قارجى مينيسترلىگى وندىرىستىك ەمەس تولەمدەردى جانە ارنايى سالىقتىق رەجيمدەردى اكىمشىلەندىرۋ دەپارتامەنتى ديرەكتورىنىڭ مىندەتىن اتقارۋشى داۋلەت جارىلعاسىنوۆ قازاقستان اۋماعىنا ارمەنيادان اكەلىنگەن اۆتوكولىك سالىعىن تولەۋ راسىمىنە قاتىستى ازاماتتاردىڭ سۇراقتارىنا جاۋاپ بەردى.
ونىڭ سوزىنشە، «ارمەنيا رەسپۋبليكاسىندا تىركەلگەن جەكەلەگەن كولىك قۇرالدارىن قازاقستان رەسپۋبليكاسىنا اكەلۋدىڭ جانە پايدالانۋدىڭ كەيبىر ماسەلەلەرى تۋرالى» قازاقستان رەسپۋبليكاسى ۇكىمەتىنىڭ 2020 جىلعى 20 مامىرداعى №306 قاۋلىسىنا سايكەس باسقارۋى سول جاقتا ورنالاسقان كولىگى بار قازاقستاندىقتارعا ارمەنيانىڭ ۋاكىلەتتى ورگاندارىندا تىركەلگەن جانە 2020 جىلعى 1 اقپانعا دەيىن قازاقستانعا اكەلىنگەن كولىكتەر مەملەكەتتىك تىركەۋ ءۇشىن الىم جانە مەملەكەتتىك باج تولەي وتىرىپ، زاڭنامادا بەلگىلەنگەن تارتىپپەن تىركەلەدى.
قارجى مينيسترلىگى وكىلىنىڭ ايتۋىنشا، كولىك قۇرالىن تىركەگەن جاعدايدا كەدەندىك تولەمدەردى، مەحانيكالىق كولىك قۇرالدارىن العاشقى تىركەۋ ءۇشىن الىمدى جانە كادەگە جاراتۋ الىمىن تولەۋ قاجەت ەمەس.
– قازاقستان اۋماعىندا تىركەلگەن ساتتەن باستاپ اۆتوكولىككە سالىق تولەنەدى. سەبەبى سالىق زاڭناماسىنا سايكەس جەكەمەنشىك قۇقىعى بار جەكە تۇلعالار كولىك سالىعىن تولەۋشىلەر بولىپ تابىلادى، بۇل رەتتە سالىق سالۋ وبەكتىلەرىنە قر-دا تىركەلگەن جانە (نەمەسە) ەسەپتە تۇرعان اۆتوكولىك قۇرالدارى جاتادى، – دەپ قورىتتى د.جارىلعاسىنوۆ.
پىكىر قالدىرۋ