الماتىداعى پوليسيا عيماراتتارىنىڭ بيىك قورشاۋى قيراتىلماق. حالىقتى قورعاۋى ءتيىس ساقشىلاردىڭ وزدەرى بۇعان دەيىن قارۋلى كۇزەت، بيىك قورشاۋمەن وقشاۋلانىپ كەلسە، ەندى بۇل قوعامدىق كەڭەستىڭ شەشىمىمەن الىنىپ تاستالماق. ونىڭ ورنىنا پوليسەيلەر حالىققا جاقىن بولۋى ءۇشىن فرونت-كەڭسەلەر اشپاق.

اينەكتەن جاسالعان قابىلداۋ كابينەتتەرىنە كەلگەن تۇرعىندارعا قىلمىستىق جانە اكىمشىلىك پوليسيا قىزمەتكەرلەرى كەڭەس بەرەدى. وسىلايشا ازاماتتار ءتارتىپ ساقشىلاردان كوكەيدەگى ساۋالعا تەز جاۋاپ الۋعا مۇمكىندىك الادى. سونداي-اق، فرونت-كەڭسەلەردە كۇتۋ زالى دا قاراستىرىلماق. ازىرگە بۇل باستامانىڭ ناقتى قاشان جۇزەگە اساتىنى بەلگىسىز دەيدى الماتى قالالىق ىشكى ىستەر دەپارتامەنتىنىڭ رەسمي وكىلى. ويتكەنى، وسىعان دەيىن قارۋ-جاراقتار ساقتالىپ كەلگەن مەكەمە ستراتەگيالىق ماڭىزى بار نىساندار قاتارىنا جاتقان.

«ىشكى ىستەر باسقارمالارى جاقسى قورشالۋى ءتيىس دەگەن نۇسقاۋلىق بار. سوندىقتان، بىرەر جىل بۇرىن وسى جۇمىس قولعا الىنىپ، قازىرگى تاڭدا قالالىق قوعامدىق كەڭەستىڭ ۇسىنىسىمەن بۇل جۇمىس قايتا قارالىپ، جۋىردا بۇل قورشاۋلار الىنىپ تاستالۋى مۇمكىن. ول 1-2 كۇننىڭ شارۋاسى ەمەس قايتكەندە دە. ءتيىستى قاراجاتتار ءبولىنۋى ءتيىس. جانە باسقا دا قۇجاتتامالىق پروسەدۋرالار جۇرگىزىلۋى ءتيىس»، – دەدى الماتى قالاسى ءىىد رەسمي وكىلى سالتانات ازىربەك.