«ازاماتتارعا ارنالعان ۇكىمەت» مەملەكەتتىك كورپوراسياسى ق ر ىىم-مەن بىرلەسىپ، الماتى قالاسىندا ميگراسيالىق حالىققا قىزمەت كورسەتۋ ورتالىعىن (محقو) اشتى.

ايتا كەتۋ كەرەك، شەتەلدىك جۇمىسشىلارى كوپ وڭتۇستىك استانادا بيىلعى جىلدىڭ باسىنان بەرى ميگراسيا باعىتى بويىنشا  50 مىڭنان اسا قىزمەت كورسەتىلگەن. ەندى ەڭبەك ميگرانتتارى مەملەكەتتىك قىزمەتتەردى حالىققا قىزمەت كورسەتۋ ورتالىقتارىنىڭ ستاندارتىنا ساي «ءبىر تەرەزە» قاعيداتى بويىنشا الا الادى.

بۇل ەلىمىزدەگى كوشى-قون قىزمەتتەرىن كورسەتەتىن  ءۇشىنشى ورتالىق، العاشقىسى وسى جىلدىڭ باسىندا استانادا، ەكىنشىسى شىلدە ايىندا شىمكەنتتە  اشىلعان بولاتىن.

بۇرىن شەتەلدىكتەر جۇمىس ىستەۋگە رۇقسات الۋ ءۇشىن قاجەتتى قۇجاتتارىن راسىمدەپ، بىرنەشە كۇن جۇرەتىن. جسن الىپ، سالىق ماسەلەسىن شەشىپ، مەديسينالىق تەكسەرىستەن، داكتيلوسكوپيادان ءوتىپ، ساقتاندىرۋ انىقتاماسىنا قول جەتكىزۋ ءۇشىن بىرنەشە مەكەمەنى ارالاۋعا ءماجبۇر ەدى. ەندى شەتەلدىكتەر قۇجاتتاردى ءبىر جەردە، ءبىر ساعاتتىڭ ىشىندە راسىمدەۋ مۇمكىندىگىنە يە بولدى.

 «محقو-دا شەتەلدىك ازاماتتار مەملەكەتتىك قىزمەتتەردى بەلگىلەنگەن ۋاقىت ىشىندە رەگلامەنتكە ساي بيزنەس ءۇردىس جانە ەلەكتروندىق كەزەك ارقىلى ارنايى جابدىقتالعان جۇمىس ورىندارىندا الا الادى. بۇل ميگرانتتار ءۇشىن عانا ەمەس، جۇمىس بەرۋشى ءۇشىن دە وتە قولايلى. جاڭا محقو جۇمىس بارىسىن جەڭىلدەتىپ قانا قويماي، سىبايلاس جەمقورلىق ارەكەتتەرىنىڭ الدىن-الۋعا جول اشادى.»، – دەيدى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ الماتى قالاسى بويىنشا فيليالىنىڭ ديرەكتورى عالىم قارقىنبايەۆ.

جاڭا فرونت-وفيس الماتى قالاسىنداعى العاباس-1 ىقشاماۋدانى، «اتلەتيكالىق قالاشىق»،  5/22 ءۇي مەكەنجايىندا، كولەمى 576 شارشى مەتردى قۇرايتىن، زاماناۋي عيماراتتىڭ ەكىنشى قاباتىندا ورنالاسقان. ورتالىقتا مەملەكەتتىك كورپوراسيانىڭ 31 مامانى تاڭعى ساعات 09.00-دەن كەشكى ساعات 18.30-عا دەيىن، تۇسكى ءۇزىلىسسىز، كۇنىنە شامامەن 1،5 مىڭداي ازاماتقا قىزمەت كورسەتەدى.