اقتوبە وبلىسىنىڭ حرومتاۋ اۋدانىندا جاڭا مەكتەپ بوي كوتەرىپ، 120 وتباسى قونىستويىن تويلادى.
وبلىس اكىمى بەردىبەك ساپاربايەۆ باستاعان توپ الدىمەن حرومتاۋ اۋدانىنىڭ ءدوڭ اۋىلىنداعى جاڭا مەكتەپتىڭ اشىلۋ سالتاناتىنا قاتىستى. 600 بالاعا شاقتالعان جوبانىڭ قۇنى — 1،4 ميلليارد تەڭگە.
— ءار ۇلتتىڭ، مەملەكەتتىڭ دامۋى ونىڭ ءبىلىمدى، دەنساۋلىعى مىقتى ازاماتتارىمەن تىكەلەي بايلانىستى. سوندىقتان قازاقستان تاۋەلسىزدىك العان كۇننەن باستاپ ءوزىنىڭ بولاشاعى ءۇشىن ءبىلىم، مادەنيەت، دەنساۋلىق ساقتاۋ سالالارىنا ەرەكشە كوڭىل ءبولىپ كەلەدى. وسى 27 جىلدا ەلباسى نۇرسۇلتان نازاربايەۆتىڭ ەڭ نەگىزگى ۇستانعان ساياساتى — ەلىمىزدى تەزىرەك دامىعان 30 ەلدىڭ قاتارىنا قوسۋ. مەملەكەت باسشىسىنىڭ تاپسىرماسىن ورىنداۋ ماقساتىندا جەر-جەردە جاڭا مەكتەپتەر سالىنىپ جاتىر. ايتالىق، بىلتىر 14 مەكتەپ سالىندى. ال بيىل 26 مەكتەپتىڭ قۇرىلىسى ءجۇرىپ جاتىر. مىنە، استانانىڭ 20 جىلدىعى قارساڭىندا 600 بالاعا ارنالعان مەكتەپتىڭ اشىلۋ سالتاناتىنا قاتىسىپ وتىرمىز. وسىنىڭ بارلىعى بالالاردىڭ ەرتەڭ ءوز قاتارىنان كەم بولماي، قازىرگى زامان تالابىنا ساي ءبىلىم الۋى ءۇشىن جاسالىپ وتىر. ونىڭ ۇستىنە، ءدوڭ تاۋ-كەن بايىتۋ كومبيناتىنىڭ 80 جىلدىعىندا وسىنداي مەكتەپتىڭ اشىلىپ جاتقاندىعى ەكى ەسە قۋانتادى. وبلىس باسشىلىعى اتىنان قۇرىلىس كومپانياسىنا العىسىمدى بىلدىرە وتىرىپ، وزدەرىڭىزگە اماندىق تىلەيمىن. مەملەكەتتىڭ داڭقى ارتا بەرسىن! — دەپ جىلى لەبىزىن ءبىلدىردى بەردىبەك ماشبەك ۇلى.
ەكى وقۋ بولىمىنەن تۇراتىن ءۇش قاباتتى عيماراتتا ءبىلىم الۋعا قاجەتتىنىڭ ءبارى بار: بارلىق كابينەتتەر عالامتورعا قوسىلعان، 2 سپورتزال مەن مۋلتيمەديالىق بولىممەن جابدىقتالعان. ال اۋلادا بالالاردىڭ فۋتبول، باسكەتبول، تەننيس ويناۋىنا جاعداي جاسالىپتى. سۋ جاڭا وقۋ وشاعىنىڭ اشىلۋىندا ارداگەر ۇستازدار ءسوز سويلەپ، وقۋشىلارعا ءوز باتاسىن بەردى.
ودان سوڭ اۋدان ورتالىعىندا ءدوڭ تاۋ-كەن بايىتۋ كومبيناتىنىڭ جۇمىسشىلارىنا ارنالعان 120 پاتەرلىك تۇرعىن ءۇي سالتاناتتى جاعدايدا پايدالانۋعا بەرىلدى. بەس قاباتتى ءۇي مەملەكەتتىك «نۇرلى جەر» باعدارلاماسى اياسىندا سالىندى. شارادا ءسوز العان وبلىس باسشىسى زاۋىت قىزمەتكەرلەرىن قونىستويىمەن قۇتتىقتاپ، ەڭبەك ادامدارىنىڭ الەۋمەتتىك جاعدايىن ويلاعان كاسىپورىن باسشىلىعىنا العىسىن ايتتى. ال ەۋرازيالىق توپتىڭ مەنەدجەرلەر كەڭەسىنىڭ ءتوراعاسى الەكساندر ماشكيەۆيچ:
— حرومتاۋعا مەن العاش رەت وسىدان 24 جىل بۇرىن كەلگەن بولاتىنمىن. جاراتقاننىڭ قولداۋى مەن ەلباسىنىڭ قامقورلىعىنىڭ ارقاسىندا وسى ارالىقتا ولكەدە ۇلكەن وڭدى وزگەرىستەر ورىن الدى. سونىڭ ءبارىن وي ەلەگىنەن وتكىزسەڭ، 100 جىلدا جاسالعان جۇمىستار ما دەپ قالاسىڭ. قالانىڭ تۇرمىسى جاقسارا ءتۇستى. بۇگىن كەزەكتى جاڭا ءۇيىمىزدى تاپسىرىپ، 120 وتباسىن قۋانىشقا بولەپ جاتقانىمىزعا باقىتتىمىز. بۇنىڭ شىن مانىندە ماڭىزى زور. ويتكەنى جاس وتباسى، جالپى ادام ءۇشىن باسپانا ماسەلەسى ەرەكشە رولگە يە. سوندىقتان بۇگىن ءۇيلى بولعاندار الداعى ۋاقىتتا بۇدان دا جاقسى جۇمىس ىستەيتىنىنە سەنىمىم كامىل، — دەدى.
ءوندىرىس ورنىنداعى جاس مامان رۋستام ءالجانوۆ — وسىنداي قۇرمەتكە يە بولعانداردىڭ ءبىرى. 23 جاستاعى جىگىت قۋانىشىمەن تومەندەگىدەي ءبولىستى. - وسى قىزمەتكە تۇرۋ ءۇشىن اقتوبە قالاسىنان حرومتاۋعا كوشىپ كەلدىم. باسىندا پاتەر جالداپ تۇردىم. ەندى قىزمەتتىك پاتەرگە يە بولىپ جاتقان جايىم بار. تالاپ بويىنشا تەك كوممۋنالدىق تولەمدەردى وتەيمىن. مەنىڭشە، وسىنىڭ ءوزى جاستارعا جاسالعان ۇلكەن دەمەۋ،- دەيدى ول.
