الماتىنىڭ كىلەم گۇلزارلارى تەك تۇرعىنداردىڭ عانا ەمەس، شەتەلدىك ديزاينەرلەردىڭ قىزىعۋشىلىعىن تۋعىزۋدا. الەمنىڭ 8 ەلىنەن كەلگەن لاندشافت ارحيتەكتورلارى قالانىڭ تاجىريبەسىن زەرتتەۋدە. ولار ەكى كۇن ارالىعىندا ساياباقتار مەن كوشە بويىنا وتىرعىزىلعان گۇلدەرمەن تانىسپاق.

بيىل شاھاردىڭ 53 مىڭ شارشى مەتردەن استام جەرىنە اسەم وسىمدىكتەر ەگىلىپ، گۇلزارلار جاسالدى. قالانى اباتتاندىرۋ ءۇشىن 8 مەردىگەر كومپانيا جۇمىلدىرىلعان. ولار گۇل وتىرعىزۋ جۇمىستارىن ماۋسىم ايىندا اياقتادى.  

«الماتىعا العاش رەت وسىدان ەكى جىل بۇرىن كەلگەنمىن. ساياباقتاعى كىلەم گۇلزارلارى ەرەكشە ۇنادى. مەنىڭشە، قازاقستان پوستكەڭەستىك كەڭىستىكتەگى وسىنداي اسەم گۇلزاردى ساقتاعان مەملەكەت. مۇنداي گۇلزار كىلەمىن دۋبايدا عانا كورگەنمىن. جوعارى ساپادا جانە اسا جوعارى تالعاممەن ەگىلگەن وسىنداي گۇلزار الەم بويىنشا دا جوق دەپ سانايمىن»، – دەدى ديزاينەر (سانكت-پەتەربۋرگ) دميتريي بارانوۆ.

«الماتى قالاسىندا بۇرىن ءوزىمىزدىڭ الماتىنىڭ اپورتى مەن شىمبۇلاق بولسا، ودان كەيىن وسى كىلەم گۇلزارلار شەتەلدىك قوناقتاردى ءتانتى ەتىپ كەلگەن. سوندىقتان، ەندى الماتىنىڭ وزىندە ءقازىر تۇڭعىش پرەزيدەنت ساياباعى ۇلكەن دارەجەدە كورسەتىلەتىن ساياباق»، – دەدى «گرين لاند» ج ش س ديرەكتورى گۇلزادا قالدىبايەۆا.