2018 جىلدىڭ مامىر مەن تامىز ايلارىنىڭ ارالىعىندا اقپاراتتىق كەڭىستىكتە 7-20-25 باعدارلاماسى 28 487 رەت اتالعان. بۇل تۋرالى، ranking.kz دايىنداعان مەديا-ساراپتاما نەگىزىندە باسپانا يپوتەكالىق ۇيىمىنىڭ سىرتقى كوممۋنيكاسيالار قىزمەتى مالىمدەدى.

قازاقستاندىقتار 7-20-25 تۋرالى كوبىنە الەۋمەتتىك جەلىلەردە جازعان. الەۋمەتتىك جەلىلەردىڭ ۇلەسى 83،3% قۇراسا، ب ا ق ۇلەسى 12،9%، مەسسەندجەرلەر – 2،75%، بلوگ پەن فورۋمدار شامامەن 1%-دى قۇراعان.

سوڭعى ايدىڭ كورسەتكىشى بويىنشا 7-20-25 «نۇرلى جەر» باعدارلاماسىنان 8 رەت كوبىرەك اتالعان.

سونىمەن قاتار، ranking.kz ساراپشىلارى قازاقستاندىقتاردى 7-20-25 باعدارلاماسى اياسىندا كوبىرەك تولعاندىراتىن تاقىرىپتاردى انىقتادى. وعان العاشقى جارنانى جيناۋ، ءۇي تابۋ، تولەمقابىلەتتىلىگىن راستاۋ بويىنشا قيىندىقتار كىرەدى. سونىمەن بىرگە، وتانداستارىمىزدىڭ ءبىرازى قولدانىستا بولعان ەسكى ۇيلەردى باعدارلاماعا ەنگىزۋ بويىنشا ۇسىنىستارىن بىلدىرگەن.

بۇل جاعدايدا، «باسپانا» يپوتەكالىق ۇيىمىنىڭ اكىمدىكتەر مەن «نۇر وتان» پارتياسىمەن بىرلەسىپ قولعا العان شارالارى كوپشىلىكتىڭ ويىنان ءدوپ شىققانىن ايتا كەتۋ كەرەك.

مىسالى، العاشقى جارنانى 10 پايىزعا ارزانداتۋ ماقساتىندا "جاس ارمان" مەن "قامقور باسپانا" ونىمدەرى ازىرلەنىپ، ولار شىمكەنت پەن اقتوبەدە جۇمىس ىستەي باستادى. ايماقتارداعى قۇرىلىس قارقىنىن جانداندىرۋعا 150 ملرد تەنگە ءبولىنىپ، قولدانىستا بولعان ۇيلەرگە يپوتەكالىق نەسيە بەرۋ ماقساتىندا جىلدىق ستاۆكاسى 10،75 پايىزدى قۇرايتىن «باسپانا حيت» ءونىمى ازىرلەندى.

«ءبىز قازاقستاندىقتاردىڭ كوڭىل-كۇيىن ءجىتى باقىلاپ، قانداي دا ءبىر وتىنىشتەر مەن ارىزدار بويىنشا دەر كەزىندە شارا قولدانىپ كەلەمىز. سونىڭ ناتيجەسىندە، ازاماتتار 7-20-25 باعدارلاماسىنىڭ ورىندالۋ بارىسىنا وڭ باعا بەرۋدە»، - دەدى، «باسپانا» يپوتەكالىق ۇيىمىنىڭ باسشىسى قايرات التىنبەكوۆ.

مەديا-ساراپتاما بويىنشا 7-20-25 باعدارلاماسىنا قاتىستى سىني اقپاراتتار ۇلەسى 7 پايىزدان اسپاعان. ال ورتاق ەسەپپەن ءبىر ايدا باعدارلاما تۋرالى اقپاراتپەن 2،5 ميلليون ازامات قامتىلعان.

ايتا كەتەيىك، بانكتەر بيىل شىلدە ايىنان باستاپ «7-20-25» باعدارلاماسى بويىنشا يپوتەكالىق نەسيە بەرۋدى باستاپ كەتتى. ال جەڭىلدەتىلگەن يپوتەكانى كىمدەر الا الادى؟ بۇل ساۋالعا ق ر ۇلتتىق بانك ءتوراعاسى دانيار اقىشيەۆ جاۋاپ بەردى. ايتۋىنشا، يپوتەكالىق باعدارلاماعا تۇراقتى جۇمىس بار كەز كەلگەن ادام قاتىسا الادى. الايدا ول ازاماتتىڭ اتىندا باسپانا بولماۋى ءتيىس. جانە نەسيە تاريحى دا دۇرىس بولۋى كەرەك. بۇدان بۇرىن ەلباسى «7-20-25» باعدارلاماسىن جۇزەگە اسىرۋ ءۇشىن ۇلتتىق بانك پەن ۇكىمەت بىرلەسىپ جۇمىس ىستەۋ كەرەك.

«ۇلتتىق بانكتىڭ، ەكىنشى دەڭگەيلى بانكتەر مەن قور نارىعىنىڭ مۇمكىندىكتەرىن ىسكە قوسۋ كەرەك. ۇلتتىق بانك كەمىندە 1 تريلليون تەڭگە قارجىنى تارتاتىن ارنايى كومپانيا قۇرىپ، ونى بانكتەردىڭ جوعارىدا ايتىلعان شارتتارىنا جاۋاپ بەرەتىن جاڭا يپوتەكالىق نەسيەلەرىن ساتىپ الۋعا جۇمساۋى قاجەت. باعدارلامانى جۇزەگە اسىرۋ ناتيجەسىندە ميلليون قازاقستاندىق باسپانا الۋ مۇمكىندىگىنە يە بولادى»، – دەگەن ەدى نۇرسۇلتان نازاربايەۆ.

بۇعان دەيىن «باسپانا» يپوتەكالىق ۇيىمىنىڭ» باسقارما ءتوراعاسى قايرات التىنبەكوۆ «7-20-25» باعدارلاماسىنا قىزىعۋشىلىق تانىتقانداردىڭ سانى كۇن ساناپ ارتىپ كەلەتىنىن مالىمدەگەن. قىركۇيەكتىڭ باسىنداعى ستاتيستيكاعا سايكەس، باعدارلاما اياسىندا 27 ميلليارد تەڭگەگەگ ءوتىنىش قابىلدانعان. سونىمەن قاتار ۇيىم باسشىسى جاڭا باعدارلاماعا بەلسەندى قاتىسىپ جاتقان وڭىرلەردى دە اتادى. ايتۋىنشا، الماتى، استانا قالالارى مەن ماڭعىستاۋ وبلىسى «7-20-25» بويىنشا كوش باستاپ تۇر.

«تۇرعىندار اراسىندا دا قىزىعۋشىلىق ارتقان. بانك-سەرىكتەستەرىمىزگە سۇراۋ سالىپ، بىلگىسى كەلەتىن جانداردىڭ سانى كۇن ساناپ ارتىپ كەلەدى. الايدا باعدارلامانىڭ باستى تالاپتارى بارىنە ءمالىم. العاشقى جارنا 20 پايىز، جىلدىق مولشەرلەمە 7 پايىز، نەسيەنىڭ ەڭ ۇزاق مەرزىمى 25 جىلعا دەيىن»، - دەپ ءتۇسىندىرىپ وتكەن ەدى قايرات التىنبەكوۆ.