الماتى قالاسىنىڭ اكىمى باۋىرجان بايبەك شۆەيساريانىڭ فەدەرالدى كەڭەسشىسى، ەكونوميكا، ءبىلىم جانە زەرتتەۋ فەدەرالدى دەپارتامەنتىنىڭ باسشىسى يوحانن شنايدەر-امماننمەن كەزدەستى.

تاراپتار ساۋدا-ەكونوميكالىق بايلانىستاردى نىعايتۋ، ستارتاپتاردى قولداۋ جانە «Smart city» جوبالارىن جۇزەگە اسىرۋ ماسەلەلەرىن تالقىعا سالدى. شۆەيساريا قازاقستاننىڭ ءۇشىنشى ءىرى شەتەلدىك ينۆەستورى ەكەنىن ەسكەرسەك، ەكىجاقتى تاۋار اينالىمىنىڭ اۋقىمى دا جىل سايىن ارتىپ وتىر دەدى باس قوسقان دەلەگاتتار. ايتالىق، الماتىدا ساۋدا، مەديسينا، قارجى جانە باسقا سالالار بويىنشا شۆەيسارلىق كاپيتالمەن 94 كاسىپورىن جۇمىس ىستەۋدە.  

«ءبىز قازاقستانعا ءتۇرى سالا بيزنەسمەندەرىن ەرتىپ، ۇلكەن دەلەگاسياسىمەن كەلدىك. ساپاردىڭ باستى ماقساتى – بۇرىننان بار سەرىكتەستىك قاتىناستى نىعايتۋ جانە جاڭا ىنتىماقتاستىقتى قالىپتاستىرۋ. شۆەيساريادا پايدالى قازبالار جوق، سوندىقتان ەل ەكونوميكاسى جاڭا تەحنولوگيالارعا جانە قىزمەت كورسەتۋگە نەگىزدەلگەن. الماتى – جەدەل دامىپ كەلە جاتقان مەگاپوليس، باستى الەۋەتى ستارتاپتاردى دامىتۋعا باعىتتالعان. قالانىڭ گەوگرافيالىق ورنالاسۋى، دامىعان ينفراقۇرىلىمى الماتىنى بۇكىل ورتا ازيا ءوڭىرى بويىنشا بيزنەسمەندەردىڭ قىزمەتىن كەڭەيتۋدىڭ ايشىقتى الاڭىنا اينالدىرادى» – دەدى شۆەيساريا كونفەدەراسياسىنىڭ   فەدەرالدى كەڭەسشىسى يوحانن شنايدەر-اممانن.