، رەپەتيتورلار مەن ساتۋشىلار جەتىسپەيدى.

ايتا كەتەيىك، ءبىر عانا مەدەۋ اۋدانىندا 27 مىڭ زەينەتكەر بار. ونىڭ 3 مىڭ 300ء-ى قوعامدىق جۇمىسقا بەلسەندى ات سالىسسا، 800-دەن استام قارت كۇندەلىكتى تەگىن سپورت ۇيىرمەلەرىنە قاتىسادى. 

«كۇش-قۋاتى، قايراتى قوعامنىڭ ەكونوميكاسىن، قوعامنىڭ ءتيىستى سالاسىنا جۇمساۋعا ابدەن مۇمكىن. سوندىقتان دا، بۇل جەردە وزدەرىمەن دە سويلەسكەن كەزدە، ءبارىنىڭ ايتاتىنى ۇيدە وتىرعىلارى كەلمەيدى. كەرىسىنشە، ءبىر جۇمىسپەن اينالىسىپ، قوعامعا پايدا اكەلسەك ەكەن. وسى ءبىزدىڭ تاجىريبەمىزدى قازىرگى جاستارعا ۇرپاقتار ساباقتاستىعى اياسىندا بەرىپ كەتسەك ەكەن دەيدى»، – دەدى الماتى قالاسى مەدەۋ اۋدانى اكىمىنىڭ ورىنباسارى عاني مايلىبايەۆ.

«ءوزىمنىڭ جاسىم ءقازىر 66-دا. 10-شى جىلى زەينەتاقىعا شىققانمىن. ءقازىر جۇمىس ىستەگىم كەلەدى. سوندىقتان وسى جاققا كەلىپ، جۇمىس ىزدەپ جاتىرمىن. ۇيدە وتىرۋدان جالىعىپ كەتتىم. سوندىقتان كىشكەنە جۇمىس ىستەگىم كەلەدى»، – دەيدى زەينەتكەر كۇلماراي قاجەنوۆا.