الماتىلىق زەينەتكەرلەر ارنايى ورتالىقتا ۇزاق ءومىر ءسۇرۋدىڭ قىر-سىرىن ۇيرەنەدى.
الماتىدا قارتتاردىڭ دەنساۋلىعىن وڭالتاتىن ورتالىق اشىلدى. وندا قانت ديابەتىمەن سىرقاتتانعان جانە ەستە ساقتاۋ قابىلەتى بۇزىلعان زەينەتكەرلەرگە ەم جاسالادى. ءتورت مەزگىل تەگىن تاماق تاراتىلىپ، زەينەتتە زەرىككەن قاريالارعا بارلىق جاعداي جاسالادى. تەك كۇندىز عانا جۇمىس ىستەيتىن ساۋىقتىرۋ مەكەمەسىنە جولداما الۋ ءۇشىن قانداي قۇجاتتار قاجەت؟
زەينەتتەن سوڭ زەرىگىپ، قوعامنان بولىنە باستاعان قامكوڭىل قاريالارعا قولداۋ كورسەتۋ ءۇشىن قالادا تاعى ءبىر ەرەكشە ورتالىق ىسكە قوسىلدى. «ۇزاق ءومىر ءسۇرۋ» جوباسى اياسىندا اشىلعان مەكەمەدە قانت ديابەتىنىڭ ەكىنشى تۇرىمەن اۋىراتىن جانە ەستە ساقتاۋ قابىلەتى بۇزىلعان قارتتارعا ەم كورسەتىلەدى. ەگدە جاستاعى ادامدار بوبەكجايعا كەلگەن بالالارداي، كۇندە تاڭعى ساعات 9-دان تۇسكى 3-كە دەيىن وسى ورتالىقتا ۋاقىتتارىن وتكىزەدى. ولار ءتۇرلى ەمدىك جاتتىعۋلار جاساپ، دارىگەرلەر مەن پسيحولوگتاردىڭ كومەگىنە جۇگىنە الادى. ال زەرىككىسى كەلمەيتىندەر دەگەندەرى ءان سالىپ، قولونەرمەن شۇعىلدانادى.
«ورتالىقتى ءوزىمىزدىڭ ەمحانادان ەستىدىم. ولار ماعان جولداما بەردى، جولدامانى ورتالىققا وتكىزدىم. ورتالىق 5 كۇننەن كەيىن وسى جەردەن «ءسىزدىڭ قۇجاتتارىڭىز ءتۇستى، بىزگە قابىلداۋعا كەلىڭىز» قوڭىراۋ شالدى. وسى ورتالىققا كەلگەلى بەرى سالماعىم دا بۇرىنعى مولشەرىنە كەلىپ جاتىر. ۇيقىم جاقسى، قان قىسىمىم تۇسە باستادى»، – دەيدى زەينەتكەر قانات تىلەۋجانوۆ.
«بۇل جەردە ءۇيدىڭ شارۋاسىنان، بالا-شاعادان، قازان-اياقتان ازداپ قولىڭ بوسايدى. مۇندا قاتارلاستارىمىزبەن كوڭىل ءبولىسىپ، اڭگىمە ايتىسىپ، جاستىق شاقتى ەسكە الىسامىز. بۇل جەردە ديەتامەن دە ەمدەلۋگە بولادى. دەنساۋلىعىم جاقساردى، قان قىسىمىم كوتەرىلمەيدى، ءدارى ىشپەيمىن.زەينەتكەر ءوز دەنساۋلىعىن وڭالتۋدى ۇيرەنەدى»، – دەيدى جاقسىگۇل بەرتاگينا.
قارتتار ورتالىققا كەلىپ، وڭالعانى ءۇشىن قالتالارىنان ءبىر تيىن دا تولەمەيدى. ولاردى ۇيلەرىنەن تاسىمالداۋ ءۇشىن كولىك تە قاراستىرىلعان. ەرەكشە كۇتىمدى قاجەت ەتەتىن سىرقاتپەن اۋىراتىندىقتان، كەلۋشىلەرگە 4 رەت ديەتالىق تاماق بەرىلەدى. زەينەتكەرلەردى كۇندىز قابىلداۋ ورتالىعىندا 56 ادامعا ورىن قاراستىرىلعان. مۇندا قارتتاردىڭ قاس-قاباعىنا قاراپ، بار جاعدايىن جاسايتىن 17 قىزمەتكەر بار. ساۋىقتىرۋ مەكەمەسىنە الماتىدا تۇراقتى تىركەۋى بار زەينەتكەرلەر كەلە الادى. ول ءۇشىن حالىققا قىزمەت كورسەتۋ ورتالىعىنا ءتيىستى قۇجات تاپسىرۋى شارت.
«ءوزىنىڭ تۇرعىلىقتى مەكەن-جايى بويىنشا قىزمەت كورسەتۋ ورتالىقتارىنا بارىپ، زەينەتكەرلىك كۋالىگى، مەديسينالىق كۋالىگى سياقتى قۇجاتتارىن تاپسىرۋى كەرەك. سول قۇجاتتاردى تاپسىرعاننان كەيىن، ولاردى قىزمەت كورسەتۋ ورتالىعى الەۋمەتتىك باسقارماعا جىبەرەدى. ال ولار ءوز كەزەگىندە، قولىنا جولداما بەرىلگەن زەينەتكەرلەردى بىزگە جىبەرەدى»، – دەدى الماتى قالاسى زەينەت جاسىنداعى تۇلعالاردى كۇندىز قابىلداۋ ورتالىعىنىڭ جەتەكشىسى اينۇر ەشمانوۆا.
وڭالتۋ ورتالىعىنا زەينەتكەرلەر 2 ايدان ارتىق كەلە المايدى. ويتكەنى، ءوتىنىش بەرگەن وزگە قارتتار ۇزاق كەزەك كۇتىپ قالماۋى ءتيىس. الماتى قالاسىندا باستاۋ العان تىڭ جوبانىڭ جۇمىسىمەن بۇگىن ءماجىلىس دەپۋتاتتارى دا تانىستى. حالىق قالاۋلىلارى ساۋىقتىرۋ مەكەمەسىنىڭ ءتيىمدى ەكەنىن ايتىپ، بولاشاقتا ولاردىڭ سانىن وزگە وڭىردە دە كوبەيتۋ قاجەتتىگىن العا تارتتى.
«بيىل وسى باعدارلامانى ىسكە اسىرۋ ءۇشىن 160 ميلليون تەڭگەگە جۋىق قارجى ءبولىندى. ول 222 مىڭ ادام ءۇشىن اسا كوپ اقشا ەمەس دەپ ويلايمىز. سونىڭ ىشىندە، 26 ملن تەڭگە وسى ورتالىقتى ىسكە اسىرۋ ءۇشىن بولىنگەن. ياعني، ادام باسىنا كۇنىنە 3200 تەڭگە بولىنەدى. ونىڭ ىشىنە وسى جالعا الۋ عيماراتتى، قىزمەتكەرلەردىڭ ەڭبەكاقى، زەينەتكەرلەردى ۇيلەرىنەن الىپ كەتىپ، قايتىپ اپارۋ، ياعني تاسۋ جۇمىسى كىرەدى»، – دەدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى مەيىرجان وتىنشييەۆ.
بۇگىندە الماتىدا زەينەت جاسىندا 222 مىڭ ادام بولسا، ولاردىڭ ءومىر ءسۇرۋ ۇزاقتىعى تەك 12 پايىزدى قۇراپ وتىر ەكەن. سوندىقتان قارتتاردىڭ ۇزاق جاساۋىنا جاعداي جاساۋ بارىنشا قولعا الىنباق. وسىنداي وڭالتۋ ورتالىقتارىن قالانىڭ وزگە اۋداندارىندا اشۋ جوسپاردا بار.
