الماتى مەتروسىنىڭ «سارىارقا»، «دوستىق» جانە «قالقامان» بەكەتتەرىنىڭ قۇرىلىسىنا 100 ميلليارد تەڭگە قاراجات جۇمسالادى. العاشقى ەكەۋى 2021ء-شى جىلى پايدالانۋعا بەرىلەدى.

ءقازىر «قالقامان» بەكەتىنىڭ جوبالىق سمەتالىق قۇجاتتارى ازىرلەنىپ جاتىر، ونىڭ قۇرىلىسى 47 ميلليارد تەڭگەگە باعالانۋدا. ال كەلەشەكتە سالىناتىن اۆتوبەكەت ستانساسى قالانىڭ ترانسپورت حابىنا اينالادى. بۇل الماتىعا كەلەتىن كولىك نوپىرىنە جانە كەپتەلىسكە وڭ اسەرىن تيگىزەدى.

الماتى مەتروسىنىڭ «قالقامان» بەكەتى قۇرىلىسى ءۇشىن 152 جەر تەلىمىندەگى عيماراتتار سۇرىلەدى. بۇل ماقساتتا مەملەكەت قازىناسىنان 47 ميلليارد تەڭگە بولىنگەن. «مەتروپوليتەن» كوممۋنالدىق مەملەكەتتىك كاسىپورنى وكىلدەرىنىڭ ايتۋىنشا، «جايلاۋ» ىقشاماۋدانىنىڭ تۇرعىندارى قارسىلىق تانىتىپ، مەكەمە اتىنا حات جازعان. بۇل ماسەلەمەن ءقازىر جەر قاتىناستارى باسقارماسى اينالىسىپ جاتقان كورىنەدى.

«جايلاۋ» ىقشاماۋدانىنداعى 15 جەر تەلىمى سۇرۋگە جاتادى. جەراستى جولى اباي داڭعىلىمەن وتەتىندىكتەن، تەحنيكالىق تالاپتارعا سايكەس تۋننەل جيەگى كەمىندە 40 مەتردى قۇراۋى كەرەك. تۇرعىندار شاعىمدارىن حات ارقىلى كورسەتتى. قازىرگى ۋاقىتتا بۇل ماسەلە قارالىپ جاتىر. قالالىق جەر قاتىناستارى باسقارماسى اتالعان ۋچاسكەلەردى ساتىپ الادى»، – دەدى «مەتروپوليتەن» كمك كۇردەلى قۇرىلىس قىزمەتىنىڭ ءبولىم باسشىسى ماقسات سەيتقۇلوۆ.

ءقازىر «قالقامان» بەكەتى بويىنشا جوبالىق سمەتالىق قۇجاتتار ازىرلەنىپ، ءتيىستى ساراپتاما جاسالعان. ال سالىنىپ جاتقان «سارىارقا» جانە «دوستىق» ستانسالارى 2021ء-شى جىلى ءوز جۇمىسىن باستايدى. «الماتىمەتروقۇرىلىس» مەكەمەسىنىڭ مالىمەتىنشە قوس بەكەتتىڭ قۇرىلىسىنا 67 ميللياردتان استام قاراجات بولىنگەن. بيىلعا 9 ميلليارد تەڭگە بولىنسە، ونىڭ 5 ميللياردى يگەرىلىپتى.

«بۇل سوماعا تەحنيكالىق قاداعالاۋ، جوبالاۋ، قۇرىلىس جۇمىستارى سياقتى بارلىق شىعىندار كىرەدى. اتالعان ستانسالاردىڭ قۇرىلىسى باستالعالى، ياعني 2015ء-شى جىلدان باستاپ، 25 ميلليارد تەڭگە يگەرىلدى»، – دەدى «الماتىمەتروقۇرىلىس» اق وندىرىستىك تەحنيكالىق دەپارتامەنتىنىڭ ديرەكتورى جاميليا ارىسوۆا.

مەكەمە وكىلدەرى قوس ستانسانىڭ حالىق يگىلىگىنە بەرىلۋى تىكەلەي قارجىعا بايلانىستى ەكەنىن العا تارتتى. «سارىارقا» مەن «دوستىق» بەكەتىنىڭ جالپى ۇزىندىعى 3 شاقىرىمنان اسىپ جىعىلادى. «سارىارقا» بەكەتى ءبىرىنشى، ءۇشىنشى، بەسىنشى، جەتىنشى شاعىن اۋدانداردىڭ اۋماعىن قامتىسا، «دوستىق» بەكەتى جەتىسۋ جانە مامىر ىقشاماۋداندارىنىڭ تۇرعىندارىنا ىڭعايلى بولماق. جاڭا بەكەتتەر پايدالانۋعا بەرىلسە، تاۋلىگىنە 85 مىڭ جولاۋشى دىتتەگەن جەرىنە ىڭعايلى ءارى جىلدام جەتە الادى. سايكەسىنشە، «اباي» بەكەتىنىڭ جۇكتەمەسى ازايادى.