قازاقستاندا ۇجىمدىق قاۋىپسىزدىك تۋرالى شارت ۇيىمى بارلاۋ بولىمشەلەرىنىڭ كۇشتەرى جانە قۇرالدارىمەن «ىزدەستىرۋ-2018» بىرلەسكەن تاكتيكالىق ارنايى وقۋ-جاتتىعۋى وتۋدە.
تاكتيكالىق وقۋ-جاتتىعۋ اياسىندا ۇقشۇ-عا مۇشە مەملەكەتتەردىڭ بارلاۋ بولىمشەلەرى بارلاۋدى جۇرگىزۋ بويىنشا جاۋىنگەرلىك ءىس-قيمىلداردى ورىنداۋعا كىرىستى. الماتى وبلىسىندعى قاپشاعاي سۋ قويماسىندا اسكەري جۇزگىشتەر جاۋدىڭ قارسى كۇشىنە قالاي تويتارىس بەرىپ، ولاردىڭ كوزىن قالاي جوياتىنىن كورسەتىپ، شەبەرلىكتەرىمەن ءبولىستى.
وقۋ-جاتتىعۋ كەزىندە جەكە ۇجىم «بارلاۋشىلار» جانە «تەرروريستەر» بولىپ ەكى كومانداعا بولىنگەن. بارلاۋشىلاردىڭ ەكى توبى قايىقتان سۋعا سۇڭگىپ، بەلگىلى تەرەڭدىكتە جاعاعا دەيىن 50 مەتر قاشىقتىقتان ءجۇزىپ كەلىپ، «تەرروريستەرگە» شابۋىل جاسادى. جاعاعا شىققان بويدا اۆتوماتتار مەن ءتۇتىن بومبالارىن پايدالانىپ، «تەرروريستەردىڭ» كوزىن جويدى.
«جاتتىعۋ بارىسىندا بىزگە زاڭسىز قارۋلى توپتاردى انىقتاپ، ولاردىڭ كوزىن جويۋ تاپسىرىلدى. وسى ورايدا، اسكەريلەردى جوعارى جىلدامدىقتى قايىقتاردا بەلگىلى ورىنعا جەتكىزۋ، كوپىرشىك شىعارمايتىن تۇيىقتالعان اپپاراتتاردى قولدانۋ ارقىلى سۋ استىندا بارلاۋشىلاردىڭ قوزعالىسى، سونداي-اق زاڭسىز قارۋلانعان لاڭكەستەردى قۇرىقتاپ، ولاردىڭ كوزىن جويۋ جانە بارلاۋشىلار توبىن ەۆاكۋاسيالاۋ ماسەلەلەرى قاراستىرىلدى.
بىزگە ارتىلعان مىندەتتەر تولىعىمەن ورىندالدى»، - دەپ اتاپ ءوتتى №35950 اسكەري ءبولىمىنىڭ باسشىسى، مايور ەركەبۇلان كۋزەنوۆ.
ءيا، اسكەري جۇزگىشتەردىڭ جۇمىسى وڭاي ەمەس. مۇنداي سالادا قىزمەت اتقارۋ ءۇشىن دەنساۋلىعىڭ جاقسى بولعانى جەتكىلىكسىز، پسيحولوگيالىق تۇرعىدان دا وتە مىقتى بولىپ، كەز كەلگەن سيتۋاسياعا دايىن بولىپ، ءتۇرلى وقىس وقيعالارعا سالقىنقاندىلىق تانىتا ءبىلۋ كەرەك.
اسكەري جۇزگىشتەردىڭ قاتارىنا قوسىلۋ ءۇشىن كۋرسانتتار مىندەتتى تۇردە كوپتەگەن سىناقتاردان ءوتىپ، قاجەتتى ەرەجەلەردى قابىلدايدى، سونىمەن قاتار، ولار پسيحولوگيالىق جانە ارنايى تەكسەرىستەن وتۋلەرى ءتيىس. بۇعان قوسا، اسكەري جۇزگىشتەر كەز كەلگەن جاعدايدا ءوز بەتىمەن دۇرىس شەشىم قابىلداي الۋى ءتيىس. وقىس وقيعا كەزىندە جوعارىدان بۇيرىقتى كۇتىپ وتىرۋعا ۋاقىت جەتپەي، جىلدام ارەكەت ەتۋى كەرەك بولعان جاعدايدا سيتۋاسيادان شىعۋ جولدارىن ءوز بەتىمەن قاراستىرا الۋى كەرەك.
«ءوز ىسىنە ۇلكەن جاۋاپكەرشىلىكپەن قاراپ، بۇل ماماندىقتى ءسۇيىپ ىستەمەگەن ادام جەتىستىكتەرگە جەتە المايدى جانە بۇل سالادا ۇزاققا دەيىن بارمايدى. مەنىڭ ويىمشا، اسكەري كۇشتەردىڭ قاتارىندا قىزمەت ەتۋ ءۇشىن، ەڭ الدىمەن، ءوز ەلىڭنىڭ پاتريوتى بولۋىڭ كەرەك. ال، اقشا ءۇشىن اسكەري سالادا جۇرگەن ادامعا سەنىم ارتا المايسىڭ، ونداي ادام كەز كەلگەن ۋاقىتتا سەنى ساتىپ كەتۋى ابدەن مۇمكىن.
اسكەري جۇزگىشتەردىڭ قاتارىندا بولۋدى بالا كەزىمنەن ارمانداعان جوقپىن، العاشىندا قۇرلىق اسكەرلەرىنىڭ قاتارىندا قىزمەت ەتتىم. كەيىننەن بۇل قىزمەتكە كەلگەننەن كەيىن، ءوزىمنىڭ ماماندىعىمدى جاقسى كورىپ كەتتىم»، - دەيدى سەرجانت ولجاس قاسىموۆ.
ونىڭ ايتۋىنشا، اسكەري ادام وتە اقىلدى بولۋى ءتيىس. ۇدايى ءوزىڭدى دامىتۋ، شەت تىلدەرىن مەڭگەرۋ – ءبىرىنشى ساناتتاعى جاۋىنگەردىڭ نەگىزگى بەلگىلەرى.
وقۋ-جاتتىعۋدا قويىلعان نەگىزگى مىندەتتەردى اياقتاعاننان كەيىن تىلشىلەرگە دە اسكەري جۇزگىشتەرمەن بىرگە سۋعا سۇڭگۋگە مۇمكىندىك بەرىلدى. الايدا مۇنداي قادامعا بارۋعا بارلىق ءتىلشىنىڭ باتىلى جەتپەدى. ءبىرى سۋدان قورىقسا، ءبىرى كۇننىڭ سالقىندىعىنان قورىقتى. دەگەنمەن اسكەري جۇزگىشتەرمەن بىرگە سۋعا ءتۇسىپ كورگەننەن كەيىن-اق ولاردىڭ جۇمىسىنىڭ قانشالىقتى اۋىر ءارى ءقاۋىپتى ەكەنىن تۇسىنگەندەيمىز.
