«تۇرعىن ءۇي قۇرىلىس جيناق بانكى» اكسيونەرلىك قوعامى جەلىسى ارقىلى اقتوبە قالاسىندا «نۇرلى جەر» باعدارلاماسى بويىنشا سالىنعان تۇرعىن ۇيلەر بەرىلە باستادى. اقتوبە قالاسىنداعى تۇرعىن ءۇي قورىن ەسەپكە الۋ سەكتورىنىڭ مەڭگەرۋشىسى جانارگۇل دۇيسەكەنوۆا باستاعان توپ اتالعان باعدارلاما بويىنشا «نۇر اقتوبە» شاعىن اۋدانىندا سالىنىپ جاتقان پاتەرلەر مەن كوتتەدجدەرگە بانك سالىمشىلارىنىڭ قالاي قول جەتكىزۋگە بولاتىندىعىن ايتتى.
جانارگۇل دۇيسەكەنوۆانىڭ ايتۋىنشا، شاعىن اۋداندا بوي تۇزەگەن 9 قاباتتى تۇرعىن ۇيدەگى پاتەرلەردىڭ ءبىر شارشى مەترى 100-110 مىڭ تەڭگە بولسا، 3-4 قاباتتى تۇرعىن ۇيدەگى پاتەرلەردىڭ 1 شارشى مەترى 120 مىڭ تەڭگە تۇرادى.
— بۇگىنگى كۇنى «نۇر اقتوبە» شاعىن اۋدانىنداعى كوتتەدجدەردى ءبولۋ جۇمىستارى جۇرگىزىلىپ جاتىر. قازىرگى تاڭدا بۇل ماڭعا 8 ءتۇرلى جوباداعى 100-دەن اسا كوتتەدج سالىندى. بولاشاقتا بۇل جەردە بارلىعى 194 كوتتەدج تۇرعىزىلاتىن بولاتىن. كوتتەدجدەردىڭ 1 شارشى مەترى 120 مىڭ تەڭگەگە باعالانادى. شاعىن اۋدانداعى كوتتەدجدەر ءبىر جانە ەكى قوجايىنعا ارناپ سالىنعان. سوندىقتان ءتۇرلى جوبادا سالىنعان ۇيلەردىڭ اۋدانى دا ءارتۇرلى. اتاپ ايتساق، كەيبىرەۋىنىڭ جالپى اۋدانى 156 شارشى مەتر بولسا، ەندى بىرەۋى شاعىن، ياعني اۋدانى 128 شارشى مەتر. «نۇرلى جەر» باعدارلاماسىنىڭ ماقساتى — ازاماتتارعا تومەن پايىزبەن ءۇي الۋعا جانە جەر، ءۇي الۋ كەزەگىندە تۇرعان ازاماتتاردىڭ سانىن ازايتۋعا مۇمكىندىك بەرەدى. تاعى ءبىر ايتا كەتەتىن جايت، ازاماتتار جەر، ءۇي الۋ كەزەگىنە تىركەلىسىمەن-اق وسى باعدارلاماعا قاتىسىپ، باسپانا الۋىنا ابدەن مۇمكىندىگى بار،— دەدى ج.دۇيسەكەنوۆا.
«نۇر اقتوبە» شاعىن اۋدانىندا «نۇرلى جەر» باعدارلاماسى بويىنشا تۇرعىزىلىپ جاتقان كوتتەدجدەرگە ىشكى ارلەۋ جۇمىستارى جۇرگىزىلگەن. سول سياقتى، بارلىق ينفراقۇرىلىم تارتىلعان. پاتەر الۋشىلارعا ءوز تالعامدارىمەن ءتۇسقاعاز جاپسىرۋ ءىسى عانا قالىپتى.
— ۇيلەر ءارتۇرلى قۇرىلىس ماتەريالدارىنان سالىنىپ جاتىر. ءبىرىنىڭ قابىرعاسى كىرپىشتەن تۇرعىزىلسا، ەندى ءبىرى ەكوتوننان، سول سياقتى پانەلدەن تۇرعىزىلعان ۇيلەر دە بار. «نۇرلى جەر» باعدارلاماسى بويىنشا اقتوبەدە ءبىرىنشى بولىپ سالىنىپ جاتقان كوتتەدجدەر بۇگىندە پايدالانۋعا بەرىلىپ جاتىر. وسىنداي كوتتەدجدەر مەن پاتەرلەردى جەر، ءۇي الۋ كەزەگىندە تۇرعان جانە «تۇرعىن ءۇي قۇرىلىس جيناق بانكىندە» سالىمى بار ازاماتتار عانا الا الادى، — دەدى ج.دۇيسەكەنوۆا.
ەندى بانك سالىمشىلارى بۇرىنعىداي العاشقى جارنانىڭ 30 پايىزىن ەمەس، 20 پايىزىن جيناسا جەتىپ جاتىر. ءۇيدىڭ قالعان قاراجاتىن «تۇرعىن ءۇي قۇرىلىس جيناق بانكى» اق-ى ارقىلى نەسيە الىپ، وتەۋىنە مۇمكىندىك قاراستىرىلعان.
— بانك سالىمشىلارى رەتىندە اۋدان تۇرعىندارى دا وسى باعدارلاماعا قاتىسا الادى. كوتتەدجدەرگە قول جەتكىزگەن سالىمشىلارعا ءۇيىنىڭ ماڭىنان قوسىمشا 10 سوتىق جەر بەرىلەدى. بەلگىلەنگەن اۋماق جەر قاتىناستار ارقىلى راسىمدەلەدى، — دەدى ج.دۇيسەكەنوۆا.
بۇگىنگى كۇنى وبلىس بويىنشا «تۇرعىن ءۇي قۇرىلىس جيناق بانكى» اق اقتوبە فيليالىندا 88 مىڭ سالىمشى بار. «قازاقستان رەسپۋبليكاسىنىڭ ءاربىر ازاماتى «نۇرلى جەر» مەملەكەتتىك باعدارلاماسىنا قاتىسا الادى. ول ءۇشىن «تۇرعىن ءۇي قۇرىلىس جيناق بانكىندە» ازاماتتاردىڭ سالىمى بولۋى ءتيىس. بۇعان دەيىن بانك ارقىلى پاتەر الۋشىلارعا پاتەر اقىسىنىڭ 30 پايىزىن جيناۋ مىندەتتەلگەن ەدى. بيىل 26 ماۋسىمدا وتكەن ۇكىمەتتىك كەڭەستە وزگەرىستەر ەنگىزىلىپ، ەندى العاشقى جارنا قۇنى 20 پايىز بولدى. نەسيە بۇرىنعىداي 5 پايىزدىق سىياقىمەن 21 جىل مەرزىمگە دەيىن بەرىلەدى. ياعني كوتتەدجدەر ءۇشىن دە، پاتەرلەر ءۇشىن دە سالىمشىلار 20 پايىز العاشقى جارنا جينايدى. بيىل «نۇرلى جەر» مەملەكەتتىك باعدارلاماسى بويىنشا پايدالانۋعا بەرىلەتىن 2300 پاتەردىڭ بۇگىنگى كۇنى 1000-عا جۋىعىن ساتىپ ۇلگەردىك. اتالعان باعدارلاماعا قاتىسۋعا اپتا سايىن، اي سايىن تاپسىرىس بەرۋشىلەر بار. ەگەر پاتەر الۋشىلاردىڭ تولەم قابىلەتى جەتپەسە، بۇل ىسكە قوسالقى قارىز الۋشىلاردى تارتۋعا بولادى. ولار ءبىر نەمەسە ەكەۋ عانا بولادى، — دەيدى «تۇرعىن ءۇي قۇرىلىس جيناق بانكى» اق اقتوبە فيليالى بيزنەستى دامىتۋ ءبولىمىنىڭ باسشىسى نۇرلان بالعوجييەۆ.
