استانا كۇنى مەرەكەسى قارساڭىندا اتىراۋ وبلىسىندا مادەنيەت ءۇيى، دەنە شىنىقتىرۋ-ساۋىقتىرۋ كەشەنى، بالاباقشا، 13 سانات بويىنشا كەزەكتە تۇرعاندارعا پاتەر سەكىلدى الەۋمەتتىك نىساندار پايدالانۋعا بەرىلدى، سونىمەن قاتار سارايشىق قالاشىعىنىڭ ورنىن ساقتاپ قالۋ ماقساتىندا جاسالعان جاعالاۋدى بەكىتۋ جۇمىستارى اياقتالدى.
5 شىلدەدە اتىراۋدا استانانىڭ 20 جىلدىعىنا ارنالعان سالتاناتتى شارا ءوتتى. مەرەكەلىك باعدارلامادا وبلىس اكىمى نۇرلان نوعايەۆ: "استانا-بىرلىك پەن بەرەكەنىڭ، ەلىمىزدىڭ تەلەگەي تابىستارىنىڭ سيمۆولى. 20 جىل ىشىندە استانا ەلىمىزدىڭ جۇرەگىنە اينالدى. مۇنىڭ ءبارى مەملەكەت باسشىسىنىڭ يدەيالارىنىڭ ءساتتى جۇزەگە اسقانىنىڭ كورىنىسى. بۇگىنگى استانا ارمانداردى، شىعارماشىلىق جوسپارلار مەن يننوۆاسيالىق يدەيالاردى، باتىل باستامالاردى جۇزەگە اسىرۋ الاڭى. ەلوردامىزدىڭ ەڭسەسى بيىك بولا بەرسىن، قازاقستانىمىز دامىپ، بارلىق ادام باقىتقا كەنەلسىن،-دەپ تىلەگىن ارنادى.
مەرەكەلىك شارادا ق ر پرەزيدەنتىنىڭ 20 ماۋسىم 2018 جىلعى جارلىعىمەن اتىراۋ وبلىسىنىڭ 33 تۇرعىنى "استاناعا 20 جىل" مەرەكەلىك مەدالىمەن ماراپاتتالدى. ولاردىڭ اراسىندا ەڭبەك ارداگەرلەرى، وبلىستىق ارداگەرلەر كەڭەسىنىڭ وكىلدەرى، قوعامدىق كەڭەس مۇشەلەرى، ءبىلىم بەرۋ، مەديسينا، ب ا ق سالالارىنىڭ قىزمەتكەرلەرى بار.
6 شىلدە، استاناعا 20 جىل بولعان مەرەيلى كۇنى ماحامبەت اۋدانىنداعى سارايشىق قالاشىعىندا جاعالاۋدى بەكىتۋ جۇمىستارى اياقتالدى. سالتاناتتى شارادا وبلىس اكىمىنىڭ ورىنباسارى الىبەك ناۋتييەۆ وبلىس تۇرعىندارىن اتاۋلى كۇنمەن قۇتتىقتادى.
-سارايشىق-تاريحي ورىن. جىبەك جولى بويىندا ورنالاسقان بۇل كونە شاھار ەندى تۋريستىك ورتالىققا اينالادى. 2015 جىلى قالاشىق ورنىن جايىقتىڭ تاسقىن سۋىنان ساقتاپ قالۋ ءۇشىن قاراجات ءبولىندى. -دەدى الىبەك ناۋتييەۆ. - قازاقستاندىقتار ءۇشىن ماڭىزدى مەرەكە-استانانىڭ 20 جىلدىعىندا جۇمىستىڭ اياقتالعانى دا جاقسىلىقتىڭ نىشانى. مەملەكەت باسشىسى ەلىمىزدەگى كيەلى ورىندارعا اركەز كوڭىل ءبولىپ كەلەدى. بولاشاقتا تۋريستىك ورتالىق سالۋدى جوسپارلاپ وتىرمىز. ايتا كەتەيىك، ەكى جىل ىشىندە قۇرىلىسشىلار بيىكتىگى 3،6 م، ۇزىندىعى 1،5 م قورعانىس بوگەتىن سالدى. بۇل استانا كۇنى مەرەكەسى قارساڭىندا
اياقتالعان ءبىر عانا نىسان ەمەس، بۇعان دەيىن ماحامبەت اۋدانىنىڭ بەرەكە اۋىلىندا مادەنيەت ءۇيى پايدالانۋعا بەرىلدى. وبلىستا بىرنەشە الەۋمەتتىك نىسان تاپسىرىلدى. كەڭوزەك سەلولىق وكرۋگىندە دسك، دارىگەرلىك امبۋلاتوريالىق بولىمشە اشىلدى. جىلىوي اۋدانىندا 580 ورىندىق ەكى بالاباقشا جۇمىستارىن باستادى. اتىراۋدا 320 ورىندىق دەنە شىنىقتىرۋ-ساۋىقتىرۋ كەشەنى سالىندى. استانانىڭ 20 جىلدىعى قارساڭىندا اتىراۋلىق 195 وتباسى باسپانالى بولدى. «نۇرلى جەر» مەملەكەتتىك باعدارلاماسى اياسىندا بەرەكە ىقشاماۋدانىندا 195 پاتەرلىك تۇرعىن ءۇي تاپسىرىلدى. ول ۇيلەر مەملەكەتتىك تۇرعىن ءۇي قورىنان پاتەر الۋعا قۇقىلى 13 سانات بويىنشا كەزەكتە تۇرعاندارعا بەرىلدى. 2018 جىلى ايماقتا 3892 پاتەرلىك 44 تۇرعىن ءۇيدىڭ قۇرىلىسى باستالدى، 34 ءۇي جىل اياعىنا دەيىن بەرىلەدى. وبلىس ورتالىعىندا 39 تۇرعىن ءۇي قۇرىلىسى ءجۇرىپ جاتىر، قالعاندارى اۋدانداردا.
ايتا كەتۋ كەرەك، بۇل تاۋەلسىزدىك جىلدارىنداعى ەڭ جوعارى كورسەتكىش.
استانا كۇنىندە اتىراۋ قالاسىنىڭ تۇرعىندارى مەن قوناقتارىنا مەرەكەلىك باعدارلاما ۇسىنىلادى، ونىڭ ىشىندە اۋىل شارۋاشىلىعى ونىمدەرىنىڭ جارمەڭكەسى، بالالار شىعاراشىلىعى فەستيۆالى، ستريتبولدان سپورتتىق جارىس،قازاقستاندىق ەسترادا جۇلدىزدارىنىڭ كونسەرتى، مەرەكەلىك وتشاشۋ بار.
7 شىلدەدە استانا كۇنى مەرەكەسىنىڭ اياسىندا اتىراۋدا العاش رەت «Atyrau Marathon. NIGHT RACE» تۇنگى جاپپاي جۇگىرۋ جارىسى وتەدى.
