الەم جارىلىستار مەن لاڭكەستىك ارەكەتتەردەن ءالى ازات بولا قويعان جوق. ەڭ سوڭعى وسىنداي جانتۇرشىگەرلىك ارەكەت كەشە 17 قازان كۇنى قىرىمنىڭ كەرچ قالاسىندا ورىن الدى. اتالعان كوللەدجدىڭ ستۋدەنتى ۆلاديسلاۆ روسلياكوۆ  وقۋ ورنىندا جارىلىس جاساپ، ارتىنان ءوزىن-وزى اتىپ ءولتىردى. جارىلىس پەن قىلمىسكەر اتقان وقتان 19 ادام قازا تاۋىپ، 40-تان استام ادام جارالاندى.

وسى وقىس وقيعادان كەيىن قىلمىسكەر ستۋدەنتتىڭ اكە-شەشەسىنەن جاۋاپ الىنۋدا. 18-20 جاستاعى جاندار قاسكويدىڭ ارەكەتىنەن  جازىقسىز جاپا شەكتى، جارالاندى، قىرشىن كەتتى. قابىرعاعا باتاتىن اۋىر وقيعا. باسقا بەرمەسىن. جان شوشىرلىق وسىنداي اۋىر وقيعالار ءجيى قايتالانىپ جاتسا دا،  ادامزات ودان ءالى ساباق العان جوق. ءقازىر سيەۆاستوپولدە ءۇش كۇندىك قارالى كۇن  جاريالاندى. ارينە، ستۋدەنت ۆلاديسلاۆ روسلياكوۆ  مۇنداي ارەكەتكە نەلىكتەن باردى، مۇنىڭ بارلىعى دا ۇستازدارى مەن اتا-اناسىنان جاۋاپ الۋ ارقىلى انىقتالار. ءبىراق قىرشىن، باقيلىق بولىپ كەتكەندەردى كەرى قايتارا المايمىز. ۇستازدار «روسلياكوۆ جاقسى ستۋدەنت ەدى،  ونىڭ جاعىمسىز قىلىقتارىن وسى ۋاقىتتا دەيىن بايقاي المادىق» دەپ جاۋاپ بەرەر. الايدا وكىنىشتىڭ ورنى تولمايدى.

ادام بالاسى ساناسىن ۋلاعان جاعىمسىز اعىمداردان ارىلماي، وسىنداي وقيعالار ءجيى قايتالانا بەرەدى. بۇل ءبىرىنشى رەت ەمەس، وسىدان ەكى اي عانا بۇرىن پاكىستاننىڭ بەلۋدجيستان پروۆينسياسىنىڭ كۆەتتا قالاسىندا لاڭكەس سايلاۋ ۋچاسكەسىندە جارىلىس جاسادى. 28 ادام قايتىس بولىپ،  اۆتوماتتان اتىلعان وقتان 30-عا جۋىق ادام اۋىر جاراقات الدى. 25 شىلدە كۇنى سيريانىڭ وڭتۇستىگىندەگى ەس-سۋۆەيدا قالاسىندا لاڭكەستىك ارەكەتتىڭ سالدارىنان 38 ادام قۇربان بولىپ، 30 ادام جارالاندى. مۇنداي اۋىر وقيعالاردى تىزە بەرسەك، ودان ارى جالعاسا بەرەدى. كابۋل قالاسىنىڭ  حاميد كارزاي اتىنداعى اۋەجايدا سىرتتا قۋعىندا جۇرگەن ابدۋل-راشيد دۋستۋمدى كۇتىپ الۋ كەزىندە دە ەشكىم كۇتپەگەن جارىلىس بولىپ، 23 ادام باقيلىق بولدى. 107 ادام جارالاندى، ولاردىڭ ءبىرقاتارى كەيىننەن ەسىن جيناي الماي، كوز جۇمدى.

13 شىلدە كۇنى تاعى دا پاكستاننىڭ پەشاۆار پروۆينسياسىندا سايلاۋالدى جيىن ساتىندە لاڭكەستىك ارەكەتتىڭ سالدارىنان 149 ادام باقيلىق بولىپ، 186 ادام اۋىر جاراقاتتاندى.  10 شىلدە كۇنى پەشاۆار قالاسىندا حايبەر-پاحتۋنحۆا پروۆينسياسىندا بولعان جارىلىستان ۇلتتىق پارتيانىڭ باسشىسى حارۋن بيلەر مەن ونىڭ ۇلى دانيال بيلۋر كوز جۇمدى. تەراكت 22 ادامنىڭ ءومىرىن جالماپ، 60 ادام ءارتۇرلى دارەجەدە جاراقات الدى.

1 شىلدە كۇنى دە اۋعانستاننىڭ نانگارحار اكىمشىلىك ورتالىعىندا 19 ادام باقيلىق بولدى. جارىلىستىڭ سالدارىنان 230 ادام جەدەل تۇردە اۋرۋحاناعا جاتقىزىلدى.

جالپى الەمدىك تاريحقا كوز سالار بولساق، تەراكتىلەردىڭ ءبىرسىپىراسى پارلامەنتتىك نەمەسە پرەزيدەنتتىك سايلاۋ كەزىندە بولاتىنىن بايقايمىز. بۇل ەندى قارسىلاستى جولدان تايدىرۋ نەمەسە ونىڭ كوزىن قۇرتۋ ءۇشىن جاسالعان ارەكەت ەكەنىن بايقاۋعا بولادى. بۇل انىعىن ايتقاندا، دەموكراتيالىق وركەنيەتتەن تىس، قىلمىستىق جانە لاڭكەستىك ورنى تولماس اۋىر  وقيعاعا ۇلاساتىن جاعداي.

بۇعان مىسال كەلتىرەر بولساق، بيىلعى جىلدىڭ 23 ماۋسىمىندا زيمباببە پرەزيدەنتىنىڭ سايلاۋالدى كامپانياسى كەزىندە جارىلىستىڭ سالدارىنان

10 ادام باقيلىق بولىپ، 49 ادام جاپا شەكتى.

23 ماۋسىم كۇنى ەفيوفيا پرەمەر-مينيسترىنىڭ  حالىقپەن كەزدەسۋىندە لاقتىرىلعان گراناتانىڭ سالدارىنان 2 ادام كوز جۇمدى، 156 ادام اۋرۋحاناعا جاتقىزىلدى.

 ەندى الەمنىڭ ءار ەلىندە ورىن العان لاڭكەستىك وقيعالاردى ودان ارى كەستە تۇرىندە تىزبەلەسەك...

بەرىك بەيسەن ۇلى