الماتىلىق جاس وتباسىلار جاستارعا ارنالعان تۇرعىن ءۇي باعدارلاماسىنىڭ شاراپاتىن كورۋدە. باعدارلامانىڭ ءوزى دە «الماتى جاستارى» دەپ اتالادى.
الماتىدا پاتەر جالداپ تۇراتىن كوپتىڭ ءبىرى – اسىراۋشىسىنان ايىرىلعان ءلايلا قايرات قىزى. 3 بالاسىمەن پاتەرسىز جۇرگەن كەلىنشەك جالدامالى ۇيگە اي سايىن 120 مىڭ تەڭگەدەن تولەيدى. جالعىزباستى انا ەكى جىل باسپانا كەزەگىندە تۇرعان. الايدا، «الماتى جاستارى» جوباسى ارقىلى تۇرعىن ۇيگە تەزىرەك قول جەتكىزەتىنىن ءتۇسىنىپ، شۇعىل تۇردە قۇجات تاپسىرۋعا كىرىسىپ كەتكەن. العاشقى كەزەڭنەن جوعارى ۇپاي جيناپ، ەندى تولەم قابىلەتىن راستاۋدا. قازىرشە بانكتەن 1 بولمەلى پاتەرگە قارىز الۋعا ءوتىنىش ءبىلدىرىپتى.
«1 بولمەلى پاتەر. ءبىرىنشى 6 جىل-94 مىڭ تەڭگەدەن، قالعان 11 جىلىن 46 مىڭ تەڭگەدەن تولەيمىن. ول وتە قولايلى باعدارلاما دەپ ويلايمىن. ويتكەنى، العاشقى جارنا كەرەك ەمەس. تەك كرەديتتىك تاريحىڭ مەن تولەم قابىلەتىڭ جاقسى بولسا، بانك وتكىزەدى دەپ ۇمىتتەنىپ وتىرمىز»، – دەيدى ءلايلا راحىمبەكوۆا.
بيىل قالالىق اكىمدىكتەن بۇل باعدارلامانى قولداۋ ماقساتىندا 2 ميلليارد تەڭگە بولىنگەن. بۇل قاراجات جوبانىڭ نەگىزگى وپەراتورى «تۇرعىنۇيقۇرىلىسجيناقبانكىنە» اۋدارىلادى. سايكەسىنشە، قارجى ينستيتۋتى 5 پايىزبەن 25 جىلعا دەيىن نەسيە بەرەدى. مۇنداي مۇمكىندىكتى قالت جىبەرگىسى كەلمەگەن 1 مىڭ 200-دەن استام الماتىلىق ءوتىنىش تۇسىرگەن. الايدا ولاردىڭ 200ء-ى عانا ەكىنشى كەزەڭگە وتكەن.
ەسكەرە كەتىرلىگى، بيىلعى تالاپتارعا ءبىرقاتار وزگەرىس ەندى: تۇرعىن ۇيگە ءوتىنىش بەرگەن ازاماتتىڭ جاسى 35-تەن اسپاۋى كەرەك. ءبىراق جولداسىنىڭ جاس ەرەكشەلىگى ەسكەرىلمەيدى. سونداي-اق، ەكىنشى جانە ودان كەيىنگى بالالارعا بىلتىرعىداي 15 بالدان ەمەس، 20 ۇپايدان ەسەپتەلەدى.
«2017 جىلعى باعدارلامادا نەگىزگى تالاپتاردىڭ ءبىرى – ءوتىنىش يەسىندە جانە ونىمەن بىرگە تۇراتىن وتباسى قۇرامىندا جىلجىمايتىن مۇلىك جوق بولۋى ءتيىس. ال اعىمداعى جىلى ءوتىنىش يەسىندە نە بولماسا وتباسى قۇرامىندا جىلجىمايتىن مۇلىك كامەلەتكە تولعانعا دەيىن، جەكەشەلەندىرۋدىڭ نەمەسە مۇراگەرلىككە الىنۋدىڭ نەگىزىندە پايدا بولعاننان كەيىن، ياعني ورتاق ۇلەستىك بولسا، وندا باعدارلاماعا قاتىسۋعا رۇقسات بەرىلگەن بولاتىن»، – دەدى الماتى قالاسى تۇرعىن ءۇي جانە تۇرعىن ءۇي ينسپەكسياسى باسقارماسىنىڭ باس مامانى التىناي ءالىمحانوۆا.
ازاماتتارعا بانك باس-اياعى 10 ميلليون تەڭگە قارىز بەرە الادى. قۇنى ودان قىمباتتاۋ ءۇي العىسى كەلەتىندەر العاشقى جارناسىن تولەۋلەرىنە بولادى. مامانداردىڭ ايتۋىنشا، وتىنىشتەرى وتكەن وتباسىلاردىڭ باسىم بولىگى نەكەدە كەمىندە 5 جىلدان بەرى تۇر. بانك قىزمەتكەرلەرى قارىز الۋشىنىڭ تولەم قابىلەتى ونىڭ ءوتىنىشى مەن وتباسى مۇشەلەرىنىڭ اي سايىنعى كۇنكورىسىنەن ارتىلعان قاراجاتپەن ەسەپتەلەتىنىن ەسكەرتەدى.
«ادام باسىنا، ستاتيستيكا بويىنشا، الماتى، استانا، اقتاۋ، اتىراۋ قالاسىندا 15 اەك ەسەپتەلىنەدى. 1 اەك – 2405 تەڭگە بولعاندىقتان، ادام باسىنا 36075 تەڭگە كەتەدى. وعان قوسا، جولداسىنىڭ جۇمىس جاعدايى مەن بالا-شاعاسىنىڭ سانىن ەسەپتەيمىز. ورتا ەسەپپەن، 1 شارشى مەترىن 250-260 مىڭ تەڭگەمەن ەسەپتەپ الىپ جاتىر. قازىرگى قاتىسۋشىنىڭ كوبى ناۋرىزباي اۋدانىنا بارىپ ءجۇر»، – دەدى «تۇرعىنۇيقۇرىلىسجيناقبانكى» اق الماتىداعى №1 قىزمەت كورسەتۋ ورتالىعىنىڭ باسشىسى كامشات وڭالبايەۆا.
تولەم قابىلەتى راستالعان سوڭ ۇمىتكەر 10 كۇننىڭ ىشىندە قالاعان پاتەردى ءوزى تاڭدايدى. الايدا، باسپانانى جاڭادان بوي كوتەرگەن ۇيدەن تاڭداۋى ءتيىس.
