الماتىلىق وقۋشىلار اراسىندا باتىرلار جىرىن جاتقا ايتۋدان ۇلتتىق بايقاۋ باستالدى. رۋحاني جاڭعىرۋ باعدارلاماسى اياسىندا قولعا الىنعان جوباعا بيىل «الپامىس باتىر» جىرى ارقاۋ بولادى.

بايقاۋعا 6 جانە 10 سىنىپتار اراسىنداعى كەز كەلگەن وقۋشى قاتىسا الادى. ەكى كەزەڭنەن تۇراتىن دودانىڭ باستى ماقساتى – جاستاردى كىتاپ وقۋعا باۋلىپ، ۇلتتىق رۋحتى ءسىڭىرۋ جانە دارىندى بالالارعا بارىنشا قولداۋ كورسەتۋ.

جۇلدە قورى - 3 ميلليون تەڭگەنى قۇرايدى. جەڭىمپازداردىڭ ەسىمى 28 قىركۇيەك كۇنى بەلگىلى بولادى. ال جۇلدەگەر اتانعان ءار وقۋشىنىڭ ۇستازى انگلياعا اعىلشىن ءتىلىن ۇيرەنۋ كۋرسىنا جىبەرىلەدى.

«جالپى بۇل «تۇلپار ءمىنىپ، تۋ العان» دەگەن ۇلتتىق جوبا مەملەكەت باسشىسىنىڭ «رۋحاني جاڭعىرۋ» باعدارلاماسىنىڭ اياسىندا الماتى قالاسى اكىمدىگىنىڭ باستاماسىمەن قولعا الىنىپ جاتىر. ءبىزدىڭ قوياتىن تالابىمىز – بالالار تەك جىردى جاتتاپ قانا قويماي، ونىڭ ىشىندەگى كونەرگەن سوزدەردى، جەر-سۋ اتاۋلارىن، ولاردىڭ ءمانىن ءبىلۋى كەرەك. ويتكەنى، قازىلار القاسى سۇراق قويىپ وتىرادى»، – دەدى اقىن، ۇلتتىق جوبا جەتەكشىسى سەرىك سەيىتمان.