الماتىدا جەكە ۇيلەردى سالۋ جەڭىلدەتىلدى. ەندى باسپانا يەسى بۇرىنعىداي قۇزىرەتتى ورىنداردىڭ تابالدىرىعىن توزدىرىپ، قۇشاق-قۇشاق قاعاز تاسىمايدى.

الماتى قالاسىنىڭ مەملەكەتتىك ساۋلەت-قۇرىلىس باقىلاۋى باسقارماسىنىڭ باسشىسى باعدات ءمانىزوروۆتىڭ ايتۋىنشا، 6 شىلدەدەن باستاپ قۇرىلىس جۇرگىزۋگە قاجەتتى رۇقساتتاردى الۋ جۇيەسى جەڭىلدەتىلدى. بۇعان دەيىن تەحنيكالىق، اۆتورىق قاداعالاۋ كومەگىنە، ساۋلەتشى جۇمىسىنا ميلليونداعان قاراجات كەتكەن ەكەن.

«جەكەمەنشىك ءۇي سالۋ ءۇشىن ادام الدىمەن قالالىق ارحيتەكتۋرادان رۇقسات الادى، ونىڭ ەسكيزدىك جوباسى سودان كەيىن ساراپتامادان وتەدى. ونى اۆتورلىق تەحقاداعالاۋ دەيمىز، سونىمەن كەلىسىم-شارتقا وتىراتىن. ءقازىر وتە جاقسى جەڭىلدىك جاسالىپ وتىر. الگىندەي اۋرە-سارساڭنىڭ ءبارى توقتاتىلدى. تەك ساۋلەت باسقارماسىنان ارحيتەكتۋرالىق-جوسپارلىق تاپرسىرما الادى»، – دەدى الماتى قالاسى مەملەكەتتىك ساۋلەت-قۇرىلىس باقىلاۋى باسقارماسىنىڭ باسشىسى باعدات ءمانزوروۆ.

ءبىراق بارلىق جاۋاپكەرشىلىكتى جەكە تۇرعىن ءۇي يەسى ارقالايدى. بۇل جەڭىلدىكتەر جەر ءۇي مەن ەكى قاباتتى باسپانالارعا ارنالعان. ال ەكى قاباتتان كوپ ءۇي سالىناتىن بولسا، ۇيرەنشىكتى جولمەن رۇقسات الۋ شارت. ويتكەنى الماتى قالاسى سەيسمولوگيالىق ءقاۋىپتى ايماقتا ورنالاسقان.

جالپى قالا بويىنشا ءقازىر 1 608 نىساننىڭ قۇرىلىسى ءجۇرىپ جاتىر. ونىڭ 405ء-ى بيۋدجەت ەسەبىنەن سالىنسا، قالعانى جەكە قاراجات ەسەبىنەن بوي كوتەرۋدە. جىل باسىنان بەرى جۇرگىزىلگەن تەكسەرىس ناتيجەسىندە 65 زاڭسىز قۇرىلىس انىقتالعان. ءتيىستى جۇمىس اياقتالعان سوڭ بۇل نىساندار سۇرىلەدى. ال قۇرىلىس نورمالارىن ساقتاماعاندارعا جىل باسىنان بەرى 91 ميلليون 100 مىڭ تەڭگە كولەمىندە ايىپپۇل سالىنعان. بۇل وتكەن جىلعى كورسەتكىشپەن سالىستىرعاندا ەداۋىر تومەن.