اقش پرەزيدەنتى دونالد ترامپتىڭ باسى تاعى داۋعا قالدى. الەۋمەتتىك جەلى قولدانۋشىلارى "پرەزيدەنت مەملەكەتتىك تۋدىڭ قالاي بەينەلەنەتىنىن بىلمەيدى" دەپ كۇدىكتەنىپ وتىر.

ترامپ وگايوداعى بالالار اۋرۋحاناسىنىڭ بىرىنە بارىپ، اۋرىپ جاتقان بالالاردىڭ كوڭىلىن سۇراپ قايتىپتى. ساپاردان سۋرەتتەردى اقش دەنساۋلىق ساقتاۋ ءمينيسترى الەكس ازار Twitter-دەگى پاراقشاسىنا جاريالادى. مۇندا جەلى قولدانۋشىلارىنىڭ نازارىن اۋدارعان ترامپتىڭ ساۋاپتى ءىسى ەمەس، بالالارمەن بىرگە سالعان مەملەكەتتىك تۋدىڭ سۋرەتى. مينيستر جاريالاعان فوتولاردىڭ بىرىندە پرەزيدەنت تۋدىڭ قىزىل تۇسكە بويالۋ كەرەك تۇسىن كوكپەن بوياعانى بايقالادى.

«ترامپ امەريكالىق تۋدىڭ قالاي بەينەلەنەتىنىن دە بىلمەيدى. مەكتەپتەگى تاپسىرمانى ورىنداپ جاتقان سەكىلدى»، - دەپ جازدى mirandayaver ەسىمدى Twitter قولدانۋشىسى.

«بۇل ءبىرىنشى كۇنى عوي. بالاباقشانى ءبىتىرىپ السىن، بىرنارسە ۇيرەنەر»، - دەپ جازدى @Subachef ەسىمدى قولدانۋشى.

ەندى ءبىرى اق ءۇي باسشىسى اقش ەمەس، رەسەيدىڭ تۋىن سالعىسى كەلگەن بولار دەپ جاتسا، وزگەسى نيدەرلاندتىڭ تۋىن سالدى دەپ ءسوز ەتتى.

جەلى قولدانۋشىلارىنىڭ اراسىندا ترامپتى جاقتاعاندار دا بولدى. تۋدى سالعان بالالاردىڭ ءبىرى بولار، ال ترامپ سونى جاي عانا بوياعىسى كەلگەن دەپ مازاق ەتكەندەردى سابىرعا شاقىردى.