بۇگىن گەنناديي عاسىر جەكپە-جەگى «GGG» گولوۆكين مەن ساۋل «كانەلو» الۆارەس اراسىنداعى جەكپە-جەك لوس-اندجەلەستەگى تالاي جەكپە-جەكتىڭ كۋاسى بولعان 20 مىڭ ادامعا ارنالعان T-Mobile ارەناسىندا ءوتتى، دەپ حابارلايدى Qamshy.kz اقپارات اگەنتتىگى.تەك قازاقستاندىقتار عانا ەمەس ميلليونداعان جانكۇيەر اسىعا كۇتكەن جەكپە-جەكتە كانەلو جەڭىسكە جەتتى.

العاشقى راۋند باستالىسىمەن ەكى بىلعارىپ شەبەرى دە اشىق ايقاسقا كىرىستى. "كانەلو" ءوزىنىڭ تاكتيكاسىن وزگەرتكەن. العاشقى 2 راۋندتا قوس بوكسشى دا تەڭ دارەجەدە ونەر كورسەتتى. كەيىنگى راۋندتاردا بىردە گولوۆكين بىردە الۆارەس باسىم ءتۇسىپ وتىردى. ال 5 راۋندتان كەيىن الۆارەستىڭ قاباعى جارىلدى. دەسە دە قوس بوكسشى دا سوققىلارعا توزىمدىلىك تانىتىپ، سىر بىلدىرمەۋگە تىرىستى. 8-راۋندتان كەيىن گولوۆكين اۋىر سوققىلار جاساي باستادى. الۆارەس تە گولوۆكيننىڭ تاكتيكاسىن تۇسىنگەندەي قورعانىستى كۇشەيتتى. 10 راۋندتا گولوۆكين مەن الۆارەس شارشاي باستادى. جانكۇيەرلەردىڭ كوبىسى 10-11 راۋندتا نوكاۋتقا كۋا بولامىز دەپ كۇتكەن، الايدا ايقاس 12 راۋندتقا سوزىلدى. 

ەسكە سالساق، 17 قىركۇيەكتە گولوۆكين مەن الۆارەس T-Mobile ارەناسىندا كەزدەسىپ، جەكپە-جەكتىڭ قورىتىندىسى تەڭ اياقتالعان بولاتىن. الايدا كوپشىلىكتىڭ پىكىرى ەكىگە جارىلىپ، جانكۇيەرلەر ريەۆانشتى اسىعا كۇتتى. 

ريەۆانش بيىلعى جىلدىڭ مامىر ايىنا جوسپارلانعان بولاتىن. الايدا دوپينگ داۋىنا بايلانىستى ەكى تاراپ كەلىسىمگە كەلە المادى. 

سالماق ولشەۋ كەزىندە گولوۆكيننىڭ سالماعى "كانەلودان" 91 گرامم اۋىر بولىپ شىقتى. كوز ءتۇيىستىرۋ راسىمىندە الۆارەستىڭ جۇيكەسى سىر بەرگەندەي كورىنگەن. 

گەنناديي گولوۆكين وسىعان دەيىن 39 جەكپە-جەك وتكىزىپ بىرەۋىندە عانا تەڭ تۇسكەن بولاتىن. ال  ساۋل الۆارەس بولسا 52 كەزدەسۋىنىڭ ەكەۋىندە تەڭ ءتۇسىپ، فلود مەيۆەزەرگە ەسە جىبەرگەن. 

ەلباسى بۇكىل الەم كۇتكەن جەكپە-جەككە دەيىن گولوۆكينمەن كەزدەسىپ وعان جەڭىس تىلەگەن. گولوۆكين ءوز كەزەگىندە ەلباسىعا WBC، WBA (Super)، IBO جانە IBF تۇجىرىمدارى بويىنشا كاسىپقويلار اراسىندا بوكستان العان چەمپيوندىق بەلدىكتەرىن سىيعا تارتتى. 

ءوز سالماعىندا ەشكىمگە ەسە جىبەرمەگەن گولوۆكين كانەلومەن كەزدەسۋىن سوعىسقا بالاعان ەدى. قوس بىلعارى قولعاپ شەبەرى دە بۇل جەكپە-جەكتى نوكاۋتپەن اياقتاۋعا ۋادە بەرگەن. الايدا جەكپە-جەكتىڭ قورىتىندىسىن تورەشىلەر مالىمدەپ، گولوۆكين "كانەلوعا" ەسە جىبەردى. گولوۆكين چەمپيوندىق بەلدىكتەرىنەن ايىرىلىپ قالدى. ال بۇل گولوۆكيننىڭ سوڭعى جەكپە جەگى بولۋى مۇمكىن دەگەن اقپار بار. الايدا بۇل تۋرالى گولوۆكين 15 قىركۇيەكتەن كەيىن مالىمدەيتىنىن ايتتى.