كەشە عانا قۇربان ايت مەرەكەسى دەپ قۋاندىق، تويلادىق، تۋعان-تۋىستىڭ ۇيىنە ايتتاپ باردىق. ەر ادامدار بازاردان شاما شارقى جەتكەنىنشە قۇرباندىققا شالىناتىن مالدى تاڭدادى. قۇدايدىڭ رازىلىعىنان ءۇمىت كۇتكەن مۇسىلمان قاۋىم شالعان قۇرباندىقتارىن جاعدايى جوقتارعا تاراتىپ بەرسە، ەندى ءبىرى بەس پارىزدىڭ ءبىرى قاجىلىققا بارىپ جاتتى. قۇربان ايتتا ءاربىر مۇسىلمان ءوزىنىڭ جومارتتىعى مەن ادامشىلىعىن، مەيىرىمدىلىگىن كورسەتۋگە تىرىسادى. يسلام دىنىدەگى بۇل مەرەكە تەك قۇرباندىق شالۋمەن عانا شەكتەلمەيتىنى بەلگىلى. بۇل مەيرامدا ءار مۇسىلماننىڭ پەندەشىلىگى، جومارتتىعى، تاقۋالىعى سىنعا تۇسەدى.  قۇرباندىق شالۋدىڭ  نەگىزگى ءمانىسى دە وسى ەدى.

ءبىراق  يسلام ءدىنى تازالىقتان باستالادى دەگەندى كەيبىر مۇسىلماندار ۇمىتقان سەكىلدى. سەبەبى فەيسبۋك الەۋمەتتىك جەلىسىندە ورىس ءتىلدى ازاماتشا «مەيرامدى تويلاپ، قويلارىن سويىپ، قالدىقتارىن تاستاپ كەتكەن. وسىعان جاۋاپتى ازاماتتار قايدا قاراپ وتىرعانى تۇسىنىكسىز؟ بۇل جەردەگى ءيىستى سوزبەن ايتىپ جەتكىزۋ، شىداپ تۇرۋ مۇمكىن ەمەس. مۇسىلماندار، ەت ءدامدى بولعان شىعار دەپ ويلايمىن»، دەپ مۇسىلمانداردى قاتاڭ سىنعا الدى. 

ءيا، بۇل ازاماتشانىڭ ايتقانى راس. سەبەبى مەيرامدى تويلاعانداردىڭ لاس قالدىقتارىنان نەگە باسقا ادامدار جاپا شەگۋ كەرەك؟ كەرىسىنشە، وزگە ۇلت تا، وزگە ءدىن وكىلى دە قۇربان ايت مەيرامى تۋرالى جاقسى پىكىر ءبىلدىرىپ، تامسانا قاراۋ كەرەك ەمەس پە؟! 

Qamshy.kz اقپارات اگەنتتىگىنىڭ ءتىلشىسى وسى سۇراقتاردىڭ جاۋابىن بىلمەك بولىپ بىرنەشە ءدىنتانۋشى مەن الماتى قالاسىنىڭ يمامدارىنا حابارلاسقان بولاتىن. الايدا 10 شاقتى ءدىنتانۋشى مەن يمامدار يسلامداعى ىسىراپشىلىق تۋرالى پىكىر بىلدىرە المادى. سوندىقتان، وقىرمان، سىزدەرگە يسلامداعى ىسىراپشىلىق تۋرالى عالامتورداعى اقپاراتتى ۇسىنۋعا ءماجبۇرمىن.

«اسىل ءدىنىمىز اللانىڭ تۋرا جولى يسلامدا ىسىراپقا بايلانىستى تاعىلىمدى حاديس شارىپتەر  جەتەرلىك.

قاسيەتتى قۇرانكارىمدە: «ىشىڭدەر، جەڭدەر، ءبىراق ىسىراپ قىلماڭدار. شىندىعىندا، اللا تاعالا ىسىراپ قىلۋشىلاردى سۇيمەيدى»، – دەلىنگەن [اعراف سۇرەسى 31 ايات]. ياعني ىسىراپ ەتۋشىلەردى ۇلى جاراتۋشى جاراتپايدى دەيدى. اللا تاعالانىڭ مەيرىمىنە بولەنۋدى ويلاساق، بارىمىزدى ورنىمەن جۇمساۋ ماڭىزدى.

اللا تاعالا قۇران اياتىندا بىلاي دەيدى: «شىنىندا ىسىراپقورلار شايتاننىڭ تۋىسى. ال شايتان، راببىسىنا وتە قارسى» (يسرا سۇرەسى 27-ايات)دەپ ىسىراپشىلدىققا بايلانىستى تەرەڭ تۇسىنىكتە ايتىلعان. دۇنيە، بايلىقتى ، كۇش-قۋاتتى ۋاقىتتى ىسىراپسىز ورنىمەن جۇمساۋدى اللا تاعالا بىزگە مىندەت ەتكەن. ىسىراپقا بارماۋ بايلىق پەن قاناعاتتىڭ جانە بەرەكەنىڭ باستاۋى بولماق»، — دەلىنگەن mazhab.kz سايتىندا.