كاسىپكەر استىرتىن مال سويۋ سەحى ءۇشىن نىساندى جالعا العانى بەلگىلى بولدى.
"پوليسيا قىزمەتكەرلەرى مەن دكنب قىزمەتكەرلەرى رۇقسات قۇجاتتارىسىز جانە انتيسانيتارلىق جاعدايدا ەت وڭدەۋمەن اينالىسقان زاڭسىز ارەكەتتى توقتاتتى. كاسىپكەر استىرتىن مال سويۋ سەحى ءۇشىن نىساندى جالعا العانى انىقتالدى. وندا التى ادام زاڭسىز جۇمىس ىستەپ، كۇندەلىكتى اقشالاي تولەم الىپ وتىرعان. قولدانىلاتىن شيكىزات رەتىندە قۇجاتسىز ساتىپ الىنعان كۇماندى ەت پايدالانىلعان. دايىن ءونىم قازاقستان وڭىرلەرىنە تاراتىلعان"، - دەپ حابارلادى استانا پد.
قۇقىق قورعاۋشىلار استانانىڭ ءبىر اۋدانىندا جەرگىلىكتى تۇرعىننىڭ ءوز ءۇيىنىڭ اۋلاسىندا ەتتى زاڭسىز ساتۋمەن اينالىسقان ەكىنشى وقيعانى دا اتاپ ءوتتى. ءونىمنىڭ ەشقانداي قۇجاتى، ۆەتەرينارلىق ءمورى بولماعان، دەپ قوستى پد.
"قازىرگى ۋاقىتتا تاركىلەنگەن ەتتىڭ ساپاسىن تەكسەرۋ ءۇشىن ساراپتاما تاعايىندالدى. انىقتالعان زاڭبۇزۋشىلىقتار بويىنشا قىلمىستىق ءىس قوزعالدى. قۇقىقبۇزۋشىلارعا قاتىستى اكىمشىلىك حاتتامالار تولتىرىلعان. استانا پوليسيا دەپارتامەنتى ەت ونىمدەرى ۆەتەرينارلىق باقىلاۋسىز ادام دەنساۋلىعىنا ءقاۋىپتى بولۋى مۇمكىن ەكەنىن ەسكەرتەدى"، - دەپ قوستى پوليسيا.
پىكىر قالدىرۋ