اقتوبەلىك ونىمدەرى ەلىمىز بويىنشا كەڭ سۇرانىسقا يە. ايتا كەتسەك، ەلورداعا ايىنا 15-20 توننا ءسۇت ونىمدەرىن وتكىزىپ وتىرعان اقتوبەدە ون شاقتى فيرما بار. اتالمىش كاسىپورىندار تاۋارلارىن حالىقارالىق بولشەك ساۋدا تالاپتارىنا سايكەس وندىرۋگە كوشتى.
اقتوبەدە وندىرىلەتىن ونىمدەر ەلوردامىز استانا قالاسىنىڭ ساۋدا ورىندارىنا ءجيى جونەلتىلەدى. اقتوبە وبلىستىق كاسىپكەرلىك باسقارماسىنىڭ باسشىسى انار دارجانوۆانىڭ ايتۋىنشا، بۇگىنگى كۇنى تاماق ونەركاسىبى سالاسىندا اقتوبەلىك ون شاقتى كومپانيا ءوز ونىمدەرىن حالىقارالىق بولشەك ساۋدا تالاپتارىنا ساي ەتىپ شىعارىپ وتىر. باسقارما باسشىسى وسىنداي كومپانيالاردىڭ ىشىندە حرومتاۋ اۋدانىنداعى «اگروفيرما تاۋ» ج ش س جۇمىسىن ەرەكشە اتادى. اتالعان كومپانيانىڭ وزگەلەرگە قاراعاندا ماڭىزدىلىعى نەدە دەگەن ساۋال قويعانىمىزدا ول: «ءقازىر بۇل كومپانيا اۋداندارداعى شاعىن قوجالىقتاردان ءسۇت قابىلداۋدا. مۇنى وتە ۇلكەن ءىس دەپ باعالاۋىمىز كەرەك. سەبەبى، ءبىرىنشى كەزەكتە ءسۇتتى وتكىزىپ وتىرعان شاعىن قوجالىقتاردىڭ جۇمىسىنا قولايلى جاعداي تۋعىزىپ وتىر. ەكىنشىدەن، كومپانيانىڭ وزىنە دە بۇل ءتاسىل وتە ءتيىمدى. بۇگىنگى كۇنى بۇل كومپانيا تاۋاردى تەك استانا، شىمكەنت قالالارىنا عانا ەمەس، باتىس قازاقستان، قوستاناي، قىزىلوردا سەكىلدى وبلىستارعا دا جەتكىزىپ جاتىر. وزگە ايماقتاردان دا وسى كومپانيانىڭ ونىمىنە دەگەن سۇرانىس جوعارى. كومپانيانىڭ ەل ايماقتارىنا ءوز تاۋارلارىن وتكىزۋدىڭ تاعى ءبىر سەبەبى — ءونىمنىڭ دامدىلىگىندە. وسىلايشا كاسىپورىن نارىقتا ۇتىپ وتىر. سەبەبى، «اگروفيرما تاۋ» سەرىكتەستىگى وندىرگەن ونىمدەردىڭ قۇرامىنا قۇرعاق ءسۇت قوسىلمايدى.
بۇگىنگى كۇنى «اگروفيرما تاۋ» سەرىكتەستىگىندە ءسۇت ونىمدەرىنىڭ 25-تەن اسا ءتۇرى وندىرىلەدى. كاسىپورىن بازاسى حرومتاۋ اۋدانىنىڭ تەرريتورياسىندا ورنالاسقان. اۋدانداعى ءسۇت زاۋىتى ءوز جۇمىسىن 2015 جىلى قىركۇيەكتە باستادى. زاۋىتتا كۇنىنە 15 توننا ءونىم وندىرىلەدى. سەرىكتەستىكتە 70-تەن اسا ادام تۇراقتى جۇمىسپەن قامتىلعان. ونىڭ كوپشىلىگى — جەرگىلىكتى تۇرعىندار.
ءبىر ايدا استانا قالاسىنا 15-20 توننا كولەمىندە ءسۇت ونىمدەرى جەتكىزىلەدى ەكەن. اسىرەسە، استانالىق تۇتىنۋشىلار كاسىپورىننىڭ مايلىلىعى 20 پايىزدىق قايماققا ءجيى تاپسىرىس بەرۋدە. مۇنداعى ءسۇت ونىمدەرى رەفريجەراتورلارمەن جانە ارنايى مۇزداتقىشى بار فۋرالارمەن وزگە وڭىرلەرگە جەتكىزىلۋدە.
— سونداي-اق اقتوبەدەگى «روكس» كومپانياسىنىڭ شىعاراتىن ءونىمى جوعارى ساپاعا ءارى سۇرانىسقا يە. بۇگىنگى كۇنى «روكس» وندىرەتىن ونىمدەردى استانالىقتاردىڭ تۇتىنىپ جاتقانىنا بىرنەشە جىلدىڭ ءجۇزى بولدى.
استانا — ۇلكەن مەگاپوليس. بۇل — ءوز ءونىمى ءوتىمدى، نارىققا ساي كەلەتىن كومپانيالار ءۇشىن ۇلكەن مۇمكىندىك تۋعىزاتىن شاھار. بۇگىندە «اگروفيرما تاۋ»، «ايس»، «جاڭا ءالجان» سەكىلدى اقتوبەدەگى وزگە دە كومپانيالار ءوز ونىمدەرىن استانا، الماتى قالالارىنا وتكىزىپ وتىر. سەبەبى ەۋروپا قايتا قۇرۋ جانە دامۋ بانكىنىڭ كومەگىمەن مۇنداي كاسىپورىندار ءونىمدى زامان تالابىنا ساي ەتىپ شىعاردى،- دەيدى باسقارما باسشىسى.
