مەكتەپ فورماسىن ساتىپ الۋ بيىل قولجەتىمدى باعادا بولماق. مەكتەپ وقۋشىلارىنا ارنايى كيىم تىگەتىن وتاندىق كاسىپكەرلەرگە ساتۋ ورىندارىن اكىمدىك تەگىن بەرىپ جاتىر. ەسەسىنە، جەڭىل ونەركاسىپ سالاسىنىڭ جەتەكشى وكىلدەرى تاۋارلارىن نارىقتىق باعادان 20 پايىزعا تومەن ساتۋلارى ءتيىس.

قۇداي بەرگەن قوس قۇلىنىن قاتارىنان قالدىرعىسى كەلمەي، جىل سايىن جاڭا مەكتەپ فورماسىن الاتىن انانىڭ ءبىرى – ۆەنەرا. ۇلى مەن قىزىنا كيىم تاڭداپ جۇرگەن كەلىنشەك مەكتەپ فورماسىنىڭ قۇنى ساپاسىنا سايكەس بولسا دەيدى. جىل سايىن جارمەڭكەگە كەلەتىن انانىڭ ايتۋىنشا، ساتىلىپ جاتقان كيىمدەردىڭ باعاسى بازاردان تومەن بولماسادا، قىمبات ەمەس.  

«جىلىنا ءبىر فورمادان الامىز. ەكى سىم، ءبىر پيدجاك. جىل ۇقىپتى بويىنا كيەدى. سوندىقتان بىزگە جەتكىلىكتى»، – دەيدى ۆەنەرا مۇساتايەۆا.

جارمەڭكەدە جەيدە، كوستيۋمدەردەن بولەك، قازاق كاسىپكەرلەرىنىڭ قولىنان شىققان بىلعارى تۋفليلەردى دە تابۋعا بولادى. شيكىزاتى مەن تىگىن ماشينالارى شەتەلدىك بولسا دا، ءسانى مەن ساپاسىن ارتتىرۋدىڭ ادىستەرىن وزدەرى ويلاپ تاپقان.

«38 رازمەرگە دەيىنگى بەلدەمشەلەر 5500 تەڭگەدەن باستاپ، 6000 تەڭگەگە دەيىن تۇرادى. سارافاندار 7 مىڭ تەڭگەدەن باستالادى. كوستيۋمدەر 13 مىڭ تەڭگەدەن بار. ۇلدارعا كوستيۋمدەر 13 500 تەڭگەدەن باستالادى»، – دەدى كاسىپكەر اسىلگۇل قۋانبايەۆا.    

اكىمدىك جارمەڭگەگە قاتىسقان كاسىپكەرلەرگە ساتۋ الاڭدارىن تەگىن ۇسىنىپ وتىر. كوپشىلىككە كورنەۋ ورىندا ءبىر ايدان اسا تەگىن تۇرىپ، تاۋارىن ساۋدالايتىن  كاسىپكەرلەرگە قويىلاتىن تالاپ – قۇن كوشەدەگى دۇكەندەردەن تومەن بولۋى ءتيىس. باستاپقى فابريكا باعاسىنان اسا اسىرمايمىز دەگەن 9 كومپانيا كيىمدەرىن قويعان.

«ءونىم ءوندىرىس قۇنىنان اسپاۋى ءتيىس. الدىمەن بۇل جەردە مەكتەپ وقۋشىسىنا قاجەتتى فورمانىڭ بارلىق ءتۇرىن تابۋعا بولادى. جارمەڭكەنىڭ باستى ماقساتى – وتاندىق ءوندىرىستى قولداۋ ءارى تۇرعىندارعا ىڭعايلى جاعداي جاساۋ، ساپالى تاۋار تۇرلەرىن ۇسىنۋ»، – دەدى  الماتى قالاسى كاسىپكەرلىكتى جانە يندۋستريالدىق-يننوۆاسيالىق دامۋ باسقارماسى باسشىسىنىڭ ورىنباسارى رۇستەم ۆوروشيلوۆ.  

قولايلى جاعداي جاسالعانىنا قۋانعان كاسىپكەرلەر وتكەن جىلعى جارمەڭكەدە 4 مىڭنان استام ادام كەلىپ، قاجەتىن الىپ كەتكەن دەيدى. وقۋشىعا ارنالعان برەند كيىمدەردىڭ كورمە-جارمەڭكەسى قىركۇيەكتىڭ 10-نا دەيىن جالعاسادى.