اتىراۋ اۋەجايىندا FlyArystan ۇشاعى قونعاننان كەيىن رۋلدەۋ جولىنان شىعىپ كەتتى. بورتتاعى 166 جولاۋشىنىڭ ەشقايسىسى زارداپ شەككەن جوق.
نە بولدى؟
وقيعا 14 قاڭتاردا بولدى. FlyArystan كومپانياسىنىڭ FS7202 رەيسى الماتىدان اتىراۋعا ۇشتى. ۇشاق قونعان سوڭ ۇشۋ-قونۋ جولاعىن بوساتتى دا، تۇراققا بەت العان كەزدە تومەن جىلدامدىقپەن رۋلدەۋ جولىنىڭ شەتىنەن شىعىپ كەتتى. جولاۋشىلاردى ەكيپاج بورتتان ءتۇسىردى، جاراقات الۋشىلار تىركەلگەن جوق.
كومپانيا نە دەدى؟
اۆياكومپانيا ۇشاقتىڭ رۋلدەۋ كەزىندە جولدان سىرتقا تومەن جىلدامدىقپەن شىعىپ كەتكەنىن حابارلادى. كومپانيا جاعدايدى اۋەجاي قىزمەتتەرىمەن جانە اۆياسيالىق ورگاندارمەن بىرگە تەكسەرىپ جاتىر.
بورتتاعى ادامداردىڭ قاۋىپسىزدىگىن قامتاماسىز ەتۋ بويىنشا شتاتتىق راسىمدەر اتقارىلدى، جولاۋشىلار امان-ەسەن ءتۇسىرىلدى.
بۇل تۋرالى Qamshy.kz اقپارات اگەنتتىگى حابارلايدى.
