1 قازاندا «ديماش» اتتى ونلاين-دۇكەننىڭ تاۋارلارىن تۇرعىندارعا جەتكىزۋ ماقساتىندا قانات ايتپايەۆ پەن «قازپوشتا» اق باسقارما ءتوراعاسى ساكەن سارسەنوۆ اراسىندا كەلىسىم جاسالدى. بۇل تۋرالى «قازپوشتا» اق باسقارما ءتوراعاسى ساكەن سارسەنوۆ ءوزىنىڭ Facebook پاراقشاسىندا جازدى.

«بەلگىلى ءارتىس، ديماش قۇدايبەرگەننىڭ اكەسى، قانات ايتبايەۆپەن كەزدەسۋ وتكىزدىك. وزدەرىڭىز بىلەتىندەي، بىلتىردان بەرى ديماش قازپوشتانىڭ كەلبەتى، بيىل دا وسى سەرىكتەستىگىمىزدى جالعاستىرۋعا كەلىستىك»، – دەيدى س. سارسەنوۆ.

ونىڭ ايتۋىنشا، قازپوشتا «ديماش» اتتى ينتەرنەت-دۇكەننىڭ جۇمىسىن العا باستىرىپ تاۋارلارىن كليەنتتەرگە جەتكىزۋگە كومەك كورسەتەتىن بولادى. ءقازىر ولار ءشاي جانە كيىم توپتاماسىن شىعارىپ جاتىر، الداعى كەزدە دۇكەندە ديماشتىڭ شىعارماشىلىعىنا ارنالعان سۋۆەنيرلەر دە ساتىلاتىن بولادى.

«ديماش قۇدايبەرگەن - بۇل برەند، الەمدىك دەڭگەيدەگى جۇلدىز، ءبىزدىڭ ەلىمىزدى الەمدىك ساحنادا تانىتىپ جۇرگەن تۇلعا. ول قازاقستاندا دا، شەتەلدە دە ەلەكتروندىق كوممەرسيانىڭ دامۋىنا زور ۇلەسىن قوساتىنىنا سەنىمدىمىن»، – دەپ تۇيىندەدى باسقارما ءتوراعاسى.

ال الەۋمەتتىك جەلى قولدانۋشىلارى بولسا دۇكەن ۇسىنىپ جاتقان شايدىڭ ءدامدى ەكەنىن، ەكىجاقتى سەرىكتەستىككە ريزا ەكەندىكتەرىن جەتكىزۋدە.

«الاقاي! ديماشتىڭ ەسىمى جازىلعان كۇمىس القانى ساتىپ العىم كەلەدى. سۋۆەنيرلىك تاۋارلارىن دا العىم كەلەدى. شايى وتە ءدامدى، ساپاسى دا جاقسى»، – دەپ جەلى قولدانۋشىلارى ءوز پىكىرلەرىن ءبىلدىردى.

تانىمال ءانشى بولسا وتاندىق پوشتا جەلىسىنىڭ قازىرگى قىزمەتىنە ريزا ەكەندىگىن بىرنەشە كۇن بۇرىن جەتكىزگەن بولاتىن.

«سوڭعى كەزدە مەن الەمنىڭ تۇكپىر-تۇكپىرىنەن حاتتار مەن سىيلىقتار الامىن. مەن ەلىمىزدىڭ پوشتاسىنىڭ قىزمەت كورسەتۋ دەڭگەيى مەن دامۋ قارقىنىنا شىن پەيىلىممەن قايران قالامىن. ارينە، قازپوشتا الەۋمەتتىك كومپانيا، ول قازاقستاندىقتاردىڭ، ءتىپتى ەڭ شالعاي  اۋىلداردا پوشتالىق جانە قارجىلىق قىزمەتتەردى الۋعا مۇمكىندىك بەرەدى، وسىلايشا ەلىمىزدىڭ بارلىق وڭىرلەرىن بىرىكتىرەدى. ونىڭ الەۋمەتتىك ءرولى جانە سونىمەن بىرگە زاماناۋيلىعى مەن تەحنولوگيالىلىعى  ماعان ۇنايدى. مەن قازپوشتانىڭ ودان ءارى كوركەيىپ، گۇلدەنە بەرۋىن تىلەيمىن»، — دەدى ول.

ەسكە سالا كەتەيىك، بىلتىرعى جىلدىڭ قازانىندا ۇلتتىق پوشتا وپەراتورى مەن تالانتتى ونەر يەسى ديماش قۇدايبەرگەننىڭ اراسىندا ءوزارا كەلىسىم جاسالعانى تۋرالى حابارلانعان بولاتىن. ديماش قۇدايبەرگەنوۆ — ۆيتەبسك قالاسىندا وتكەن «سلاۆيانسكيي بازار-2015» سايىسىنىڭ گران-پري جۇلدەسىنىڭ جانە Music Awards پرەمياسىنىڭ «ازياداعى ەڭ تانىمال ءانشى» نوميناسياسىنىڭ يەگەرى.  قازاقستاندىق ءانشىنى قىتايدا وتكەن I am a Singer-2017 سايىسىندا ەكىنشى ورىن الىپ، دۇنيە جۇزىنە تانىمال بولدى.