الماتىدا قالانىڭ بارلىق جەر استى وتپەلى جولدارىن كۇردەلى جوندەۋدەن وتكىزۋ جۇمىستارى اياقتالۋدا. مەگاپوليس اكىمى باۋىرجان بايبەك جۇمىس ساپارى كەزىندە جاياۋ جۇرگىنشى ينفراقۇرىلىمىن رەكونسترۋسيالاۋ قارقىنىن تەكسەرىپ، جاڭارعان جەر استى وتپەلى جولداردى قاراپ شىقتى.

جاڭارعان جەر استى وتپەلى جولدارعا ديودتى جارىق كوزدەرى مەن قوزعالىس قۇرىلعىلارى، مۋزىكا شىعاراتىن دىبىس ديناميكالارى ورناتىلعان. وتپەلى جولداردىڭ توبەلەرى ارنايى جانبايتىن ماتەريالداردان جاسالعان، قابىرعالارى اشىق ادەمى سۋرەتتەرمەن بەزەندىرىلگەن.

مىسالى، اباي مەن ابىلايحاننىڭ بۇرىلىسىنداعى جەر استى وتپەلى جولدىڭ قابىرعالارىنا قازاق اقىنى جانە اعارتۋشى اباي قۇنانبايەۆتىڭ ناقىلدارى جازىلعان. رەسپۋبليكا سارايىنا قارسى ورنالاسقان جەر استى وتپەلى جولدىڭ قابىرعاسىندا «جەتى قازىنا» اتتى قازاق كوشپەندىسىنىڭ جەتى بايلىعى كورىنىس تاپقان.

«ءقاۋىپسىزى قالا» باعىتى اياسىندا جەر استى وتپەلى جولعا جاڭا سيپاتتاعى بىرنەشە ۆيدەوكامەرالار ورناتىلعان. ولاردا جۇزدەردى انىقتايتىن مۇمكىندىكتەر بار ءارى اۋداندىق ىشكى ىستەر باسقارمالارىنىڭ باقىلاۋ جۇيەلەرىنە قوسىلعان.

«بيىلعى جىلى 160-تان استام كوشە جوندەۋدەن ءوتتى جانە 600-دەن استام اۋلا اباتتاندىرىلادى. قالانىڭ تاريحي ورتالىعى مودەرنيزاسيالانۋدا. تەك سوڭعى جىلى عانا 800 كيلومەتر ينجەنەرلىك جەلى جاڭاردى. ارينە، جوندەۋ جۇمىستارىنىڭ قالا تۇرعىندارىنا جايسىزدىق تۋدىرۋى مۇمكىن. مەن ولاردان ءسال عانا شىدامدىلىق تانىتۋدى وتىنەمىن. كوشەلەرگە رەكونسترۋكسيا جۇرگىزۋ كەزىندە قۇرىلىس ەرەجەسىن ساقتاماعان ءبىرقاتار ءىرى قۇرىلىس ۇيىمدارى ايىپپۇل تولەدى. بارلىق جۇمىستار ساپالى ءارى قىسقا مەرزىمدە اياقتالادى. كەيىن وسى قۇرىلىس كومپانيالارى «قۇرىلىس مادەنيەتىن» يگەرىپ، جوندەۋ جۇمىستارىن قالا تۇرعىندارىنا بىلدىرمەي جۇرگىزەتىن بولادى»، - دەپ اتاپ ءوتتى باۋىرجان بايبەك.