اقتوبە قالاسىندا ءبىر اپتالىق «Plein Air Aktobe» حالىقارالىق كەسكىندەمە سيمپوزيۋمى ءوتتى. وندا باشقۇرتستان، وزبەكستان، تاتارستان، رەسەي فەدەراسياسىنىڭ پەرم، ورسك، تامبوۆ قالالارىمەن قاتار ەلىمىزدىڭ وزگە دە وڭىرلەرىنەن كەلگەن قىلقالام شەبەرلەرى باس قوستى.

اقتوبە وبلىستىق مادەنيەت، ارحيۆتەر جانە قۇجاتتاما باسقارماسىنىڭ قولداۋىمەن «رۋحاني جاڭعىرۋ» باعدارلاماسى اياسىندا ۇيىمداستىرىلعان كورمەگە 20-دان استام سۋرەتشىنىڭ قاتىستى.كەسكىندەمە جانرىنا، قالالىق پەيزاجدارعا قىزىعۋشىلىقتى قالىپتاستىرۋ، وبلىستىق ونەر مۋزەيى قورىن سيمپوزيۋم قاتىسۋشىلارىنىڭ تۋىندىلارىمەن تولىقتىرۋ ماقساتىندا ۇيىمداستىرىلعان شاراعا قاتىستى.

وبلىستىق ونەر مۋزەيىنىڭ عىلىمي قىزمەتكەرى ىڭكار الىبەكوۆانىڭ ايتۋىنشا، بۇل اقتوبە قالاسىندا وسىمەن ءۇشىنشى رەت وتكىزىلىپ جاتقان حالىقارالىق سيمپوزيۋم.

— بۇعان دەيىن وبلىستىق ونەر مۋزەيىنىڭ ۇيىمداستىرۋىمەن حالىقارالىق سيمپوزيۋم 2011 جانە 2015 جىلدارى وتكەن بولاتىن. بۇل جولى استانانىڭ 20 جىلدىق مەرەيتويىنا وراي ەلىمىزدىڭ مادەنيەتى مەن ونەرىنىڭ دامۋىنا ۇلەس قوسۋ، وزگە ەلدەر اراسىنداعى شىعارماشىلىق ىنتىماقتاستىقتى دامىتۋ تۇرعىسىندا ءوتىپ جاتقان سيمپوزيۋمنىڭ كەز كەلگەن قىلقالام شەبەرى ءۇشىن ماڭىزى زور، — دەيدى ءى.الىبەكوۆا.

ءبىر اپتاعا جالعاسقان شارا بارىسىندا سۋرەتشىلەر ءتۇرلى شەبەرلىك ساعاتتارىن وتكىزىپ، اقتوبەنىڭ كورىكتى تۇستارىن ارالادى. سۋرەتشىلەرگە قويىلعان باستى تالاپ — استانا مەن اقتوبەنىڭ كورىكتى جەرلەرى بەينەلەنگەن ەكى كارتينادان ۇسىنۋ.

سيمپوزيۋم قورىتىندىسى ونەر ورتالىعىنداعى كارتينالار كورمەسىمەن اياقتالدى. بۇل جەردە بارلىق قاتىسۋشىلاردى وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى مارجان قورعانبايەۆا قۇتتىقتاپ، العىس حاتتار مەن ەستەلىك سىيلىقتار تابىس ەتتى.

كورمەگە قويىلعان جۇمىستاردىڭ شەبەرلىگىنەن كوز سۇرىنەدى. ونەرسۇيەر قاۋىمنىڭ نازارىنا ۇسىنىلعان ەكسپوزيسيالاردان اقتوبە مەن استانانىڭ تابيعات سۋرەتتەرى بەينەلەنگەن پەيزاجداردى، قوس قالانىڭ كورىكتى عيماراتتارىن، سونداي-اق ءوزارا ۇيلەسىم تاپقان كومپوزيسيالاردى دا كورۋگە بولادى. بارلىعىنا ۇسىنىلعان تاقىرىپ ءبىر بولعانىمەن، كورمەگە قويىلعان جۇمىستار وزىندىك ەرەكشەلىگىمەن سان الۋان.

جاستايىنان قىلقالامدى جانىنا سەرىك ەتكەن باشقۇرتستان رەسپۋبليكاسىنىڭ ەڭبەك سىڭىرگەن سۋرەتشىسى، تاتارستان رەسپۋبليكاسىنىڭ ەڭبەك سىڭىرگەن قايراتكەرى ۆاكيل شايحەتدينوۆ شارانىڭ باستى ەرەكشەلىگى رەاليستىك باعىتتا وتكەندىگىن ايتتى.

— كوپتەگەن شەتەلدەردە بولىپ، ءتۇرلى سيمپوزيۋمدارعا قاتىسىپ جۇرگەنىممەن، مەن ءۇشىن بۇل جولعى ساپاردىڭ اسەرى ەرەكشە بولدى. ۇلان-عايىر قازاق دالاسىنىڭ كەڭدىگىن كورىپ، ءبىر دەمالىپ قالدىم. دارحاندىقتى بايقادىم. سونداي-اق بۇل جولى ءبىز جۇرەگىمىز قالاعان جەردە كورگەنىمىزدى سالدىق. كوزبەن كورىپ سالعان دۇنيە مۇلدە بولەك. ول ادامدى ەرەكشە ەلىتە تۇسەدى. بۇعان دەيىنگى سيمپوزيۋمداردا تەك شەبەرحانالاردا عانا جۇمىس

جاسايتىنبىز. ال ناعىز ونەر يەسىنە بۇل تارشىلىق ەتەدى، — دەيدى ۆاحيل شايحەتدينوۆ.

جازعان جۇمىستارىنان سۇلۋلىق تا، نازىكتىك تە، باتىلدىق تا بايقالاتىن ۆاكيل شايحەتدينوۆ اقتوبەنىڭ كورىكتى جەرلەرىنەن «نۇر عاسىر» مەشىتىن بەينەلەگەن. قاراپ قالعاندا قالانىڭ ورتالىعىندا ورنالاسقان مەشىتتىڭ سۋرەتىن بەينەلەگەن شەبەر ءبىر كارتيناسىنا بىرنەشە ۇيلەسىم مەن ماعىنا سىيدىرىپتى.

مەشىتتىڭ جوعارى جاعىندا اقتوبەلىكتەردىڭ سۇيىكتى ورىندارىنىڭ ءبىرى بىرلىك پەن كەلىسىم سۋلى-جاسىل گۇلزارىندا ورنالاسقان «شاڭىراق» بەينەلەنگەن. دوستىق پەن بىرلىكتىڭ تاڭباسىنا اينالعان شاڭىراق كارتينانىڭ دا اجارىن اشىپ تۇر. رۋحاني جاڭعىرۋىمىزدىڭ سيمۆولىنا اينالعان قىران بەينەسى دە بىلىنەر-بىلىنبەس كارتينانىڭ جوعارى تۇسىنان ورىن الىپتى. قازاقتىڭ بار بولمىسىن ادەمى ءبىر كارتيناعا سىيدىرعان سۋرەتشى اتالعان جۇمىستى 2 كۇن سالعان. «ەگەر بارلىق قۇرالدار دايىن بولسا، ءبىر كۇندە سالىپ بىتىرۋگە دە بولاتىن ەدى»، — دەيدى ول.

— ونەردە شەكارا جوق دەگەن راس ەكەن. بۇگىن مەنىڭ شىعارماشىلىق قورجىنىم تاعى ءبىر ەرەكشە جۇمىستارمەن تولىقتى. مەن ءۇشىن بۇل سيمپوزيۋمنىڭ پايداسى زور بولدى. الداعى ۋاقىتتا تالايدى تامساندىراتىن كارتينالار جاسايتىن دۇنيەلەر جينادىم. اقتوبەدە ءبىرىنشى رەت بولۋىم. وتە اسەم قالا. ەندىگى ماقساتىم — ەل اۋزىندا جۇرگەن استانا قالاسىنا بارۋ، — دەيدى سۋرەتشى.

ايتا كەتەيىك، كورمەگە قويىلعان بارلىق كارتينالار وبلىستىق ونەر مۋزەيىنىڭ قورىنا تاپسىرىلادى.