ءداۋىر كوشتى...
تۇندە سۋىت حابار الدىق. سويلەپ كەتسە - شەشەن، كوش باستاسا - كوسەم، پاراساتتىلىقتىقتىڭ، دەگدارلىقتىقتىڭ ەتالونىنداي بولعان اقىلمان اقساقال، قوعام جانە مەملەكەت قايراتكەرى سەيىلبەك شاۋحامانوۆ كوكەمىزدىڭ جارىق دۇنيەدەگى ءناسىپتى كۇنى تاۋسىلىپتى. تۇتاس ءبىر ءداۋىر كوشىپ كەتكەندەي اسەردە وتىرمىز.
قاي دۇنيەنى بولماسىن اقىل پاراساتتىلىعى تۇرعىسىنان قاراپ، ءاربىر ىستە ۇلتتىڭ ۇپايىن تۇگەندەپ، ۇرپاق بولاشاعى ءۇشىن الاڭداپ، قازاقى قالىپىمىزدىڭ ساقتالۋىنا اسا ءمان بەرىپ، مەملەكەت دامۋىنىڭ مازمۇنىن ۇدايى نازارىندا ۇستاپ وتىراتىن داناگوي دانىشپانىمىز ەدى.
ءبىز سەيىلبەك شاۋحامانوۆتى ەس بىلگەننەن بىلەدى ەكەنبىز. ول كىسى شيەلى اۋدانىنىڭ ءبىرىنشى حاتشىسى بولعان. ءبىزدىڭ كوكەم ەڭبەكشىدە فەرما مەڭگەرۋشىسى. تاۋدىڭ ويلى-قىرلى جولىمەن شوپانداردى ارالاپ، سىردىڭ قۇم باسقان سوقپاعىندا مالشىلاردىڭ جاعدايىن جاساپ، كۇزدەۋگە كوشسە سوندا بارىپ، كوكتەۋدە وتىرسا، باسىندا ءجۇرىپ، قوي تولدەسە بىرگە بولىپ، قىرقىمدا تىرلىكتى قاداعالاپ، ءشوپ-سۋىن تۇگەندەپ تىنىم تاپپايتىن كوكەم ءبىزدىڭ ءتىلىمىز شىعىپ، اياعىمىز جۇرە باستاعاننان قاسىنا ەرتىپ الادى ەكەن. ۇزاق جولدا ءىش پىسادى، ونىڭ ۇستىنە بالانىڭ بىلدىرى جان سەرگىتەدى عوي. سوندا كوكەم "ەرجان مىنا جولدى كىم جوندەۋى كەرەك؟" دەپ سۇرايدى ەكەن. ءبىز "شاۋحامانوۆ" دەپ تاق ەتە قالامىز. و كەزدە شاۋحامانوۆتىڭ ناقتى كىم ەكەنىن بىلمەيمىز عوي. ءبىراق اتىن ايتىپ وستىك. كوكەم ءتۇرلى مىسالعا جاۋاپتى كىم دەگەندە ءبىز سەيىلبەك اقساقالدىڭ اتىن اتايتىن ەدىك. كەيىن وسى جاعدايدى وزىنە ايتتىق. وزىنە ءتان كۇلكىسىنە سالىپ "بايەكەڭ بىربەتكەي، ىسكەر، ەلدىڭ جايىن بىلەتىن، جۇرتىنا ەس بولعان ازامات ەدى عوي" دەدى. ءىشىمىز جىلىپ سالا بەردى.
جازعان-سىزعانىمىزدى ۇنەمى وقىپ، كەزدەسكەن جەردە پىكىرىن ايتىپ، ويىن ءبىلدىرىپ وتىراتىن. اراسىندا "شاۋحامانوۆ قوي" دەپ تەلەفون سوعىپ، ءوزى جازعان دۇنيەلەردى گازەتكە ۇسىناتىن. وقىساڭىز، تۇنىپ تۇرعان تاربيە مەن ءتالىم ەدى. "ارتىق-كەمى بولسا، ءوزىڭ قارارسىڭ" دەيتىن سىپايى عانا. قايداعى؟ بالتالاساڭ بۇزىلمايتىن قۇرمالاس سويلەمدەردىڭ ءار ءسوزى ءوز ورنىندا قولمەن قالاعانداي تۇرۋشى ەدى. ءبىر ارپىنە قالام تيگىزە المايسىڭ. اناۋ-مىناۋ جازۋشى و كىسىنىڭ دەڭگەيىندە جازا المايتىن.
سەيىلبەك اقساقال وبلىستى ەڭ ءبىر قيىن زاماندا باسقاردى. ءبىراق ەلدى داۋعا قالدىرماي، نارىقتىڭ داۋىلى مەن جاۋىنىنا بارىنشا ۇرىندىرماي الىپ شىقتى. ۋاي، دۇنيە-اي، سويتكەن سەيىلبەك كوكەمىز دە كوشىپتى ومىردەن.
قىزمەت اۋىستىرعان كەزىمىزدە بەكەجانوۆ تەاترىندا كەزدەسىپ قالدىق. "ەرجان-اۋ، اسپاندى جەردەن ءبىر-اق شىعاردىڭ عوي" دەدى. "نەگە كوكە؟" دەيمىز كۇلىپ. "انا زاماندا دا، مىنا زاماندا دا گازەتتىڭ سوبكوررلىعىنان پارتيانىڭ حاتشىلىعىنا بارعان ادام جوق" دەپ جىميدى. سوسىن جاس كەزىمىزدە بارلىق جۇمىستى كورىپ، ءبىراق قالامعا بەرىك بولۋدى تاپسىرىپ ەدى. كەيىننەن شىمكەنتتە سالقام جاڭگىر حان مەن ءجالاڭتوس باھادۇرگە ەسكەرتكىش اشىلىپ، قىزىلوردالىق اقساقالداردان قۇرالعان دەلەگاسيانى باستاپ باردىق. جولى بويى كوكەلەرىمىزدىڭ بار جاعدايىن جاساپ، قولقانات بولۋعا تىرىستىق. اۋىلعا قايتىپ كەلگەندە رياسىز العىسىن ايتىپ، باتاسىن بەرىپ، "جۋرناليستيكادان مەملەكەتتىڭ ىسىنە دايىن كەلگەن ەكەنسىڭ" دەگەن ءىلتيپاتتى ءسوزىن بۇكپەسىز ايتىپ ەدى. ىلعي تىلەۋلەستىگىن جاسىرماي، مەيىرىمى مەن جىلىلىعىن توگىپ وتىراتىن. سويتكەن سەيىلبەك شاۋحامانوۆ تا توقساننىڭ تابالدىرىعىندا تۇرىپ كەلمەستىڭ كەمەسىنە ءمىنىپ كەتە بارىپتى. قوش بولىڭىز، كوكە! الدىڭىز جارىق، يمانىڭىز كامىل، توپىراعىڭىز تورقا، ورنىڭىز جۇماقتان بولسىن!
