اداي ءابىلدينوۆ،
ش.ايمانوۆ اتىنداعى «قازاقفيلم» اق-نىڭ «انيماسيالىق كينو» ءبولىمىنىڭ جەتەكشىسى، «دارىن» مەملەكەتتىك جاستار سىيلىعىنىڭ لاۋرەاتى، رەجيسسەر، سەناريست:
-بۇگىنگى تاڭدا ەلىمىزدەگى انيماسيا قاي باعىتتا كەلە جاتىر دەپ ويلايسىز؟
ء-دال قازىرگى ۋاقىتتا، سوڭعى ەكى جىلدىڭ ىشىندە ءبىز انيماسيالىق ءفيلمدى جاساۋ باعىتىندا ۇلكەن جەتىستىكتەرگە جەتتىك. 2017 جىلى قازاق انيماسياسىنا 50 جىل تولۋىنا وراي، ءبىز ۇلكەن سىي جاسادىق. ەكى بىردەي تولىقمەتراجدى «كۇلتەگىن» جانە «مۇزبالاق» انيماسيالىق فيلمدەرىن تۇسىردىك. ونىڭ تۇساۋكەسەرى وسى كۇز ۋاقىتىنا بولادى دەپ جوسپارلانىپ وتىر. بۇل ءبىزدىڭ شىعارماشىلىق توپ ءۇشىن ۇلكەن جەتىستىك. ويتكەنى ءبىز وسى قوس تۋىندىنىڭ اياسىندا ۇلكەن تەحنيكالىق جەتىستىكتەرگە جەتىپ، كادرلاردى تولىقتىردىق. رەجيسسۋرا جانە دراماتۋرگيالىق جاعىنان دا ۇلكەن تاجىريبيە جينادىق دەسەك بولادى. تاعى دا ايتا كەتەتىن جايت، جىل سايىن بىر-ەكى تولىقمەتراجدى فيلم ءتۇسىرۋدى ۇردىسكە اينالدىرماقپىز.
-فەستيۆالدە كورسەتىلگەن انيماسيالىق فيلمدەر جايلى ويىڭىز؟
-بيىلعى جىلى العاش رەت «بايقوڭىر» فيلم فەستيۆالىندە قازىلىق ەتتىم. ساراپقا تۇسكەن تۋىندىلاردىن 98%-ى دەرلىك كورەرمەن نازارىنا ۇسىنۋعا تۇرارلىق. فەستيۆالدىڭ ۇيىمداستىرىلۋى دا، بىلتىرعىعا قاراعاندا اۋقىمىنىڭ كەڭەيۋى دە، جاستاردىڭ كينو ونەرىنە كاسىبي تۇرعىدا بەت بۇرۋى دا كوڭىل قۋانتادى.
-«ۇزدىك انيماسيالىق فيلم» جانە «ۇزدىك قويۋشى-سۋرەتشى» جۇلدەسىن يەلەنگەن يۆان ارداشوۆتىڭ «وركەش» ءفيلمى تۋراسىندا نە ايتاسىز؟
-مەنى بارلىق قىرىنان: مونتاج، سۋرەتشىلىك، دىبىس جانە ماعىناسى بويىنشا تاڭقالدىرعان وسى فيلم بولدى. اسىرەسە ورىس جىگىتىنىڭ قازاقتىڭ ۇلتتىق قۇندىلىقتارىن، اكە مەن بالا اراسىنداعى بەرىك قاتىناسىن شەبەر جەتكىزگەندىگى جەڭىسكە ابدەن لايىق دەپ سانايمىن. قاسقىردىڭ وبرازى ارقىلى تۇپكىلىگىن تەرەڭ ەتىپ تۇسىندىرگەن بۇل فيلم ەرەن ەڭبەكتىڭ ارقاسىندا قوس بىردەي ماراپاتقا يە بولدى.
-جەڭىمپاز يۆان ارداشوۆپەن بىرىگىپ جۇمىس ىستەۋ جوسپاردا بار ما؟
-ارينە، تاۋەلسىز تۇلعا بولعاندىقتان، ءاربىر ادام ءوز قالاۋىمەن شەشىم قابىلداۋعا قۇقىلى. دەگەنمەن، «وركەش» انيماسيالىق ءفيلمىن ونان ءارى دامىتىپ، بىرىگىپ جۇمىس جاسايىق دەگەن ۇسىنىس رەجيسسەر تاراپىنان بولىپ جاتسا، ءبىزدىڭ قۇشاعىمىز ءاردايىم ايقارا اشىق.
-انيماسيالىق تۋىندىلاردا قوزعالاتىن تاقىرىپتاردىڭ وزەكتىلىگى؟
-انيماسيا ارقىلى ءار ءتۇرلى الەۋمەتتىك ماسەلەلەردى، تاريحي، عىلىمي، رۋحاني قۇندىلىقتاردى، بالالارعا ارنالعان تاربيەلىك ماڭىزى زور دۇنيەلەردى كورسەتۋگە بولادى. ناقتى وسى «بايقوڭىر» فيلمفەستيۆالى تۋرالى ايتار بولسام، مۇندا سان الۋان ماسەلەلەر كوتەرىلگەندىكتەن، تاقىرىپتارى دا ءار ءتۇرلى. دەگەنمەن، بۇلدىرشىندەردىڭ سۇيىكتى ويىنشىعىنا اينالاتىنداي، كوزگە وتتاي باسىلاتىن كەيىپكەر شىعارۋ ءۇشىن ءالى دە ۇلكەن ىزدەنىس كەرەك. انيماتور ارىپتەستەر وسى ماسەلەنى قولعا السا دەگەن تىلەك بار.
-بۇل فيلمدەردىڭ تەحنيكالىق ءتۇسىرىلىمى قاي دەڭگەيدە دەپ ويلايسىز؟
-ارينە، كاسىبي تۇرعىدان قاراعاندا از-كەم قاتەلىكتەر بار. ويتكەنى ساپالى انيماسيالىق تۋىندى جاساۋ كوپ قارجىنى تالاپ ەتەدى. مۇمكىن ءبىر سەبەبى وسىدان بولار. سوندىقتان، ماماندار دايارلايتىن وقۋ ورىندارى زاماناۋي تەحنيكالارمەن قامتاماسىز ەتىلسە دەگەن تىلەگىمىز بار.
سۇحباتتاسقان ت.ق.جۇرگەنوۆ اتىنداعى قازاق ۇلتتىق ونەر اكادەمياسىنىڭ 4 -كۋرس ستۋدەنتتى ماريا پيلتان
