قازاقستان حالقىنىڭ تىلدەرى كۇنى مەرەكەسىنە وراي تالدىقورعاندا «ءتىل – بىرلىكتىڭ بەسىگى» اتتى وبلىستىق فورۋم ءوتتى.
شارا بارىسىندا وڭىردەگى «2011-2019 جىلدارعا ارنالعان مەملەكەتتىك ءتىلدىڭ قولدانىلۋ جانە دامىتۋ اياسىن كەڭەيتۋ» مەملەكەتتىك باعدارلاماسىنا سايكەس، ءتىل ايلىعى اياسىندا وتكەن ءتۇرلى بايقاۋلار قورىتىندىلانىپ، جەڭىمپازدارى ماراپاتتالدى.
«ءتىل – بىرلىكتىڭ بەسىگى» اتتى وبلىستىق فورۋمدى اقسۋ اۋدانىنداعى اقسۋ حالىق تەاترىنىڭ ارتىستەرى تەاترلاندىرىلعان قويىلىممەن اشىپ بەردى. وندا ۇشقان قۇستىڭ قاناتى تالىپ، جۇگىرگەن اڭنىڭ تۇياعى توزاتىن ۇلان-عايىر دالامىزدى اق بىلەكتىڭ كۇشىمەن، اق نايزانىڭ ۇشىمەن قورعاعان باتىر بابالارىمىزدىڭ ەرلىگى ساحنالاندى. قويىلىم اياقتالا سالىسىمەن ءتىل ايلىعى اياسىندا وتكەن ءتۇرلى بايقاۋلاردىڭ جەڭىمپازدارى مەن جۇلدەگەرلەرى ماراپاتتالدى.
"الماتى وبلىسىندا ءتىل ايلىعى جاريالانعان بولاتىن. سول ايلىقتىڭ اياسىندا كوپتەگەن بايقاۋلار مەن ءتىلدىڭ قولدانىلۋ اياسىن كەڭەيتۋ تۇرعىسىنداعى شارالار وتكىزىلدى. سول شارالاردى ءبىز بۇگىنگى مەرەكەدە قورىتىندىلاپ، ناتيجەسىن شىعارىپ وتىرمىز. بۇگىنگى قازاقستان حالقى تىلدەرىنىڭ مەرەكەسى كۇنى قۇتتى بولسىن!" - دەدى وبلىستىق تىلدەردى دامىتۋ باسقارماسىنىڭ باسشىسى ايدار باشبايەۆ.
الماتى وبلىسىندا ءتىل ايلىعى بارىسىندا «ءتىل – پاراسات» بايقاۋىمەن قاتار «ءتىل شەبەرى»، «سلاۆيان جازۋلارى»، «لاتىن الىپپيىندە ەسسە جازۋ» جانە كوركەمسوز وقۋ شەبەرلەرىنىڭ بايقاۋى ۇيىمداستىرىلدى. اقيىق اقىن جۇمەكەن ناجىمەدەنوۆتىڭ ولەڭدەرىن ناقىشىنا كەلتىرە وقيتىن الەكساندرا ميحەيەۆا بۇگىن «ءتىل – پاراسات» بايقاۋىنىڭ جەڭىمپازى اتاندى. ول تۇساۋكەسەر، ديالوگ قۇرۋ، ەسسە جازۋ، ءوز ونەرىن كورسەتۋ سياقتى ءتورت كەزەڭ بويىنشا ءوتتى.
"وتە جاقسى. ارينە، ۇيدەگىلەردىڭ ءبارى قۋانىپ جاتىر. ءوزىم باس جۇلدە الامىن دەپ ويلامادىم. سەبەبى قارسىلاستارىم مىقتى. ەشقانداي مۇمكىندىك بولمايدى دەپ ويلادىم. جۇرەگىم قازاق ءتىلى دەپ سوعادى. جۇرەگىم قازاق دەپ سوعادى"، - دەپ اتاپ ءوتتى «ءتىل – پاراسات» بايقاۋىنىڭ جەڭىمپازى الەكساندرا ميحەيەۆا.
وتكەن جىلى ەلىمىزدە 5 قىركۇيەك – قازاقستان حالقى تىلدەرىنىڭ كۇنى بولىپ بەلگىلەندى. ارينە، ءتىل مەرەكەسىن اتاپ ءوتۋ ءۇشىن بۇل كۇن تەگىننەن-تەگىن تاڭدالعان جوق. 1872 جىلى 5 قىركۇيەكتە قازاق ءتىل ءبىلىمى عىلىمىنىڭ اتاسى، كورنەكتى ادەبيەت زەرتتەۋشىسى احمەت بايتۇرسىنوۆ دۇنيەگە كەلدى. «بۇل سالادا اتقارىلاتىن جۇمىستاردىڭ اۋقىمى وتە كەڭ. ەندى «رۋحاني جاڭعىرۋ» باعدارلاماسى اياسىندا قازاق ءتىلىن لاتىن گرافيكاسىنا كوشىرۋ ماسەلەسىنە ايرىقشا باسىمدىق بەرىلەدى، – دەدى وبلىستىق تىلدەردى دامىتۋ باسقارماسىنىڭ باسشىسى ايدار باشبايەۆ.
