ايتا كەتەيىك، ايرىقشا كاسىپورىن تەك الماتىدا جانە توكيودا جۇمىس ىستەيدى. ال ءونىمى بۇكىل الەمدە سۇرانىسقا يە. 

الماتى يندۋستريالدى ايماعىندا ىسكە قوسىلعان كاسىپورىن ءىرى كوپىرلەر قۇرىلىسىندا جانە سەل تاسقىنىنا قارسى قولدانىلاتىن بەرىك بولات ارقانداردى وندىرەدى. مۇندا تەحنيكالىق ولشەمى جاعىنان زاماناۋي جابدىقتار ورناتىلعان.

«Tokyo Rope Almaty» زاۋىتىنىڭ ونىمدەرى تمد ەلدەرى مەن پارسى شىعاناعىندا، سونىڭ ىشىندە ساۋد ارابياسىنىڭ ءىرى جوبالارىندا قولدانىلادى. ال الىپ شاھاردا شىعارىلعان ءونىم ەسەنتاي وزەنى جاعالاۋىنىڭ، ۇلكەن الماتى وزەنىنە دەيىنگى اۆتوجولداردىڭ، مەدەۋ - شىمبۇلاق اسپالى جولى مەن «مىڭجىلقى» بوگەتىنىڭ بەرىكتىگىن ارتتىرۋ ءۇشىن پايدالانىلۋدا.

«ەلىمىزدەگى زاۋىت 2016 جىلى ىسكە قوسىلدى. العاشىندا الماتىدا عيماراتتى جالعا الىپ وتىردى. كەيىننەن يندۋستريالدى ايماقتا جەر تەلىمىن الىپ، زاۋىت سالدى»، – دەدى «الماتى يندۋستريالدىق ايماعى» ج ش س ءبولىمىنىڭ مامانى دانا قالىقوۆا.

يندۋستريالدى ايماقتا بارلىق قاجەتتى ينفراقۇرىلىمدىق جۇمىستار جۇرگىزىلگەن. جاڭا زاۋىت 4 گەكتار اۋماقتا ورنالاسقان. ءوندىرىس ورنىنىڭ كولەمى 3500 شارشى مەتردى قۇرايدى. زاۋىتتىڭ قۋاتى جوعارى – جىلىنا 17 مىڭ توننادان استام بولات ونىمدەرىن شىعارادى. مۇندا قازىرگى تاڭدا 14 ادام جۇمىس ىستەيدى. زاماناۋي تەحنولوگيا كوپ ادام كۇشىن قاجەت ەتپەيدى.

«مىناداي ورالعان سىم اكەلىنەدى. ول تولىق تەكسەرىلىپ، مىنا قۇرالعا قويىلادى. كەيىننەن پەرنەتاقتا ارقىلى قوسامىز. ناتيجەسىندە، مىناداي ورىلگەن تور شىعادى. ءبىر گابيوندىق تور جاساۋ ءۇشىن بار بولعانى، 1 مينۋت ۋاقىت جۇمسالادى»، – دەدى سەح وپەراتورى ەرجان كىشىبايەۆ.

كومپانيانىڭ جاپونيادان باسقا ەلدەردە بالاماسى جوق. الەمگە ايگىلى ءىرى 20 كوپىردىڭ 12-سىنە وسى كومپانيانىڭ بولات سىمدارى قولدانىلعان. زاۋىت ىشكى سۇرانىستى قاناعاتتاندىرىپ قانا قويماي، ءونىمدى ەكسپورتتاماق. جاپوندىق ساپامەن شىعارىلاتىن قازاقستاندىق ءونىم ورتالىق ازيا ەلدەرىنەن باستاپ، جەر شارىنىڭ تۇكپىرىنە تاسىمالدانباق.