اقتوبە قالاسىندا ەلىمىز بويىنشا بالاماسى جوق «Yurta park» وتباسىلىق دەمالىس ساياباعى اشىلدى.
ك.نوكين داڭعىلىنىڭ بويىندا ورنالاسقان دەمالىس ساياباعىنىڭ اۋماعى — 3،5 گەكتار. اۋماق ءۇش بولىككە، ياعني اكىمشىلىك، مادەني، ويىن-ساۋىق جانە سپورتتىق ساۋىقتىرۋ الاڭىنا بولىنگەن. ساياباقتى اقتوبەلىك جانە الماتىلىق كاسىپكەرلەر سالعان. جوبانى جۇزەگە اسىرۋ ءۇشىن ءبىر ميلليارد تەڭگەگە جۋىق قارجى جۇمسالعان.
— ساياباق وتباسىلىق دەمالىسقا ارنالعان. سوندىقتان تەك بالالار ءۇشىن عانا ەمەس، ۇلكەندەردىڭ دە تىنىعۋىنا جاعداي جاسالعان. ويىن-ساۋىق الاڭدارىنان بولەك تاماقتانۋعا ارنالعان ورىندار بار. بولاشاقتا ساۋدا، ويىن-ساۋىق بۋتيكتەرى، ءقوناقۇي، كەڭسە سالىنادى. جەرگىلىكتى تۇرعىندار سالاۋاتتى ءومىر سالتىن ساقتاپ، تازا اۋامەن تىنىستاپ، بوس ۋاقىتىن وتباسىنا ارناۋ ءۇشىن جاسالعان جاعداي، — دەيدى «نۇراي ينۆەست گرۋپپ» اق-نىڭ باس ديرەكتورى ەربول مۇحامەتجان.
اشىق اسپان استىنداعى ساياباقتا جاساندى جارتاس، ارقان باعى، كىتاپحانا، پلانەتاريي، ساداق اتاتىن ستەندتەر، ەتنواۋىل بار. ۇلتتىق ناقىشتا بەزەندىرىلگەن كيىز ۇيلەردە قازاقتىڭ سالت-داستۇرىنەن سىر شەرتەتىن ونەر تۋىندىلارى قويىلعان. بۇل جەردە ارنايى ماماندار شەبەرلىك ساباقتارىن وتكىزەدى. الاداعى ۋاقىتتا حايۋاناتتار باعى بولادى. ەربول مۇحامەتجاننىڭ ايتۋىنشا، بۇل قالا بالالارى ءۇشىن قىزىق بولماق. قۇلىن، بۇزاۋ، قوزى جانە ءتۇرلى ءۇي قۇستارىن بالالار تاماشالاي الادى جانە اتپەن سەرۋەندەۋگە دە مۇمكىندىك جاسالعان. سونداي-اق باتۋت، اۋماعى 20-30 مەتر بولاتىن لابيرينت جانە روليككە ارنالعان جول بار. ال قىستا بۇل جەردە مۇز ايدىنى بولادى. تامىز ايىندا باسسەين، سپا-سالون، ساۋنا، جاتتىعۋ زالى اشىلادى. ماسەلەن، بالا ساياباقتاعى ءتۇرلى اتتراكسيونداردا ويناپ بولعانشا، اتا-اناسى سپا-سالوننىڭ قىزمەتىنە جۇگىنەدى نەمەسە شاعىن گولف الاڭىندا، بوۋلينگتە كوڭىلىن كوتەرەدى.
— مۇمكىندىگى شەكتەۋلى بالالار ءۇشىن دە ارنايى الاڭ اشتىق. بۇل جەردەگى اتتراكسيونداردا ولار ەركىن ويناي الادى. سونىمەن قاتار از قامتىلعان، كوپبالالى وتباسىلارعا جەڭىلدىكتەر قاراستىرىلعان. ولار ارنايى قۇجاتىن كورسەتىپ، كىرە الادى. ال ءبىرىنشى توپتاعى مۇگەدەكتەرگە ساياباققا كىرۋ تەگىن، — دەيدى باس ديرەكتور.
جاسىل جەلەككە كومكەرىلگەن تىنىعۋ ورنى كەلۋشىلەرگە ەرەكشە كوڭىل كۇي سىيلايدى. قولشاتىر، كوبەلەك جانە ءتۇرلى گۇلدەرمەن بەزەندىرىلگەن ارقالىقتار ساياباققا ەرەكشە ءسان بەرىپ تۇر. بۇل جەردە جاس جۇبايلاردىڭ سۋرەتكە تۇسۋىنە ارنالعان ارنايى الاڭ بار.
قالا تۇرعىندارىنىڭ قۋانىشىمەن بولىسكەن اقتوبە قالاسىنىڭ اكىمى ءىلياس يسپانوۆ ساياباقتا دەمالۋدىڭ پايداسىنا توقتالىپ، وتباسىلىق دەمالىس ءۇشىن جاسالعان مول مۇمكىندىك ەكەنىن ايتتى.
