سەنات ءتوراعاسى ساتبايەۆ پەن شورناقتاعى وقيعاعا قاتىستى پىكىر ءبىلدىردى. بۇل جونىندە ول facebook-تەگى پاراقشاسىنا جازدى.

"ساتبايەۆتاعى جاعدايعا قاتىستى قوعامنىڭ نارازىلىعى ورىندى. راسىمەن، بۇل وقيعا ءبارىمىزدىڭ جۇرەگىمىزدى اۋىرتىپ، جانىمىزدى جابىرقاتتى. بارلىق اتا-انالاردىڭ اشۋى مەن ىزاسى دا تۇسىنىكتى. دەگەنمەن، وسىنداي قىلمىسكەرلەردى جازالاۋ زاڭ نەگىزىندە جۇرگىزىلۋى كەرەك. بۇلدىرشىنگە زورلىق-زومبىلىق كورسەتكەندەر زاڭ الدىندا قاتاڭ جاۋاپ بەرەدى. ول – اقيقات نارسە. ەشكىمنىڭ بۇعان كۇمانى بولماۋى كەرەك"، – دەلىنگەن سەنات سپيكەرىنىڭ جازباسىندا.

سونىمەن قاتار ماۋلەن اشىمبايەۆ زورلىق-زومبىلىق كورسەتكەندەردى اۋىر جازا كۇتىپ تۇرعانىنا نازار اۋدارعان.

"بىلتىر مەملەكەت باسشىسى حالىققا جولداۋىندا بالا قۇقىعىن قورعاۋ ماسەلەسىنە ايرىقشا نازار اۋدارىپ، ولارعا قاتىستى جاسالاتىن قىلمىستارعا جازانى كۇشەيتۋ تۋرالى تاپسىرما بەرگەن بولاتىن. سوعان بايلانىستى پارلامەنت قىلمىستىق كودەكسكە ىرگەلى وزگەرىستەر ەنگىزدى. بۇگىندە بۇلدىرشىندەرگە قاتىستى جاسالعان زورلىق-زومبىلىق فاكتىسى بويىنشا قىلمىسكەر جيىرما جىلعا نەمەسە ءومىر بويىنا باس بوستاندىعىنان ايىرىلۋى مۇمكىن.

سونىمەن قاتار، زورلىق-زومبىلىق ارەكەتى ورتا ساناتتان اۋىر دارەجەلى قىلمىس تۇرىنە وزگەرتىلدى. مۇنداي جاعدايدا تاراپتار تاتۋلاسا المايدى. بۇرىنعى تاجىريبەدە تاراپتاردىڭ ءوزارا تاتۋلاسۋىنىڭ ناتيجەسىندە تالاي ادامنىڭ قىلمىستان جالتارىپ كەتكەنى بەلگىلى. ەندى ونداي ولقىلىققا جول جوق.

جاڭا زاڭ نورمالارىنا سايكەس مۇنداي قىلمىس جاساعاندار تۇرمەدەن مەرزىمىنەن بۇرىن بوساپ تا شىعا المايدى، راقىمشىلىققا دا ىلىنبەيدى. سوندىقتان قولدانىستاعى زاڭناما بويىنشا قىلمىسكەرلەردى بۇلتارتپاس اۋىر جازا كۇتىپ تۇر"، – دەپ جازعان سەنات ءتوراعاسى.

سونداي-اق، ول تۇركىستان وبلىسىنىڭ شورناق اۋىلىنداعى جاعدايعا نازار اۋدارىپ، وسى وقيعانى ەتنوسارالىق جانجالعا اينالدىرعىسى كەلەتىندەردىڭ جەلىلەردە جالعان اقپاراتتار تاراتىپ جۇرگەنىن اتاپ وتكەن.