الماتىداعى تۇركسىب اۋدانىندا قارقىندى تۇردە گاز قۇبىرلارى تارتىلۋدا. قازىرگى تاڭدا اۋدان 98 پايىزعا گازبەن قامتىلعان.

بيىل دا وسى باعىتتاعى جۇمىس جالعاسىن تاۋىپ وتىر. بۇل جۇمىستار وسى جىلدىڭ اياعىنا دەيىن تولىعىمەن اياقتالۋى مۇمكىن.

جالپى اۋدانداعى بارلىق تۇرعىن 2019 جىلعا دەيىن كوگىلدىر وتىنمەن تولىق قامتاماسىز ەتىلمەك.

تۇركسىب اۋدانىندا بۇگىنگى تاڭدا 1485 ءۇي تابيعي گازعا قوسىلماعان. كوگىلدىر وتىن كەلمەگەن جەكە تۇرعىن ءۇيدىڭ باسىم بولىگى المەرەك ىقشاماۋدانىندا ورنالاسقان. پەش جاعىپ كۇنەلتىپ كەلگەن تۇرعىندار ەندى بۇل كۇندەردىڭ ارتتا قالاتىنىنا ءالى سەنە الار ەمەس.

«بۇل جەردە تۇرىپ جاتقانىما 37 جىل بولدى. وسى كۇندى كۇتكەنىمىزگە كوپ جىل بولدى. جان-جاعىمىزدىڭ بارىندە گاز بار. تەك بىزدە عانا جوق ەدى. ەندى ءبىزدىڭ جاعدايىمىزدى ءتۇسىنىپ، بيىل گاز وتكىزىپ جاتىر. راحمەت!»، – دەپ ريزاشىلىعىن ءبىلدىردى تۇرعىن شاعيپا تولەندينوۆا.

«كومىر جاققان وڭاي دەيسىڭ بە، بالام؟ ۇيدە كەلىنىم وت جاعادى. ءوزىم اۋىر ەشتەڭە كوتەرە المايمىن. ەندى گاز قوسىلسا، كومىر جاعىپ، قينالىپ جۇرمەيتىن بولدىق. قۇدايعا ءتاۋبا دەپ قۋانىپ وتىرمىز»، – دەيدى تاعى تۇرعىن گۇلنار تىلەۋبايەۆا قۋانىشىمەن ءبولىسىپ.

المەرەك ىقشاماۋدانىندا گازداندىرۋ جۇمىسى شىلدە ايىنىڭ باسىندا باستالعان. كۇن سۋىتسا مازاسى قاشاتىن جۇرت جىلىتۋ ماۋسىمى باستالعانشا تابيعي گازبەن قامتىلاتىن بولادى. ىقشاماۋدان تۇرعىندارى گاز جۇرگىزەتىن كومپانياعا ناۋرىز ايىندا جۇگىنىپتى. بۇگىندە 600 ۇيمەن كەلىسىم-شارت جاسالعان. وعان قوسا، مۇگەدەك جانە زەينەتكەر ازاماتتاردىڭ قوسىلۋىنا جەڭىلدىكتەر قاراستىرىلعان.

«ءبارى 150 مىڭ تەڭگە تۇرادى. ونىڭ ىشىنە ءبارى كىرەدى. مۇگەدەكتەر مەن زەينەتكەرلەردى جەكە قارايمىز. كومەگىمىز بار. ءبىر جىلدىق ءبولىپ تولەۋ مەرزىمى بار»، – دەدى مەردىگەر كومپانيانىڭ باس ديرەكتورى جادىراسىن باكەن.

«ەندى گاز قوسىلماعان 385 ءۇي قالدى. ءبىراق ول جاققا دا گاز تارتىلىپ قالار. ءقازىر قازان ايىن كۇتپىپ جاتپاي-اق، مەردىگەر كومپانيامەن سويلەسىپ جاتىرمىز، ولار دا تاعى دا قوسىمشا ادامدار قوسىپ، جۇمىستى ارى قاراي جالعاستىرادى»، – دەدى الماتى قالاسى تۇركسىب اۋدانى كوممۋنالدىق شارۋاشىلىق ءبولىمىنىڭ باسشىسى ايدوس بەكەتايەۆ.

تۇركسىب اۋدانىندا جالپى، 25 مىڭعا جۋىق جەكە تۇرعىن ءۇي بار. سونىڭ 98 پايىزى گازبەن قامتىلعان. جىل اياعىنا دەيىن تۇركسىب اۋدانى تولىعىمەن گازداندىرىلادى.