5 قىركۇيەكتە الماتى قالاسىندا حابار ارناسىنىڭ تاپسىرىسى بويىنشا تۇسىرىلگەن «تاعى دا ءسۇي» تەلەسەريالىنىڭ الدىن الا كورسەتىلىمى ءوتتى دەپ جازادى Qamshy.kz اقپارات اگەنتتىگى.   اتالعان شاراعا جاس اكتەرلارمەن قاتار بلوگەرلەر، ونەر يەلەرى قاتىستى. بۇل كينوكارتينانىڭ رەجيسسەرى وسىعان دەيىن «قاريا» تۋىندىسىن حالىققا ۇسىنعان اسحات مۇساباي.

«تەلەسەريالداعى باستى كەيىپكەر 2 جىل بويى عاشىعىن ۇمىتا الماي جۇرگەن كەزدە تاعى دا ءبىر قىزدى ۇناتىپ قالادى. قازىرگى جاستار تۇرىكتىڭ، كارىستىڭ سەريالدارىن كورگەندى جاقسى كورەدى. سول سەريالداردىڭ فارماتىنا جاقىنداۋ، ءبىراق ءوزىمىزدىڭ قازاقي ناقىشىمىزعا كەلتىرىپ تۇسىرۋگە تىرىستىق. جاستاردىڭ كوڭىلىنەن شىعادى دەپ ويلايمىز. ءتۇسىرىلىم جالپى 40 كۇنگە سوزىلدى. ال كاستينگ 2 ايعا سوزىلدى، اكتەرلەر قازاقستاننىڭ ءتۇرلى وڭىرىنەن جينالدى. باستى رولدەگى نۇرسىۋلە اۋباكىروۆا استانا قالاسىنان كەلسە، باستى رولدەگى شالقار قۇدايبەرگەن الماتى قالاسىنىڭ تۋماسى. تەلەسەريالدا بەلگىلى اكتەرلاردىڭ قاتارىندا ءادىلجان شونبانوۆ، ايزادا ساتىبالدييەۆا، زارينا وماروۆا، بولات ءابدىلمانوۆ بار. تەلەسەريال 12 بولىمنەن تۇرادى. حابار ارناسىنان 10 قىركۇيەكتەن باستاپ كورە الاسىزدار»، دەيدى تەلەسەريالدىڭ رەجيسسەرى اسحات مۇساباي.

اتالمىش شارادا تەلەسەريالدىڭ العاشقى 3 ءبولىمنىڭ قىسقارتىلعان نۇسقاسى كورسەتىلدى. تەلەسەريالداعى باستى كەيىپكەر ايان سىمباتتى، ءبىلىمدى جىگىت. ال ونىڭ اكەسى جارناما اگەنتتىگىنىڭ باسشىسى، اناسى فلوريست. اياننىڭ سۇيگەن قىزى اسىل 2 جىل بۇرىن جول اپاتىنان قايتىس بولىپ، باستى كەيىپكەر كۇيزەلىسكە ۇشىرايدى. ۋاقىت وتە كەلە ول اسىلدى ۇمىتقانداي بولادى. كەيىن مەرەي ەسىمدى ءوزىنىڭ قىزمەتكەرىنە عاشىق بولىپ، ونىمەن باس قوسادى. الايدا ايان اسىلدى قايتا جولىقتىرىپ، وقيعا شيەلەنىسە تۇسەدى. 

«حابار اگەنتتىگى» اق باسقارما ءتوراعاسىنىڭ ورىنباسارى رينات دۋمان ۇلى كەرتايەۆتىڭ ايتۋى بويىنشا، بۇل تەلەسەريال وتباسىمەن بىرگە قىسىلماي وتىرىپ كورۋگە ارنالعان. قازىرگى وتاندىق تەلەسەريالدار مەن فيلمدەردىڭ كوپشىلىگى زاماننىڭ اعىمىنا ەرىپ، قازاقتىڭ تابيعاتىنا جات تۇرعىدا ءتۇسىرىلىپ جاتقاندا وتباسىمەن بىرگە وتىرىپ قىسىلماي كورۋگە بولاتىن تەلەسەريالدىڭ كوبەيۋى قۋانتارلىق جايت. «تاعى دا ءسۇي» تەلەسەريالى كورەيالىق سەريالداردىڭ قازاقشا نۇسقاسى دەپ اتاۋعا دا بولادى. سەبەبى ءازىل ارالاس جاستارعا ارنالعان جەڭىل تەلەسەريال.

"تاعى دا ءسۇي" تەلەسەريالىن «حابار» تەلەارناسىنان 10 قىركۇيەكتەن باستاپ دۇيسەنبى-بەيسەنبى ارالىعىندا ساعات 22:20-دا كورە الاسىزدار.