تۇرعىن ۇيلەردى جوندەۋدەن وتكىزۋ جۇمىستارىن تامىز ايىنىڭ باسىندا اياقتاۋ جوسپارلانىپ وتىر، دەپ حابارلايدى اتىراۋ قالالىق اكىمدىگىنىڭ باسپا ءسوز قىزمەتى.بيىل تەرموجاڭعىرتۋ باعدارلاماسى بويىنشا قۇرىلىس جۇمىستارى 8 ۇيدە، اتاپ ايتساق، اۆانگارد ىقشام اۋدانىندا، ساتپايەۆ كوشەسى مەن ۆوكزال ماڭى ىقشاماۋدانىندا باستالدى. تامىز ايىنىڭ باسىندا مەردىگەرلەر 8 ءۇيدى پيك-نە تاپسىرادى. ءقازىر اۆانگارد-2 ىقشاماۋدانىنداعى №15 كوپ قاتارلى تۇرعىن ۇيدە جوندەۋ جۇمىستارى ءبىتتى. 

-مۇندا جۇمىسشىلار ءۇيدىڭ شاتىرىن، ەلەكتر سىمدار جۇيەسىن اۋىستىرىپ، پودەزدەردى اكتەدى، دوموفون ورناتتى، ىستىق، سالقىن سۋ جۇرەتىن تۇربالاردى جوندەدى، جەرتولەنى قۇرعاتىپ، جوندەۋدەن وتكىزدى. 
مەردىگەر مەكەمە، سونداي-اق، كارىز تۇربالارىن اۋىستىرىپ، بارلىق پودەزدەرگە جىلۋ ەسەپتەگىش ورناتتى، ەندى تۇرعىندار جىلۋدى ۇنەمدەيتىن بولادى. تەرموجاڭعىرتۋ باعدارلاماسى اياسىندا ءۇيدىڭ الدى تولىق بويالىپ، بالكوننىڭ سىرتقى جاعىنا مەتالپروفيل ورناتىلدى، پودەزدەردىڭ تەرەزەلەرى اۋىستىرىلدى، -دەيدى 
«تۇرعىن ۇيلەرگە كوممۋنالدىق قىزمەت كورسەتۋ» ج ش س باسشىسىنىڭ ورىنباسارى رۇستەم قابدول.

ءقازىر، سونىمەن قاتار، قايتارىلعان قاراجات ەسەبىنەن وبلىس ورتالىعىنداعى تاعى دا 4 تۇرعىن ۇيدە جوندەۋ-قالپىنا كەلتىرۋ جۇمىستارى باستالدى. مۇندا دا بارلىق كوممۋنيكاسيالار جاڭارتىلىپ، شاتىر اۋىستىرىلادى. ەرتەرەكتە سالىنعان التى تۇرعىن ۇيگە ليفت ورناتۋ دا جوسپاردا بار.

-بيىل جىل اياعىنا دەيىن 13 تۇرعىن ۇيگە كۇردەلى جوندەۋ جاساۋدى جوسپارلاپ وتىرمىز. ونىڭ جەتەۋىندە كوممۋنيكاسيالار جاڭارتىلادى، ب.مومىش ۇلى كوشەسىندەگى ءۇش ۇيگە، ساتپايەۆ كوشەسىندەگى 52،54،56 ۇيلەرگە، بارلىعى التى ۇيگە جاڭا ليفت ورناتىلادى،-دەيدى رۇستەم قابدول.

بيىل تەرموجاڭعىرتۋ باعدارلاماسىن جۇزەگە اسىرۋعا قالالىق بيۋدجەتتەن 430 ملن تەڭگەگە جۋىق قارجى ءبولىندى. ونىڭ 70 پايىزى يگەرىلدى، الداعى قىركۇيەك ايىندا تولىق يگەرىلەدى.