الماتىداعى ناۋرىزباي اۋدانىندا جاڭا فۋتبول الاڭى اشىلدى. «تۋعان جەرگە تاعزىم» اتتى باعدارلاما اياسىندا جاسالعان بۇل يگى شارانىڭ شىعىنىن جەكە كاسىپكەر كوتەرگەن.

بۇل وسى اۋداندا اشىلعان 6-شى بالالار الاڭى.

قۇنى 2 ميلليون تەڭگەنى قۇرايتىن الاڭقايدا اۋدان بالالارى ەندى الاڭسىز اسىر سالىپ ويناۋعا كىرىسىپ-اق كەتتى. جاسوسپىرىمدەردىڭ بوس ۋاقىتى سپورتپەن شۇعىلدانىپ وتەتىنىنە اتا-انالار دا ءدان ريزا. ال قالتالىلار قالا تۇرعىندارىنىڭ يگىلىگى ءۇشىن ءالى دە اتقاراتىن شارۋانىڭ شاش ەتەكتەن ەكەنىن العا تارتتى.  

«بۇل الاڭدى وسى ايماقتا تۇراتىن جاسوسپىرىمدەرگە ارناپ سالدىق. قولدارى بوس كەزدە، اسىرەسە، جاز مەزگىلىندە بالالار جينالىپ، وسىندا فۋتبول ويناسىن دەگەن نيەتىمىز ىسكە استى. فۋتبول الاڭىنىڭ اشىلۋ كەزىندە بالالاردىڭ كوزىندەگى قۋانىشتى كورىپ، ءوزىمىز دە قۋانىپ تۇرمىز»، – دەيدى كاسىپكەر شەرداۋلەت شەرمۇحان.