«بايتەرەك» حولدينگىنىڭ ەنشىلەس ۇيىمى اقتوبە قالاسىنداعى تۇرعىن ءۇي قۇرىلىس جيناق بانكىنىڭ 2327 سالىمشىسى بيىل قونىستويىن تويلايدى. جىل باسىنان بەرى 800 تۇرعىنعا «نۇرلى جەر» باعدارلاماسى نەگىزىندە باسپانا بۇيىرعان.

اقتوبە وبلىسىندا «نۇرلى جەر» مەملەكەتتىك باعدارلاماسى ءۇش باعىت بويىنشا جۇزەگە اسىرىلۋدا. ءبىرىنشى باعىت بويىنشا بانك سالىمشىلارى «نۇر اقتوبە» اۋدانىندا سالىنىپ جاتقان ءۇش قاباتتى ۇيلەردى تۇرعىن ءۇي قۇرىلىس جيناقتارى جۇيەسى ارقىلى الا الادى. ەكىنشى، ياعني جەكە تۇرعىن ءۇي قۇرىلىسىن دامىتۋ باعىتى بويىنشا، سالىمشىلاردىڭ «نۇر-اقتوبەدە» سالىنىپ جاتقان كوتتەدجدەردى ساتىپ الۋعا مۇمكىندىكتەرى بار. سونداي-اق سالىمشىلار باتىس-2 اۋدانىندا جەكە قۇرىلىس كومپانيالار سالىپ جاتقان تۇرعىن ۇيلەردەن الا الادى، بۇل باعىت بويىنشا 128 پاتەر جەلتوقسان ايىندا بەرىلەدى.

— «نۇرلى جەر» باعدارلاماسى بويىنشا ءبىر شارشى مەتردىڭ قۇنى 100 000 تەڭگەدەن باستالادى. نەسيەنىڭ جىلدىق مولشەرلەمەسى 5 پايىزدان باستالادى. سالىمشىلاردىڭ باستاپقى جارناسىنىڭ كولەمى پاتەر قۇنىنىڭ 30 پايىزىنان كەم بولماۋى كەرەك. ۇيلەر دايىن كۇيىندە بەرىلەدى.

تۇرعىن ءۇي قۇرىلىس جيناق بانكى سالىمشىلار پۋلى قۇرىلدى، قازىرگى ۋاقىتتا «نۇر اقتوبە» اۋدانىندا سالىنعان تۇرعىن ۇيگە ءوتىنىش بەرگەن ازاماتتاردىڭ تولەم قابىلەتتىلىگى تەكسەرىلىپ جاتىر.

سونداي-اق ءقازىر «نۇرلى جەر» باعدارلاماسىنىڭ اياسىندا «تۇرعىن ءۇي قۇرىلىس جيناق جۇيەسى ارقىلى نەسيەلىك تۇرعىن ءۇي سالۋ» باعىتى بويىنشا تۇرعىن ءۇي ساتىپ الۋشىلارىنىڭ پۋلىنا قوسىمشا قابىلداۋ جۇرگىزىلىپ جاتىر. «نۇر اقتوبە» اۋدانىنداعى ءۇش قاباتتى جانە توعىز قاباتتى ۇيلەردىڭ پاتەرلەرى ساتۋعا شىعارىلىپ وتىر، — دەيدى اقتوبە قالاسىنداعى تۇرعىن ءۇي قۇرىلىس جيناق بانكى بيزنەستى دامىتۋ ءبولىمىنىڭ باس مامانى نۇربولات باتىر.

«نۇرلى جەر» باعدارلاماسىنىڭ «جەكە تۇرعىن ءۇي قۇرىلىسىن دامىتۋ» پيلوتتىق باعىتى بويىنشا 194 جەكە ءۇي، تومەن دەڭگەيلى ۇيلەردەن 949 پاتەر، 9 قاباتتى ۇيلەردە 1184 پاتەر قولدانىسقا بەرىلدى.

— «نۇر اقتوبە» كوتتەدج قالاشىعىنداعى ەكى قاباتتى ۇيلەردىڭ قۇرىلىس الاڭدارى 114-152 شارشى مەتر. ونىڭ 1 شارشى مەترىنىڭ باعاسى 120 000 تەڭگەدەن اسپايدى. ۇيلەر جەر تەلىمىندە كەزەكتە تۇرعان ادامدارعا ۇسىنىلادى. جەردى تەگىن، ءۇيدى ساتىپ الادى. ول ءۇشىن تۇرعىن ءۇي قۇرىلىس جيناق بانكىنەن 30 پايىز باستاپقى جارنامەن، جىلدىق 5 پايىزبەن نەسيە راسىمدەي الادى، — دەيدى ن.باتىر.