الماتىدا تۇرعىن ءۇي جانە تۇرعىن ءۇي ينسپەكسياسى باسقارماسىنىڭ جۇمىسىنا كوڭىلى تولمايتىنداردىڭ سانى ارتقان. بۇگىندە ولاردىڭ ۇستىنەن تۇسكەن 20 شاعىمنىڭ جارتىسى ناقتىلانعان. 

وسىعان بايلانىستى الماتى قالاسى مەملەكەتتىك قىزمەت ىستەرى دەپارتامەنتىنىڭ ۆەدومستۆوارالىق جۇمىس توبىنىڭ كەزەكتى وتىرىسى وسى باسقارمانىڭ مەملەكەتتىك قىزمەت كورسەتۋ ماسەلەسىن قاراستىردى. ودان وزگە، مۇمكىندىگى شەكتەۋلى جاندار ءۇشىن نىسانداردىڭ قولجەتىمدىلىگى ءسوز بولدى. الداعى ۋاقىتتا عيماراتتارعا پاندۋستاردى ورناتۋ ماسەلەسى قارالدى.  

«15 تامىزعا دەيىن نىسانداردىڭ مۇمكىندىگى شەكتەۋلى جاندارعا قولجەتىمدىلىگىن تاعى تەكسەرۋ قاجەت. بۇعان دەيىن مەملەكەتتىك قىزمەت ىستەرى دەپارتامەنتى قالاداعى مەملەكەتتىك قىزمەت كورسەتەتىن ورىنداردى تەكسەرىپ شىقتى. ءبىراز ەسكەرتۋلەر بولدى، سونىڭ ورىندالۋىن قاداعالاۋ كەرەك. 29 تامىزعا دەيىن جاۋاپتى ورگانمەن بىرلەسىپ مەملەكەتتىك قىزمەت كورسەتۋ مەرزىمىن وڭتايلاندىرۋ قاجەت»، – دەدى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتى باسشىسىنىڭ ورىنباسارى شىنار ءالىمحان.