الماتىدا جىل سوڭىنا دەيىن 1 مىڭ 500 وتباسى باسپانالى بولادى. بۇل تۇرعىدا «نۇرلى جەر» جانە «الماتى جاستارى» سەكىلدى باعدارلامالار جۇزەگە اسىرىلۋدا. ال الماتىلىقتار «7-20-25» باعدارلاماسىنا بەلسەنە قاتىسىپ جاتىر.

بۇگىندە قالادا تۇرعىن ءۇي كەزەگىندە تۇرعان ازاماتتار سانى 22 مىڭنان اسادى. ولار كەزەك قارقىنىن ە-gov.kz پورتالى ارقىلى باقىلاپ وتىر. ءتىپتى، قايتا تىركەلۋ دە ەلەكتروندى تۇردە جاسالادى. ياعني، جەڭىلدىككە يە ازاماتتارعا ول ءۇشىن تۇرعىن ءۇي جانە تۇرعىن ءۇي ينسپەكسياسى باسقارماسىنا بارۋدىڭ قاجەتى جوق.

«قۇجاتتى حالىققا قىزمەت كورسەتۋ ورتالىقتارىنا بارىپ نەمەسە ە-gov.kz پورتالى ارقىلى تاپسىرۋعا بولادى. ەگەر قايتا تىركەلمەسەڭىز ءبىز ونى ءوزىمىز ىسكە اسىرامىز. 2017 جىلدان بەرى وتكىزىپ ءجۇرمىز. بىلتىر 2700 ازاماتتى كەزەكتەن شىعاردىق. ياعني، بۇل كەزەككە تۇرىپ قايتا تىركەلمەگەن ازماتتار»، – دەدى الماتى قالاسى تۇرعىن ءۇي جانە تۇرعىن ءۇي ينسپەكسياسى باسقارماسىنىڭ باسشىسى ءانۋار وسكەنبايەۆ.

سايالى ىقشاماۋدانىندا «نۇرلى جەر» باعدارلاماسى بويىنشا سالىنعان جاڭا پاتەرلەر بەرىلەدى. مۇندا مەملەكەتتىك، بيۋدجەتتىك مەكەمە قىزمەتكەرلەرى، كوپبالالى جانە تولىق ەمەس وتباسىلار قونىستانباق. ال «الماتى جاستارى» باعدارلاماسى بويىنشا قالا اكىمدىگى بيىل 2 ميلليارد تەڭگە بولگەن بولاتىن.  

«بۇل اسىرەسە، جاس وتباسىلار ءۇشىن وتە قولايلى باعدارلاما. ماسەلەن، اۋەزوۆ اۋدانىندا 120 مىڭ تەڭگەگە پاتەر جالداپ تۇرعان وتباسى بولدى. ال بىزدەگى ءبىرىنشى پۋل بويىنشا 10 ميلليون تەڭگەگە باسپانا الدى. ولار باستاپقى 6 جىلدا الدىن الا قارىز بويىنشا 94 مىڭ تەڭگە تولەيدى. كەيىننەن تۇرعىن ءۇي قارىزىنا كوشكەن سوڭ 11 جىل بويى 46 مىڭ تەڭگەدەن تولەيدى»، – دەدى «قازاقستاننىڭ تقجب» اق باسقارما ءتورايىمى ءلاززات يبراگيموۆا.

«7-20-25» باعدارلاماسى بويىنشا جۋىردا 1 مىڭ وتباسى قونىس تويىن تويلايدى. وسى ۋاقىتقا دەيىن 10 ميلليارد تەڭگە ماقۇلدانعان. سونىڭ 4 ميلليارد قارجىسى الماتىلىقتاردىڭ باسپانا ماسەلەسىن شەشۋگە جۇمسالماق. ال جىل اياعىنا دەيىن ءوتىنىم قارجىسى تاعى ەكى ەسە ارتپاق.

«الماتى قالاسىندا 12 ميلليون تەڭگەگە ءبىر پاتەر الاتىن بولسا، ءبىزدىڭ نەسيە الۋشىمىز ونىڭ ەكى ميلليونىن العاشقى جارنا رەتىندە تولەيدى. 10 ميلليون تەڭگەنى ءبىز 25 جىلعا بەرەمىز. سوندا ونىڭ اي سايىنعى تولەمى 71 مىڭ تەڭگە بولادى»، – دەدى «باسپانا» يپوتەكالىق ۇيىمى» اق باسقارما ءتوراعاسى قايرات التىنبەكوۆ.

تامىز ايىنىڭ اياعىندا قالالىق تۇرعىن ءۇي جانە تۇرعىن ءۇي ينسپەكسياسى باسقارماسىندا وپەراسيالىق زال اشىلماق. وندا ازاماتتار كەڭەسشىلەردىڭ كومەگىن الا الادى.