اليمۇحاممەد قۇتتۇمۇرات ۇلى اپپاراتتىق كەڭەس بارىسىندا قاراماعىنداعىلارعا وبلىس ورتالىعىن اباتتاندىرۋدىڭ جاڭا تۇجىرىمداماسىن ازىرلەۋدى تاپسىردى، دەپ حابارلادى اتىراۋ قالاسى اكىمدىگىنىڭ باسپاسوز-قىزمەتى.
بۇگىن، 30 شىلدەدە اپپاراتتىق كەڭەس بارىسىندا قالا باسشىسى اتىراۋ قالاسىن كوگالداندىرۋ مەن اباتتاندىرۋعا قاتىستى بىردەن بىرنەشە ماسەلە كوتەردى. اتاپ ايتقاندا، اليمۇحاممەد قۇتتۇمۇرات ۇلى جاسىل ەكپەلەردى سۋارۋ، اعاشتاردى كەسۋ، ساندىك گۇلدەر وتىرعىزۋ جانە شاعىن ارحيتەكتۋرالىق قۇرىلىستار ورناتۋ ماسەلەلەرىن قوزعادى.
- قالا تۇرعىندارى تاراپىنان اعاشتار مەن بۇتالى وسىمدىكتەردى سۋارۋدىڭ ناشارلىعىنا وتە كوپتەگەن رەنىشتەر ايتىلۋدا. ءقازىر ورتالىق كوشەلەردىڭ وزىندە قۋراعان جاسىل ەكپەلەردى بايقاۋعا بولادى. سۋارۋعا ارنالعان بارلىق سۋ قۇبىرلارىنىڭ دۇرىستىعىن، سۋ قىسىمىنىڭ دەڭگەيىن تەكسەرۋ قاجەت. ەگەر تامشىلاتىپ سۋارۋ جۇيەسى قالامىزعا جارامايتىن بولسا، وندا ادەتتەگى سۋ قۇبىرىن جۇرگىزىڭىزدەر، ءبىزدىڭ مىندەتىمىز – بارلىق جاسىل ەكپەلەردى ساقتاۋ، - دەپ تاپسىردى قالا باسشىسى قاراماعىنداعىلارعا.
سونىمەن قاتار، اليمۇحاممەد قۇتتۇمۇرات ۇلى وبلىس ورتالىعىنىڭ ەستەتيكالىق بەزەندىرىلۋىنىڭ سانسىزدىگىن، شاعىن ارحيتەكتۋرالىق كەسكىندەردى جوبالاۋ جانە قالانى كوگالداندىرۋ مەن ساندەۋ كەزىندە ورتاق جۇيەنىڭ جوقتىعىن باس ايتتى.
- قالا تۇرعىندارى سوڭعى كەزدەرى قالانى بەزەندىرۋگە قاتىستى نارازىلىقتار بىلدىرۋدە، ءبىرىڭعاي تۇجىرىمداما جوق. تكش بولىمىنە قالانى كوگالداندىرۋ جانە اباتتاندىرۋ تۇجىرىمداماسىن ازىرلەۋدى تاپسىرامىن. وبلىس ورتالىعىن بەزەندىرۋگە ارنالعان ارحيتەكتۋرالىق نىساندار مەن جاسىل ەكپەلەر جالپى قالانىڭ ءستيلى ەسەبىمەن ورناتىلۋى قاجەت جانە ۇيلەسىمسىز كورىنبەۋى ءتيىس، -دەدى اليمۇحاممەد قۇتتۇمۇرات ۇلى تكش، جولاۋشىلار كولىگى جانە اۆتوموبيل جولدارى ءبولىمىنىڭ باسشىسىنا قاراتىپ.
