قوعام بەلسەندىسى بولعان مارقۇم دۋلات ءاعادىلدىڭ اناسى پرەزيدەنت قاسىم-جومارت توقايەۆقا ۆيدەوۇندەۋ جولدادى. گۇلباراش جولمۇحامبەتوۆا قۇربان ايت مەرەكەسىن ونلاين تۇردە وتكىزۋ دۇرىس ەمەستىگى جايلى، سونىمەن قاتار پاندەميا كەزىندە حالىققا بەرىلىپ وتىرعان الەۋمەتتىك كومەك تۋرالى ءسوز قوزعادى. بەينەجازبانى Youtube جەلىسىنە ناعىز قازاق ارناسى جاريالادى.

"كەشە Facebook جەلىسىندە باس ءمۇفتي قۇربان ايتتىڭ ونلاين وتەتىنىن ايتتى. "بولمايدى" دەدى. ول نەگە بولمايدى. ءوزى جىلىنا ءبىر كەلەتىن مەرەكەنى قالاي ونلاين وتكىزەدى. مەن ۇكىمەتتى تۇسىنبەيمىن. بۇل – ءبىزدىڭ قازاقتىڭ ءداستۇرى. بۇرىنعى اتالارىمىز ءبىرىنىڭ ۇيىنە ءبىرى بارىپ وسى مەرەكەنى تويلاعان بولاتىن. تويلانباۋى كەرەك بولسا، سىزدەر نەگە كەشە نازاربايەۆتىڭ تۋعان كۇنىن تويلادىڭىزدار؟ 6 شىلدە كۇنى ءبىزدىڭ ارقالىقتا 15 ادام جەرلەنىپ جاتتى. قالىڭ قارا قازاق قارا جامىلىپ وتىردى. ءبىر-بىرىنىڭ باتاسىنا بارا الماي، ۇيىنەن شىعا الماي وتىرعاندا سىزدەر وتشاشۋ جاساپ، توي تويلادىڭىزدار. كەشە مەن بالامنىڭ اسىن بەرەمىن دەپ ۇيگە ادام جيناپ ەدىم، جەر بەتىندەگى ومون-داردىڭ ءبارى ءبىزدىڭ ەسىك الدىندا بولدى. سانەپيدەمستناسيادان ادامدار كەلدى. ودان قالا بەرە تاڭعا دەيىن پوليسەيلەر بىزبەن ءجۇردى. توبەمىزدەن ءتۇسىرىپ تۇردى. بۇل نە دەگەن قاسيەتسىزدىك. سوندا مەنىڭ ولگەن ءبىر بالامنان قورقىپ وتىر ما. جۇدىرىقتاي ءبىر بالامنان قورقىپ قانشاما قىزمەتكەردى ءبىزدىڭ سوڭىمىزعا سالىپ وتىرعان ۇكىمەت. دۋلات ايتاتىن ەدى "مەنىڭ ارتىما سالىپ قويعان ادامداردىڭ اقشاسىن نەگە جەتىم-جەسىرگە بەرمەيدى" دەپ. سونى مەن ەندى ءتۇسىندىم. قانشاما ماشينا كەلدى. ولار ءار جەردە تۇردى. ولارعا اقشا بەرىپ ءبىزدى اڭدىتقانشا، 42500 تەڭگەنى بەرمەيدى مە دۇرىستاپ. ونى بىرىنە بەرسە، بىرىنە بەرمەيدى. مىسالى، مەن زەينەتكەرمىن، ادەيى 1414-كە حابارلاستىم. ماعان بەرسىن دەپ، ال ولار بەرمەيمىز دەيدى. جارايدى بەرمەي-اق قويسىن، مەن وعان قاراپ تۇرعان جوقپىن. باسقالارعا دۇرىستاپ ۇلەستىرىپ بەرسىن. ودان بولەك 5500 تولەنەدى دەيدى. بۇل نە ماسقارا. توقايەۆ مىرزا! ءسىز ءوزىڭىز كەلدىڭىز بيلىككە. ارتىق ايتسام رەنجىمەڭىز. ءوزىڭىز كەلگەننەن كەيىن ءسىز بىزگە جاۋاپ بەرۋ كەرەكسىز. ءسىز حالىقتان لايىقتى ات الا المادىڭىز. سىزدەن سوندا نە ءۇمىت، نە قايىر؟" دەلىنگەن ۆيدەودا. 

ازاماتتىق بەلسەندى دۋلات ءاعادىل 25 اقپان كۇنى اقمولا وبلىسىنداعى تەرگەۋ يزولياتورىندا قايتىس بولعان.