الماتىدا №17 مەن 62ء-شى باعىتتاعى اۆتوبۋس قۇرامى جاڭاردى. قازىرگى زامانعا ساي، سمارت قۇرىلعىلارمەن جابدىقتالعان كولىكتەردىڭ ساپاسىمەن قالا اكىمى باۋىرجان بايبەك تانىسىپ، مەگاپوليستە ىڭعايلى اۆتوبۋستاردى كوبەيتۋدى تاپسىردى.

بيىل ترانسپورتتىق رەفورما اياسىندا الماتىداعى قوعامدىق كولىكتەردىڭ 80 پايىزى جاڭالارىنا اۋىستىرىلادى. بىلتىر 479 اۆتوبۋستىڭ جارتىسىنان كوبى قالا بيۋدجەتىنىڭ ەسەبىنەن ساتىپ الىنعان. وسى جىلى 569 سۋ جاڭا قوعامدىق كولىكتىڭ 65 پايىزى جەكە كومپانيانىڭ قاراجاتىنا الىنباق.

جولاۋشىلار تاراپىنان تۇسەتىن شاعىمدار دا كوبەيىپ كەتكەن. نارىقتىڭ 40 پايىزىن قامتيتىن «گرين باس» كومپانياسىنىڭ كورسەتەتىن قىزمەتىنە تۇرعىنداردىڭ كوڭىلدەرى تولمايدى. سونىمەن قاتار، اتالعان كومپانيانىڭ اۆتوبۋستارىندا «وڭاي» جۇيەسى دۇرىس جۇمىس ىستەمەيدى ەكەن. سونى سىلتاۋراتىپ، جۇرگىزۋشىلەر جول اقىسىن وزدەرى الادى.

مەگاپوليس باسشىسى باۋىرجان بايبەك تاسىمالداۋشى كومپانيانىڭ قىزمەتى ناشار بولسا، قالا تاراپىنان قولداۋدىڭ شەكتەلەتىنىن ايتتى.  

«ءبىز ءۇشىن ەڭ باستىسى – قىزمەت ساپاسىن كوتەرۋ. جولاۋشىلاردىڭ ىڭعايلى اۆتوبۋستاردا وتىرۋىن قامتاماسىز ەتۋ. تاسىمالداۋشى كومپانيانىڭ كولىكتەرى جاڭا، ءىشى تازا، جۇرگىزۋشىلەرى سىپايى بولسا، ءبىز سۋبسيديالاۋعا دايىنبىز. ال تالاپقا ساي كەلمەسە، قاراجاتتى قايتىپ الامىز. ءۇش جىل بۇرىن وسى ترانسپورتتىق رەفورمانى باستادىق. سودان بەرى جەكە كومپانيالار وزدەرىن زاڭداستىرىپ، زاڭ بويىنشا جۇمىس ىستەپ كەلەدى»، – دەدى الماتى قالاسىنىڭ اكىمى باۋىرجان بايبەك.