اقتوبە وبلىسى – ەلىمىزدەگى ونەركاسىپ سالاسىنداعى ىرگەلى وڭىرلەرىنىڭ ءبىرى. وبلىستا كاسىپكەرلىكتى دامىتۋ ماقساتىنداعى جۇمىستار جۇيەلى جۇرگىزىلىپ كەلەدى. جۋىردا «قازاقستاننىڭ ۇزدىك تاۋارى» كورمە-بايقاۋىنىڭ وڭىرلىك كەزەڭىنىڭ جەڭىمپازدارى انىقتالدى. بايقاۋعا وڭىردەگى قىرىققا جۋىق جەتەكشى كاسىپورىندار قاتىسقان بولاتىن.

— مەملەكەت باسشىسىنىڭ العا قويعان باستى مىندەتتەردىڭ ءبىرى — الەمنىڭ دامىعان وتىز ەلىنىڭ قاتارىنا تەزىرەك ەنۋ. ال بۇل ماقساتقا جەتۋ ءۇشىن ەكونوميكانىڭ وندىرىستىك سەكتورىن كەڭىنەن دامىتۋ قاجەت. پرەزيدەنتتىڭ تاپسىرمالارىنا سايكەس «قازاقستاننىڭ ۇزدىك تاۋارى» وڭىرلىك جانە رەسپۋبليكالىق كورمە-بايقاۋى ەلىمىزدە 13-رەت ءوتىپ جاتىر. بۇل — قولدا بار الەۋەتتى كورسەتىپ قانا قويماي، كاسىپورىن شىعاراتىن ءونىم ساپاسىن ۇنەمى ارتتىرىپ وتىرۋعا، حالىقارالىق ستاندارتتاردى ەنگىزۋگە جەتەلەيتىن تاماشا ءداستۇر، — دەدى وبلىس اكىمى بەردىبەك ساپاربايەۆ.

ءوڭىر باسشىسى مۇنداي جارىستارعا قاتىسۋ تاۋار وندىرۋشىلەردىڭ ىسكەرلىك باعىتتاعى سەرىكتەستىگىن ودان ءارى دامىتۋعا كەڭ جول اشاتىنىن اتاپ ءوتتى. وسى ماقساتتا اقتوبە وبلىسىندا شاعىن جانە ورتا بيزنەس سۋبەكتىلەرىنە، ياعني ساتىپ الۋ پروسەدۋراسىنىڭ الەۋەتتى قاتىسۋشىلارى ءۇشىن ءىرى كاسىپورىنداردىڭ اشىق ەسىك كۇندەرى وتكىزىلۋدە. وسىعان ۇقساس شارالار «قازحروم» تۇك» اق، «سنپس – اقتوبەمۇنايگاز» ج ش س، «اقتوبە مىس كومپانياسى» ج ش س مەكەمەلەرىندە ۇيىمداستىرىلدى.

— ءبىزدىڭ باستى ماقساتىمىز — كاسىپكەرلىكتى دامىتۋ ءۇشىن بارىنشا كەدەرگىسىز ورتا جاساۋ. بۇگىندە ءبىزدىڭ وندىرىستەگى كورسەتكىشتەرىمىز جامان ەمەس. وتكەن جىلدىڭ قورىتىندىسى بويىنشا ونەركاسىپتىك ءوندىرىس كولەمى اقشاعا شاققاندا 1،6 تريلليون تەڭگەگە جەتتى. بيىلعى ءبىرىنشى جارتىجىلدىقتىڭ قورىتىندىسى بويىنشا 870 ميلليارد تەڭگەگە ءونىم وندىرىلگەن، بۇل بىلتىرعى جىلدىڭ وسىعان ۇقساس كەزەڭىمەن سالىستىرعاندا 5%-عا كوبىرەك، — دەپ اتاپ ءوتتى بەردىبەك ساپاربايەۆ.

ساراپشى كوميسسيا بايقاۋ جەڭىمپازدارىن ءۇش اتالىم بويىنشا جاريالادى. «وندىرىستىك باعىتتاعى ۇزدىك تاۋارلار» اتالىمىندا «اقتوبە ورتكە قارسى جابدىقتار زاۋىتى» ءبىرىنشى ورىندى يەلەندى. «اقتوبە ورتكە قارسى جابدىقتار زاۋىتى» — ءورت ءسوندىرۋدىڭ باستاپقى قۇرالدارىن ساپالى ءارى زاماناۋي ەتىپ شىعاراتىن مامانداندىرىلعان جەلى. زاۋىت ءونىمى مەملەكەتتىك ستاندارتتاردىڭ بارلىق تالاپتارىنا ساي كەلەدى، ق ر توتەنشە جاعدايلار مينيسترلىگىنىڭ عىلىمي زەرتتەۋ ينستيتۋتىنىڭ اككرەديتاسياسىنان وتكەن. بۇل اتالىمنىڭ ەكىنشى جانە ءۇشىنشى ورىندارى «پو گلوبال-سپەسودەجدا» ج ش س مەن «اقتوبە رەلس-ارقالىق زاۋىتى» جشس-نا بۇيىردى.

«حالىققا ارنالعان ۇزدىك تاۋارلار» اتالىمىنىڭ كوشباسىنداعى ۇشتىگىنە بولمەارالىق ەسىكتەر شىعاراتىن «West Line doors» ج ش س، تۇرمىستىق قاعاز ءونىمىن وندىرەتىن «قاز قاعاز» ج ش س مەن «اقسۋ» جيھاز فابريكاسى ەندى. «ۇزدىك ازىق-تۇلىك تاۋارلارى» اتالىمىندا ءبىرىنشى ورىن تاڭقۋراي وسىرۋمەن اينالىساتىن «بولات لتد» جشس-نا بەرىلدى، ەكىنشى

جانە ءۇشىنشى ورىندارعا ۇننىڭ بارلىق سۇرپىن، ماكارون ونىمدەرىن، جارما، نان-توقاش جانە كونديتەر ونىمدەرىن، تاۋىق جۇمىرتقاسىن وندىرەتىن «اقتوبە ەت كلاستەرى» ج ش س مەن «رامازان» ج ش س يە بولدى.

وڭىرلىك كەزەڭنىڭ جەڭىمپازدارى «قازاقستاننىڭ ۇزدىك تاۋارى» رەسپۋبليكالىق بايقاۋىندا اقتوبە وبلىسىن تانىستىرماقشى.