ەلوردادا استانانىڭ 20 جىلدىعىنا جانە اتىراۋ وبلىسىنىڭ 80 جىلدىعىنا، رەسپۋبليكالىق دومبىرا كۇنىنە ارنالعان كورمە اشىلدى، دەپ حابارلايدى اتىراۋ وبلىستىق وڭىرلىك كوممۋنيكاسيالار قىزمەتى.
اتىراۋ وبلىستىق اكىمدىگى ۇيىمداستىرعان ەكسپوزيسيا ق ر ۇلتتىق اكادەميالىق كىتاپحاناسىندا وتەدى. بۇگىن، 30 ماۋسىمدا سالتاناتتى اشىلۋى بولدى. وعان پارلامەنت سەناتىنىڭ دەپۋتاتى عۇمار دۇيسەمبايەۆ، اقىن-جازۋشىلار، مادەنيەت، ونەر قايراتكەرلەرى، استانالىقتار مەن قالا قوناقتارى، ب ا ق وكىلدەرى قاتىستى.
"اتىراۋ استانانى قۇتتىقتايدى" اتتى كورمەگە ايماقتاعى مۋزەيلەر مەن كىتاپحانالارداعى جادىگەرلەر قويىلدى. شارا ماقساتى - استانا تۇرعىندارى مەن قوناقتارىن اتىراۋ وبلىسىنىڭ 80 جىلدىق تاريحىمەن تانىستىرۋ. جەرگىلىكتى اقىن-جازۋشىلاردىڭ جاڭا جيناقتارى، كىتاپتارى دا كورمەدەن ورىن الدى. كەلۋشىلەرگە 200 تاريحي، ەتنوگرافيالىق، ارحەولوگيالىق ەكسپوناتتار ۇسىنىلدى، ونىڭ ىشىندە التىن ادام مەن كونە سارايشىق قالاسىنان تابىلعان قۇندى دۇنيەلەر دە بار.
مەملەكەت باسشىسى بەكىتكەن دومبىرا كۇنىنىڭ قۇرمەتىنە كورمە بارىسىندا قوناقتار اتىراۋ توپىراعىندا تۋعان قۇرمانعازى مەن دينانىڭ كۇيلەرىن تىڭداي الادى.
-اتىراۋ - كۇي وتانى سانالادى. اتاقتى دومبىراشىلاردىڭ ارقاسىندا كۇي ونەرى عاسىردان عاسىرعا جالعاسىپ كەلەدى. دومبىرا- قازاق مادەنيەتىنىڭ ءبىر بولشەگى عانا ەمەس، مىڭداعان ادامداردىڭ جۇرەكتەرىن جىلىتقان ۇلتتىق اسپابىمىز، - دەيدى اقىن، اۋدارماشى مارجان ەرشۋ.
مۋزەي قورىنداعى رىسباي عابدييەۆ، قارشىعا احمەدياروۆ، ءازيدوللا ەسقالييەۆ، عاتاۋ ءيبىشوۆ، ءاسيما ىزمۇحامبەتوۆا، ناريمان ۇلكەنبايەۆ، يليا جاقانوۆ سەكىلدى ونەر قايراتكەرلەرىنىڭ دومبىرالارىمەن اتىراۋلىق ونەرپازدار ءان ايتىپ، كۇي تارتتى.
كورمەگە جەرگىلىكتى قولونەر شەبەرلەرىنىڭ تۋىندىلارى دا قويىلدى. شارا اياسىندا "دومبىرا - داستان" كىتابىنىڭ تۇساۋكەسەرى ءوتتى. ول كىتاپتا مۋزەي قورىندا ساقتاۋلى ۇلتتىق اسپاپتار جايىندا جازىلعان.
-بۇگىنگى كورمە اتىراۋ وبلىسىنىڭ باي مۇراسى تۋرالى تولىق مالىمەت بەردى. بەلگىلى اقىن-جازۋشىلاردىڭ، دومبىراشىلاردىڭ شىعارماشىلىعىمەن تانىستىق.ارينە، ءبىر كورمە ارقىلى ايماقتىڭ بار بايلىعىن كورسەتۋ قيىن، الايدا التىن ادام، دومبىرا كوللەكسياسى، كەرەمەت كىتاپتار سياقتى نەگىزگى جادىگەرلەر ءوڭىر جايىندا شەجىرەلى سىر شەرتەدى، دەيدى ق ر ارداگەرلەر ۇيىمى ورتالىق كەڭەسى ءتوراعاسىنىڭ ورىنباسارى ءومىرزاق وزعانباي.
