اقتوبە فەرروقورىتپا زاۋىتى — حيميالىق تاسىلدەرمەن ساپالى، اسا بەرىك شويىن وندىرۋگە قاجەتتى فەرروقوسپالار شىعارۋعا مامانداندىرىلعان مەتاللۋرگيالىق كاسىپورىن. مۇندا ەلىمىز بويىنشا تۇڭعىش رەت مەتالل حروم مەن كومىرتەگىنسىز فەرروحروم ءوندىرىسىنىڭ تەحنولوگياسى يگەرىلگەن بولاتىن. اقتوبە فەرروقورىتپا زاۋىتىنىڭ 75 جىلدىق تويىندا زاۋىتتىڭ ءبىرقاتار قىزمەتكەرلەرى باسپانالى بولدى.
باتىس-2 شاعىن اۋدانىندا سالىنعان 90 پاتەرلىك جاڭا ءۇي كاسىپورىننىڭ جاس جانە بىلىكتى ماماندارىنا بۇيىردى. سالتاناتتى شاراعا وبلىس اكىمى بەردىبەك ساپاربايەۆ، ەۋرازيالىق توپتىڭ باسقارما ءتوراعاسى سەرىك شاحاجانوۆ، «قازحروم» ترانسۇلتتىق كومپانياسى» اكسيونەرلىك قوعامىنىڭ پرەزيدەنتى ارمان ەسەنجولوۆ قاتىسىپ، قونىستوي يەلەرىن قۇتتىقتادى. — ءار ادام ءۇشىن باسپانانىڭ بولۋى اسا ماڭىزدى. مەملەكەت باسشىسى نۇرسۇلتان نازاربايەۆتىڭ ساياساتىنىڭ نەگىزگى باعىتى دا وسى— قازاقستان تۇرعىندارىنىڭ تۇرمىس-تىرشىلىگىنىڭ جاقسى بولۋى، باسپانامەن قامتاماسىز ەتىلۋى. وسى باعىتتا ەلىمىزدە «نۇرلى جول»، «نۇرلى جەر» سەكىلدى بىرنەشە باعدارلاما جۇزەگە اسىرىلىپ جاتىر. ERG كومپانياسى تاراپىنان 15 جىلدا ءوز قىزمەتكەرلەرىنە ارناپ 12 ءۇي بەرىلدى. سوڭعى ەكى اپتانىڭ ىشىندە اقتوبە وبلىسىنىڭ وزىندە ەكىنشى ءۇي بەرىلىپ وتىر. ونىڭ ءبىرى 4 شىلدە كۇنى حرومتاۋ قالاسىنداعى ءدوڭ تاۋ-كەن بايىتۋ كومبيناتىنىڭ جۇمىسشىلارىنا بەرىلسە، ەكىنشىسى، مىنە، اقتوبە فەرروقورىتپا زاۋىتىنىڭ 75 جىلدىعى قارساڭىندا اتالعان زاۋىت جۇمىسشىلارىنا بەرىلىپ وتىر. اقتوبە فەرروقورىتپا زاۋىتىنىڭ وبلىس ەكونوميكاسىنىڭ دامۋىندا ماڭىزى زور. كاسىپورىن ءوز كادرلارىنا بارىنشا جاعداي جاساپ وتىر، بۇل كاسىبي بىلىكتى مامانداردىڭ باسقا وندىرىستەرگە كەتىپ قالماۋىنا، تۇراقتى جۇمىس ىستەۋىنە، ەرتەڭىنە سەنىممەن قاراۋىنا سەپتىگىن تيگىزەدى، — دەدى وبلىس اكىمى ب.ساپاربايەۆ. جاڭا تۇرعىن ۇيدەگى ءبىر شارشى مەتردىڭ قۇنى شامامەن 110 مىڭ تەڭگە. ەۋرازيالىق توپتىڭ تۇرعىن ءۇي باعدارلاماسى بويىنشا پاتەرلەردى 20 جىلعا دەيىن تومەن پايىزدىق مولشەرلەمەمەن ساتىپ الۋ قۇقىعىمەن جالعا بەرۋ قاراستىرىلعان. بۇل ءىس-شارا ەلباسىنىڭ «نۇرلى جەر» باعدارلاماسى اياسىندا قازاقستان يپوتەكالىق كومپانيامەن اراداعى كەلىسىمگە سايكەس جۇزەگە اسىرىلدى. تۇرعىن ءۇيدى راسىمدەۋ «2020 جىلعا دەيىنگى وڭىرلەردى دامىتۋ مەملەكەتتىك باعدارلاماسى» بويىنشا جۇرگىزىلەدى. سالتاناتتى مەرەكە بارىسىندا مەتاللۋرگتەردى ەۋرازيالىق توپتىڭ باسقارما ءتوراعاسى سەرىك شاحاجانوۆ، «قازحروم» ترانسۇلتتىق كومپانياسى» اكسيونەرلىك قوعامىنىڭ پرەزيدەنتى ارمان ەسەنجولوۆتار دا قۇتتىقتادى.
ايتا كەتۋ كەرەك، بۇل اقتوبە قالاسىندا فەرروقورىتپا زاۋىتىنىڭ جۇمىسشىلارى مەن باسقارما اپپاراتىنا ەۋرازيالىق توپتىڭ تۇرعىن ءۇي باعدارلاماسىن ىسكە اسىرۋ شەڭبەرىندە بەرىلىپ وتىرعان ءۇشىنشى ءۇي. 2006 جىلدان باستاپ اتالعان باعدارلاما اياسىندا اقتوبە قالاسىندا اقتوبە فەرروقورىتپا زاۋىتى مەن «قازحروم» ترانسۇلتتىق كومپانياسى» اكسيونەرلىك قوعامىنىڭ 264 جۇمىسشىسى باسپانالى بولدى.
بۇدان سوڭ اقتوبە وبلىسىنىڭ اكىمى بەردىبەك ساپاربايەۆ، ەۋرازيالىق توپ پەن «قازحروم» باسشىلىعى تۇڭعىش پرەزيدەنت اتىنداعى ساياباقتا وتكىزىلگەن مەرەكەلىك ءىس-شاراعا قاتىستى. بۇل سالتاناتتى شاراعا كاسىپورىننىڭ بۇرىنعى ديرەكتورلارى، زاۋىت ارداگەرلەرى مەن جۇمىسشىلارى شاقىرىلعان.
